Hoseya 1
1
1 # Wona ni ka: 2 Vafu. 15:1-7; 2 Mak. 26:1-23; 2 Vafu. 15:32-38; 2 Mak. 27:1-8; 2 Vafu. 18:1--20:21; 2 Mak. 29:1--32:33. Dipswi da Mkoma di nga wombwa ka Hoseya, mwana Bheyeri, ka masiku a Uziya, Jothamu, Akazi, ni Ezekhiya, vafumeli va ka Judha, ni ka masiku a Jerobhowamu, mwana Jowasi, mfumeli wa ka Israyeli.
Msikati, ni vanana va Hoseya
2Makhato a dipswi da Mkoma ngu ka Hoseya; Mkoma a to khene koko ka Hoseya:
Tsula uya teka wamsikati wa wugelegele ni vanana va wugelegele; nguko ditiko di mahile wugelegele, ngu kutshuralela Mkoma.
3Se a to tsula eya teka Gomeri, mwanana wa dihorana wa Diblayimi, kambe ene a to khura txirumbu e m'velekela mwanana wa mfana. 4#Wona ni ka: 2 Vafu. 10:11. Se Mkoma a to m'gela ku khene:
“Mraye ditina daku i Jezireyeli; nguko mndani ka mbimonyana ni na photela mnoha wa Jezireyeli, txitimwi ka nyumba ya ka Jewu, ni lovisa mfumo wa nyumba ya ka Israyeli. 5Se ku na maheka taku, ka ditshiku donedo, ni funya wulaho wa Israyeli mkovani ka Jezireyeli.”
6Se a to tshumela e mana txirumbu e veleka mwanana wa dihorana; se Mkoma a to khene:
“Mraye ditina daku i Lo-Ruwama; nguko ani kha ni na mbi tshumela kambe ni pfela wumbilu va nyumba ya ka Israyeli, aniko ni na va tekela sotshe.” 7Kambe na pfela wumbilu va nyumba ya ka Judha, aniko ni na va hulukisa ani Mkoma, Txizimu txawe; nguko kha ni na mbi va hulukisa ngu wulaho, hambi ngu ditxhari, mwendo ngu yimbi, ni mahantxhi kumbe ngu vagadhi va mahantxhi.
8Se msana ka kuva a di lumute Lo-Ruwama, a to khura txirumbu e veleka mwanana wa mfana. 9Se Mkoma a to khene:
Mraye ditina daku i Lo-Ami, nguko anu kha mi nga vathu vangu, nani kha ni na mbi va Txizimu txanu.
10 # Wona ni ka: Var. 9:26. Ngu kumaha keto, mtengo wa vanana va ka Israyeli u na nga mtxhefa wa lineneni, awule wu si pimwiko mwendo kubalwa; se ku na maheka tito, ka wukhalo wu va nga gelwa ku kha vona: Anu kha mi nga vathu vangu, va na kha vona: Anu mi vanana va Txizimu txi txi hanyako. 11Se vanana va ka Judha ni vanana va ka Israyeli votshe va na sengeletana, ve ti emisela mthangeli mmweyo dwe, ve huma ditikoni; nguko di na va da hombe ditshiku da Jezireyeli.
Currently Selected:
Hoseya 1: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.