Dhewuteronome 1
1
Kuwombawomba ko Khata ka Mosi
(1:1--4:43)
Dipswi do thanga
1Aawa, mapswi ale Mosi a nga xawutela ka votshe va ka Israyeli, mtxhatuko ka Jordhani, txiwulani, ka libala li ku masoni ka Sufe, ngu hagari ka Parani, ni Tofela, ni Labhani, ni Hazerote, ni Dhizahabhi. 2Mnava wa digumi da masiku ni dimwedo a kutsimbila ngu nzila ya mmangoni ka Seyiri, kukhukhela Horebhi kala Kadhesi-Bharineya.
3Se ku to maheka taku, ka dilembe da mune wa magumi, ka ditshiku do khata ka mtxima wa digumi ni wumwewo, Mosi a wombile ka vanana va ka Israyeli totshe ti Mkoma a nga mleleta, kasi ku e va gela, 4#Wona ni ka: Mit. 21:31-35. atiya ti mahekile msana ka kuva a di xute Sihoni, mfumeli wa Vaamori, avale va nga ti akile Hesibhoni, ni Oge, mfumeli wa Bhasani, a nga ti akile Axitaroti, ni Edreyi.
5Ngu mtxhatuko ka Jordhani, ditikoni ka Mowabhi, Mosi a to khata kuxawutela mlayo wuwa, a txi khene:
6“Mkoma, Txizimu txathu, a wombawombile mmangoni ka Horebhi, a txi khene: Anu mi zumbile ngutu ka wuwa mmango.” 7Tshumelani mi txi tsula mmangoni ka Vaamori, ni ka votshe avale va nga aka hafuhi kwawe, ni libalani ni mmangoni ni mkovani, ni wulambwe, ni lineneni, ni ditikoni ka Vakanana, ni Libhanoni, kala mnamboni wa hombe, i ku mnambo wa Ewufrate. 8Ngu diya ditiko di ani ni nga mi ninga; wulelani ka dona mi txi di fuma, adi Mkoma, ngu txixambanyo, a nga thembisa ku di ningela ka vatate vanu, Abrahamu, Isaake ni Jakobe, se ngu msana kwawe di na va i di da situkulwana sawe.
Mosi e sawula vavhuni
(Eksodha 18:13-26)
9Ka yoneyo mbimo, ani ni mi gete ni txi khani:
“Nokha, kha ni sikoti ku mi thangela motshe. 10Mkoma, Txizimu txanu, a mi andisile ti to nyamsi, se mi tate nga tinyeleti ta nzumani! 11Mkoma, Txizimu txa vatate vanu, a na mi andise, amu ka digumi da mazana, a txi mi katekisa, nga ti a nga mi thembisisa tona! 12Ni nga sikotisa kutxani, ani nokha, kurwala kunemela kwanu, ni mirwalo yanu, ni timhaka tanu kani? 13Sawulani vavamna va wuzivi, ni wutxhari, va mapimo, va zivanekako, hagari ka nyumba ni nyumba, amuwa kwanu, se ani ni na va emisa veva vathangeli vanu.”
14Sekoko anu mi ni xamute mi txi khanu:
“Eto u ti wombako ndinene!” 15Ni tekile vathangeli va tihunzu tanu, vathu vo ziva, ni mapimo, ni txi va maha vathangeli vanu: Vathangeli va 1.000, vathangeli va dizana, vathangeli va mtxhanu wa magumi, ni vathangeli va digumi, ni vaxayisi va tihunzu tanu. 16Ka mbimo yoneyo, ni leletete ka vathangeli vanu ni txi khani: Engisani timhaka ta vananu, mi txi lamula ngu kululama mhaka ya m'thu ni mwanawe, mwendo ni mluveli wu a hanyako nayo. 17Mi nga yeni ngu khohe kulamulani kwanu: Mi na engisa ngu kufana mhaka ya wam'dotho ni mhaka ya wa hombe. Mi nga thaveni txiemo txa m'thu, nguko kulamula kuta ngu ka Txizimu. Ngako mhaka i di yo karata kwanu, yi tiseni kwangu, kasi ku ani ni txi ta yi engisisa.
18Ka mbimo yoneyo ani ni mi leletete toshe ti mi ku ni fanelo ya ku ti maha.
Tixoli ta Vaisrayeli ditikoni ka Kanana
(Mitengo 13:1-33)
19Sekoko hi to khukha ngu Horebhi, hi tshawunyeta txiwula txile txa hombe txo thisa.
Anu mi ti wonil, hi tsimbite ngu nzila ya mmango wa Vaamori, nga ti a nga leletisa tona Mkoma, Txizimu txathu; hi txi hoka Kadhesi-Bharneya. 20Sekoko ani, ni mi gete ni txi khani: Mi hokile hafuhi ka mmango wa Vaamori, awu Mkoma, Txizumu txathu, a no hininga. 21Wona Mkoma, Txizimu txako, a ku ningile ditiko diya: Kwela u txi ya di teka, nga ti Mkoma, Txizimu txa vatate vako, a nga kuleletisa tona. U nga ve ni dizowa, kambe u nga dhudhumele. 22Sekoko, anu motshenu, mi tile kwangu mi txi ta womba tiya: A hi rumeni vathu masoni kwathu, kasi ku ya xola ditiko, ni ti to va txi ta hi gela ngu mhaka ya nzila yi hi no tsimbila ngu yona, ni didhoropa di hi no wulela ka dona. 23Ma woneloyo ma to ni tsakisa, aha ni nga sawula hagari kwanu digumi da majaha ni mambidi, m'thu mmweyo ngu nyumba ni nyumba. 24Vona va to khukha ve kwela mmango, ve tsimbila va txi ya hoka mkovani ka Esikole, aha va nga ya di xola dona ditikodo. 25Va to teka mihando ya dona ditikodo, ve wuya nayo kwathu. Aha va nga ta xawutela va txi kha vona: “Ditiko di Mkoma Txizimu txathu a hi ningako, dinene ngutu.”
26Kambe anu kha ma ti lava kukwela mi txi ya ka dona, aniko mi to tereka, mi kaneta sileleto sa Mkoma, Txizimu txanu. 27Se mi to ngungurukela, mi di mu matendani kwanu, mi txi khanu: Mkoma wa hi venga! A hi humisile ditikoni ka Egipta, kasi ku ta hi ningela manzani ka Vaamori ve hi lovisa! 28Hi na kwela hi txiya hani kani? Vanathu va hi wite misana, ngu ku kha vona: Vathu va kona mbavangi ngutu kupinda athu, kambe mba nyasihakate, madhoropa a kona nga hombe, ma ku ni maguma o guleka kala nzumani. Kambe koneyo hi woni ni vanana va Anaki.
29Konako ani ni mi gete ni txi khani: “Mi nga wikeni misana, kambe mi nga telweni ngu dizowa ngu mhaka yawe! 30Mkoma, Txizimu txathu, ngene a no ya masoni kwanu, ene a na mi lwela, kufana ni tile a nga ti maha ngu nganu ditikoni da Egipta, khoheni kwanu. 31#Wona ni ka: Mith. 13:18. Hambi ni txiwulani, mi ti woni ti to Mkoma, Txizimu txako, a mi belekile, nga ti m'thu a belekisako tona mwanana wakwe, ka yotshe nzila yi mi nga tsimbila ngu yona, kala mi hoka ka wuwa wukhalo.”
32Hambi keto kha mi mthembi Mkoma, Txizimu txanu, 33awule a nga thangela masoni, a txi mi lavela wukhalo, kasi ku mi txi gova ka wona, ni wusiku a txi mi woninga ngu mndilo, ti to mi mana kuwona nzila yi mi fanelako kutsimbila ngu yona, ni mitshikari a txi mi komba nzila ngu direfu.
Txizimu txa tsayisa va ka Israyeli
(Mitengo 14:26-45)
34 Mkoma koko, a di pfite diguwa da mapswi anu, a to henya, e xambanya a txi khene: 35Ni wammweyo m'thu wa liveleko liya lo biha timbilu, kha na mbi wona ditiko da dinene, adile ni nga thembisa ngu kuxambanya ti to ni na di ningela ka vatate vanu, 36hahanze ka Kalebhi, mwana Jofone, ene a na di wona. Ni na mninga ditiko di a nga pinda ngu ka dona, kumweko ni vanana vakwe, nguko ene a ti karatile e londeta nzila ya Mkoma, asi kanakani.
37Ngu mhaka yanu, Mkoma a henyile, hambi ni nani a ni henyete, a txi khene: “Nanawe khu na mbi wulela ka dona. 38Joxuwa m'vhuneteli wako, mwana Nune, ngene a no ya wulela ka dona. Mtsanise a na maha ti to Israyeli e di teka, di txi maha thomba yawe.
39Ni vanana vanu, avale mi nga txi khanu va na ñolwa ve maha tikhumbi, vanana vanu avale va sinziko kuziva kuhambanisa ta tinene ni to biha, ngu vona va no wulela kona; ani ni na va ninga dona ditikodo, va txi di fuma. 40Kambe anu, tshumelani, mi tsula txiwulani, ngu nzila ya linene lo Bhilivila.”
41Sekoko anu mi ni xamute mi txi khanu: “Hi onhile ka Mkoma. A hi kweleni hi txi yalwa, nga ti a nga leletisa tona Mkoma, Txizimu txathu.” Mmwani ni mmwani hagari kwanu, a to xoma matxhari akwe a yimbi, ngu kupimisa ti to ku na hehuka kukwela mmango. 42Sekoko, Mkoma a ti khene kwangu: “Va gele u txi khawe: Mi nga kweleni, kambe mi nga lweni, nguko mi nga ya xulwa ngu valala vanu, nguko ani kha ni na mbi maneka hagari kwanu.” 43Kambe ni mi gete ngu toneto. Hambi keto, kha ma ni engisa, mi to kaneta kuleleta ka Mkoma: Mi kwela mmango ngu txikanyiso. 44Se Vaamori, vale va nga aka txitimwi ka mmango, va to huma konako va txi mi hingeta, ve mi tutumisa nga tinombe, aha va nga mi khozisa kukhukhela Seyiri, kala Horima. 45Mi to tshumela mi txi dila masoni ka Mkoma; aniko Mkoma kha nga engisa tihuwa tanu, kambe kha nga komba kukhatala ngu nganu.
46Ngu mhaka ya toneto, mi zumbile masiku amangi kona Kadhesi, ka ona masiku ale mi nga maneka koneyo.
Currently Selected:
Dhewuteronome 1: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.