Dhaniyeli 8
8
Txiwoniso txa hamba ni mabhongwe
1Ngu dilembe da wuraru da kufuma ka mfumeli Bhelixazari, ani Dhaniyeli ni to wona txiwoniso, msana ka txile ni nga txi wona do khata. 2Se ni to wona ka txiwoniso, (ni wona ku txi manheka, ti to ani ni ti didhoropani ka Xuxani, ditikoni ka Elame), ni to wona koko ka txiwoniso, ti to ni ti hafuhi ni mnambo wa Ulayi. 3Se ni to gula maso angu ni wona, se ni wona hamba yile yi nga ti ni titxheho timbidi, yi nga ti ti masoni ka mnambo; se titxheho tile ta timbidi ti ti laphile, kambe limwelo li ti laphile ngutu kupinda limwani; aniko lile lo lapha ngutu li to mila ngu msana ka lile lo koma. 4Ni to wona ti to hamba yi dhinela kukomba mswa-ditambo, ni wuphemba, ni wulambwe; kambe ku si na txihari ni txa tximwetxo txo tshuketa hafuhi ka yona, hambi m'thu wo dingana kuhuluka ka hamba; yona yi ti maha madingano ni kuranda ka yona, kambe yi ti ti kulisa.
5Se ni txi ngadi ni yi wonisisa, ni to wona mabhongwe a txi ta ngu didhawa da mswa-ditambo, e tshawunyeta txitimwi ka dotshe ditiko, kambe asi kandi hahatshi; se mabhongwe wule a ti ni litxheho la hombe ngu hagari ka maso. 6Se a toya ka hamba yile ya titxheho timbidi, ayile ani ni nga ti yi woni masoni ka mnambo; se a to tutuma ngu mtamo wakwe wotshe. 7Se ni to wona mabhongwe a txi hoka hafuhi ka hamba, a di henyile ngutu; se a to dhina hamba e funya titxheho ta yona ta timbidi, kambe hamba yi si ngani mtamo wo emisana nayo; se mabhongwe a to wisa hamba hahatshi, e yi kandetela ngu sitsendo; kha kwa maneka ni wammweyo wo hulukisa hamba ka mabhongwe. 8Aniko mabhongwe a to tikulisa ngutu ta tinene; kambe a di ngadi mtamoni kwakwe ka hombe, litxheho lile la hombe li to funywa; se kumila mune wa tona ka wukhalo wa lona, ta hombe ni tona, ti kula ti di rendekete ka mune wa mimoya ya nzumani.
9Se ka limwelo la tona ku to mila txitxhehwana, txi kula ngutu, txi rendekela wulambwe, ni wutxani, ni ditikoni ko tshura. 10Se litxheho li to kula kala ku li txi hoka ka mabutho a nzumani; se mabutho okari, ni a tinyeleti, li to ma wisa hahatshi, li txi ma kandetela. 11Se li li to ti tikulisa kala ka mthangeli wa dibutho; li mu tekela mphaxo wo hiswa wa ditshiku ni ditshiku, li wisa hahatshi wukhalo wakwe wo sawuleka. 12Se dibutho di to ningelwa ka lona, kumweko ni mphaxo wa ditshiku ni ditshiku, ngu mhaka ya si hambunyeto; se li to wisa ditshuri ha mafuni; li humelela ka mithumo ya lona.
13Msana keto, ni to pfa msawuleki wokari a txi womba-womba; se mmwani msawuleki a to khene ka wule a nga ti womba-womba:
Txi na simama kala mbimo muni txiwoniso txa mphaxo wa ditshiku ni ditshiku, ni txa sihambunyeto si si onhako, kasiku kuningelwa wukhalo wo sawuleka, ni dibutho, si txi kandetelwa, kani?
14Se a to khene kwangu:
Kala 2.300 wa mixo ni minova, se wukhalo wo sawuleka wu na sawulekiswa.
Ngelozi Gabriyele yi txhamusela txiwoniso
15Se ku to maheka taku, mbimo yile ani Dhaniyeli ni nga wona txiwoniso txiya, ni to lava ku txi pfisisa, se ku to woneka txo fana ni m'thu txi di masoni kwangu. 16Se ni to pfa dipswi da m'thu mabambe ka mnambo wa Ulayi, di nga kwangula di txi kha dona:
Gabriyele, txhamusela ka m'thu wuwa txiwoniso.
17Aniko a to ta hafuhi ni ha ni nga ti kona, se a txi ngadi a txi ta ni to wa ngu khohe yangu ngu kuthava; kambe ene a to khene kwangu:
Pfisisa awe mwanana wa m'thu, nguko txiwoniso txiya txi na tatiseka ngu mbimo yo gwita. 18Se a txi nga txi womba-womba ni nani, ni to wa hahatshi ngu khohe yangu, ni tsivala; ene koko a to ni ñola e ni emisa. 19Se a to khene:
Wona, ni na kuzivisa ti ti no humelela magwito ka mbimo ya kuhenya; nguko txiwoniso txi na tatiseka ngu mbimo yo emiselwa ya magwito. 20Hamba yile u nga yi wona ya titxheho timbidi, mbafumeli va Medhiya ni va Persiya; 21Aniko mabhongwe wa matoya ngutu i mfumeli wa Gresiya; se litxheho la hombe li li ku hagari ka maso akwe, mfumeli wo khata; 22kufunywa ka litxheho, ni kumila ka mune wa titxheho ka wukhalo wa lona, ti txhamusela ku, ku na wuswa mune wa mifumo ya ditikoni kumweko, kambe i si nga ngu mtamo wa dona. 23Kambe magwito ka kufuma kwakwe, mbimo yi vaonhi va no heta kufuma, ku na huma mfumeli wa khohe yo thisa, wa wutxhari wo ziva ngutu kutxhamusela sihunja. 24Se mtamo wakwe wu na tsana, na i si nga ngu mtamo wakwe apune; kambe a na haxula ngu kuxamalisa, e bhindula e maha kuranda kwakwe; a na lovisa tindena ni ditiko do sawuleka. 25Se ngu wuzivi wakwe kambe, a na humelelisa wukanganyisi manza kwakwe, se mbiluni kwakwe a na tikulisa, ngu mhaka ya kuthutha a na lovisa votala e wukela mthangeli wa vathangeli, kambe a na funywa na i si nga ngu diwoko da m'thu.
26Se txiwoniso txa mixo ni txa minova, txile txi nga wombwa, nja ditshuri; awe koko, lema txiwoniso, nguko msana ka masiku amangi txi na hetiseka.
27Se ani Dhaniyeli, ni to guma mtamo, ni lwala masiku okari; sekoko ni to wuka ni maha mithumo ya mfumeli; kambe ni xamalisilwe ngu mhaka ya txiwoniso, aniko ku si nga ni m'thu wu a txi pfisisako.
Currently Selected:
Dhaniyeli 8: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.