Dhaniyeli 6
6
Dhaniyeli diphalani ka tingonyamo
1Dhariyo a ti woni i di tinene kuveka 120 wa vafumeli, txitimwi ka wotshe mfumo wakwe; 2se txitimwi kwawe a to veka vathangeli vararu, mmweyo wawe i ti ti Dhaniyeli, ati taku vafumeli va na yisa mibiko ka vona, kasiku mfumeli asi kanganyiswi ngu txilo. 3Sekoko Dhaniyeli wuwa a ti pinda vathangeli ni vafumeli, nguko kwakwe ku ti ti ni moya wa wunene; se mfumeli a to pimisa ku m'veka kuva mthangeli txitimwi ka wotshe mfumo. 4Sekoko vathangeli ni vafumeli, va to lava nzila yo wukela Dhaniyeli ngu mhaka ya mfumo; kambe kha va mana nzila hambi mnandu ni wawumwewo; nguko ene a ti thembekile, aniko kwakwe kha kwa maneka wubihi mwendo mnandu. 5Sekoko vavamna vava, va to kha vona:
Kha hi na mbi mana mhaka ni ya yimweyo yo wukela Dhaniyeli, ngako hi si lavi ku mwukela ngu mlayo wa Txizimu txakwe.
6Sekoko vathangeli vava ni vafumeli, va to tsula votshe ka mfumeli, va txiya kha vona kwakwe:
Awe mfumeli Dhariyo, hanya ngu ha ku sigwitiko! 7Votshe vathangeli va mfumo, vafumeli ni vafumeli va ditiko, vathangeli va yimbi, ni vafumeli va matiko a hombe, va to sunga txikungo, kasi kuveka txileleto txa wukoma ni kutsanisa mlayo wuwa, waku: Ni wuhi wuwa mndani ka magumi mararu a masiku a no maha txikombelo ka txizimu txokari mwendo ka m'thu wokari, na i si nga kwako, awe mfumeli, a na rinzwe diphalani ka tingonyamo. 8Konkuwa koko, awe mfumeli, tsanisa txileleto, u sayina mibhalo, kasiku txi si txitxwi, madingano ni mlayo wa Vamedhi ni wa Vapersa, wu si dinganiko kutxitxwa.
9Ngu mhaka yiya, mfumeli Dhariyo a to sayina mibhalo yiya ni txileleto.
10Se mbimo yi Dhaniyeli a nga ziva ti to mibhalo yi sayinilwe, a to wulela nyumbani kwakwe, (kambe ku ti ti ni mafasitela o rendekela didhawa da Jerusalema ma nga ti ti tutwe), e khizama kuraru ngu ditshiku, e kombela, a txi ninga kubonga masoni ka Txizimu txakwe, kufana ni tile a nga ti tolovela kumaha.
11Sekoko vavamna vale va to tsula votshe, veya mana Dhaniyeli a txi kombela, ni kudila, masoni ka Txizimu txakwe. 12Sekoko va to ya ti kombekisa ka mfumeli, va txi kha vona:
Madingano ni mlayo wa wukoma, ina khwa sayina txileleto txaku, ni wuhi wule a no maha txikombelo ka txizimu txokari, mwendo ka m'thu wokari, mndani ka magumi mararu a masiku, na i si nga kwako, awe mfumeli, a na rinzwa diphalani ka tingonyamo kani?
Mfumeli a to xamula, a txi khene:
Mhaka yiya yi tsani, madingano ni mlayo wa Vamedhi ni Vapersa, wu si dinganiko kutxitxwa.
13Sekoko va to xamula masoni ka mfumeli, va txi kha vona:
Dhaniyeli i ku mmweyo wa vale va nga tiswa ngu ditikoni ka Judha, kha kuengisi, awe mfumeli, hambi txileleto txi u nga sayina; ati mahela mikombelo yakwe kuraru ngu ditshiku.
14Ngako mfumeli a di pfite mhakeyo, a to pandiseka ngutu mbiluni kwakwe, a to thuma kuza ditambo diswa, a txi lava wutxhari wo hulukisa ngu wona Dhaniyeli. 15Se vavamna vale va to tsula votshe ka mfumeli, va txiya kha vona:
Tizive awe mfumeli taku, mlayo wa Vamedhi ni Vapersa, ngu ti to ni txa tximwetxo txileleto mwendo txirumo txi tsaniswako ngu mfumeli, kha txi dingani kutxitxwa.
16Sekoko mfumeli a to leleta ti taku kutiswa Dhaniyeli, e rinzwa diphalani ka tingonyamo. Se mfumeli a to womba ka Dhaniyeli, a txi khene:
“Txizimu txako, a txi u txi thumelako mbimo yotshe txi na kuhulukisa!”
17Ku to rindilitwa dirigwi di vhala txike txa diphala; se mfumeli e di vhala ngu txitambu txa ringi yakwe ni ya vahombe vakwe, kasiku ku si txitxwi txilo madingano ni timhaka ta Dhaniyeli. 18Sekoko mfumeli a to khukha eya nyumbani kwakwe ka wukoma, e ti tona wusiku wotshe, kambe kha tumela taku ve mu tisela sivetaveta sa wuembeleli; ni wukohe wu to hangalaka.
19Se mfumeli a to wuka ni mixo ngu kukuluveta, eya diphalani ka tingonyamo. 20A di hokile diphalani, a to dhana Dhaniyeli ngu dipswi da kuxaniseka, a txi khene:
Dhaniyeli, awe txithumi txa Txizimu txi txi hanyako! Ina Txizimu txako txi u txi thumelako masiku otshe, txi sikoti ku kuhulukisa ka tingonyamo, kani?
21Sekoko Dhaniyeli a to khene ka mfumeli:
Awe mfumeli, hanya ngu ha ku sigwitiko! 22Txizimu txangu txi rumete Ngelozi ya txona yi ta vhala sisofu sa tingonyamo, kasiku ti si ni mahi txilo, nguko ni manekile ni si na mnandu masoni ka Txizimu; hambi masoni kwako, awe mfumeli, kha ni khali kumaha wubihi ni wawumwewo.
23Sekoko mfumeli a to tsaka ngutu, e rumisa ti taku Dhaniyeli e humiswa diphalani ka tingonyamo; ngu kumaha keto, Dhaniyeli a to humiswa diphalani, se ve mana ti taku kha dawiswa ni ka kudhoto, nguko a ti khotwe ka Txizimu txakwe. 24Se mfumeli a to rumisa taku kunehwa vavamna vale va nga lumbeta Dhaniyeli, se vona ni vanana vawe, ni vasikati vawe, va to rinzwa diphalani ka tingonyamo, se tingonyamo ti va khamukela, na va sanzi kuhoka hahatshi ka diphala, ti va phatulela marambu otshe.
25Sekoko mfumeli Dhariyo a to bhalela vathu va tixaka totshe, matiko ni vathu va tidimi to hambanelana, va zumbako kotshe ha mafuni, a txi khene:
“Kudikha ku na ande hagari kwanu!” 26Ni leleta ti to ka madhawa otshe a mfumo wangu, vathu ve na dhudhumele ni kuthava masoni ka Txizimu txa Dhaniyeli;
nguko txona nji Txizimu txi hanyako, txi zumbako kala kupinduka,
kambe mfumo wa txona kha wu na khundumuswa;
ni kufuma ka txona kha ku na mbi va ni magwito.
27Txizimu txa hanyisa ni kuhulukisa,
txa maha sikombiso ni si xamaliso
nzumani ni ha mafuni;
Ngu txona txi nga hulukisa Dhaniyeli ka mtamo wa tingonyamo.
28Dhaniyeli wuwa, koko, a to humelela ka mbimo ya kufuma ka Dhariyo ni ya kufuma ka Siro, Mupersa.
Currently Selected:
Dhaniyeli 6: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.