Dhaniyeli 7
7
Txiwoniso txa mune wa sihari sa hombe
1Ka dilembe do khata da Bhelxazari, mfumeli wa Bhabhilona, Dhaniyeli a to lora mloro, e wona ni siwoniso a di otete ha m'bhedhuni kwakwe; se koneko a to bhala mloro, e xawutela misungo ya timhaka ta kona. 2Dhaniyeli a to womba a txi khene:
Ni to wona amu ka txiwoniso txangu txa ha wusiku, mune wa mimoya ya nzumani yi txi vhilusa mati a Linene la hombe. 3#Wona ni ka: Mtu. 13:1; 17:8. Se ku to pfukula mune wa sihari sa hombe sa mixowo yo hambana ngu lineneni. 4Txihari txo khata txi ti fana ni ngonyamo, kambe txi ti ni tibhapi ta digama; Ni to txi wonetela kala kuza tibhapi ta txona ti gwatelwa, se txi to gulwa, txi emiswa ha mafuni ngu minenge ya txona txi txi nga m'thu, txi ningwa mbilu ya m'thu.
5Ni to simama ni wonetela, ni wona txihari txa wumbidi txo fana ni txingwingwi, txi di emile ngu didhawa dimwedo, txi di lumile timbavhu tiraru; se txi to gelwa tiya: Khukha u kakatxulela nyama yayingi.
6Msana keto, ni to simama ni wonetela, ni wona tximwani txihari txo fana ni yingwe, txi di ni mune wa tibhapi ta sinyana makatani ka txona; kambe txi ti ti ni mune wa misungo, se txi to ningwa kufuma.
7Msana keto, ni toya masoni ngu kuwona siwoniso sa wusiku, ni to wona txihari txa wumune, txo thisa ngutu ni kuxamalisa, txa mtamo ngutu, txi nga ti ni makwasa a hombe a tisimbi; txona txi ti ti khadamula ni kuphatulela, txi ganyatela ngu mikondo asile si nga tisala; txi ti hambana ni sotshe sihari sile si nga khata si humelela na txi si se vaho txona, kambe txi ti ni digumi da titxheho. 8Se ni txi nga di ni wonetela titxheho eto, ni to wona limwani la lidotho li txi huma ngu hagari ka timwani, masoni ka tile tiraru to khata di nga dulwa; se ka litxheho e lo ku ti ni maso o fana niya m'thu, ni txisofu txi nga ti womba-womba mapswi o guleka ngutu.
Txiwoniso txa Txizimu
9Ani ni to simama ni wona, an'ze kuza ku txi vekwa situlu sa wukoma, se didhota da kale di to khalahatshi; syambalo sa dona i ti so basa kufana ni hunguva, ni misisi ya msungo ka dona i ti yo basa kufana ni matoya o basa; txikhalo txakwe txa wukoma txi ti fana ni titshatsha ta mndilo, ni mathandani a txona ma ti fana ni dituro da mndilo. 10#Wona ni ka: Mtu. 20:12. Ku to huma mnambo wa mndilo ngu masoni kwakwe; vathu va magumi a mazana ve di thumela, ni magidi-gidi a vathu ma ti masoni ka dona; se ku to khalahatsha valamuli, se ku txi tulwa mabhuku.
11Sekoko ni to simama ni wona, ngu mhaka ya mpfumawulo wa mapswi a hombe ma nga wombwa ngu litxheho; ni to wonetela kala kuza txihari txi txi dawa, se mmidi wa txona wu gangelwa wu ningelwa ti to wuhiswa ngu mndilo.
12Kasi sile simwani sihari si to tekelwa wukoma; hambi keto, si to laphiselwa wutomi kala ka mbimo yokari.
13 # Wona ni ka: Mat. 24:30; 26:64; Mar. 13:26; 14:62; Luk. 21:27; Mtu. 1:7; 14:14. Ka txiwoniso txangu txa wusiku, ni to wona txo fana ni mwanana wa m'thu, a txi ta ngu ka marefu a nzumani; se a to tshuketela ka didhota dile da kale, eza e hoka hafuhi ka dona. 14#Wona ni ka: Mtu. 11:15. Se a to ningwa kufuma, ni wudhumo, ni mfumo, kasi ku votshe vathu, matiko, ni tidimi si mthumela; kufuma kwakwe ngu fuma ka kwa mbi gwita, kha ku na mbi pinda, kambe mfumo wakwe, ngu wona wokha wa kwa mbi khundumuswa.
Txhamuselo ya siwoniso
15Se ngu kwangu, ani Dhaniyeli, moya wangu wu to xaniseka mndani kwangu, ni siwoniso sangu si to ni xamalisa. 16Ni to tshuketa ka mmweyo wa vale va nga ti hafuhi, ni kombela kuziva ditshuri da totshe tiya. Se a to womba e ni zivisa txhamuselo ya tona tiya.
17Sihari siya sa hombe i ku mune, i mune wa vafumeli, va no maneka ha mafuni. 18#Wona ni ka: Mtu. 22:5. Kambe va sawuleki va Nyatxitimwi va na amukela mfumo, kambe va na lumbwa ngu mfumo ngu ha ku si gwitiko, ni kala kupinduka ni kala kupinduka.
19Sekoko ni to navela kuziva ditshuri madingano ni txihari txa wumune, txi nga ti hambani ni sotshe sihari, txo thisa ngutu, txa makwasa a simbi ni siyala sa txikete; txi sikotako kukhadamula ni kuphatulela, txi ganyetela si si salako ngu mikondo ya txona; 20se ni timhaka ta digumi da titxheho, ni txi txhehwana txi txi nga huma hagari ka tona, masoni ka txona ku nga wa tiraru, txitxhehwana txa kona txi ti ni maso, ni txisofu txo womba-womba mapswi o guleka ngutu, txo tsana kupinda vangana va txona. 21Ni to wonetela, ni wona litxheho lonelo li txi lwa ni vasawuleki, li va xula. 22Kala kuza di txita didhota da kale, se ku txi ta ningelwa wulamulo ka vasawuleki va Nyatxitimwi; kambe ku to hoka mbimo yi vasawuleki va nga amukela mfumo.
23A to womba ku khene:
Txihari txa wumune i mfumo wa wumune wa ha mafuni, wule wu no hambana ni yotshe mifumo; wu na khadamula otshe mafu, wu ganyatela ngu mikondo, ni kuphatulela. 24Se ngu ka titxheho tile ta digumi, ngu ka mfumo wonewo wawumwewo ku na emiswa digumi da vafumeli; msana ka kwawe ku na emiswa mmwani, wule a no hambana ni vale vo khata, e wisa vafumeli vararu. 25Se a na womba mapswi o wukela Nyatxitimwi, e hangalasa vasawuleki va Nyatxitimwi, kambe a na phemberusa timbimo ni milayo; vasawuleki va na ningelwa manzani kwakwe ngu mbimo yokari, ni timbimo, ni hafu ya mbimo. 26Aniko wulamuli wu na tsana, se vona va na teka mfumo wakwe, va txi wu khundumusa ni ku wu hangalasa do gwita. 27Se mfumo, ni mtamo, ni wuhombe wa mifumo hahatshi ka yotshe nzuma si na ningelwa ka vathu vo sawuleka va Nyatxitimwi; mfumo wawe mfumo wa kwa mbi guma, ni yotshe mitamo yi na mthumela ni ku muengisa.
28Txiwoniso txi gwitete hawa, se ngu kwangu ani Dhaniyeli, mapimo angu ma to ni xamalisa ngutu, ni khohe yangu yi to txitxa; aniko ni to veka timhaka keto mbiluni kwangu.
Currently Selected:
Dhaniyeli 7: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.