Mitengo 36
36
Thomba ya vavasikati va wukati
1Se vathangeli va vatate va liveleko la vanana va ka Gileyadhi, mwana Makiri, mwana Manasi, va mimwaya ya vanana va ka Josefa, va to ta ka Mosi, ni masoni ka vahombe, va i ku vathangeli va vatate va vanana va ka Israyeli.
2 # Wona ni ka: Mit. 27:7. Se va to kha vona: Mkoma a rumile nyamne wangu kuningela ditiko diya, kuva thomba ya vanana va ka Israyeli; niku nyamne wangu a rumilwe ngu Mkoma taku, thomba ya mwanathu Zelofeyadhi, yi ningelwa ka vanana vakwe vamahorana. 3Se ngako va txi tekana ni vokari i ku vanana va timwani tihunzu ta vanana va ka Israyeli, thomba yawe yi na hungulwa ka thomba ya vatate vathu, yi engetelwa ka thomba ya lihunzu lile va no tekana nalo; ngu mamahelo awa, ku na hunguleka thomba yathu. 4Kambe ku txi hoka Dilembe da M'buso wa Hombe wa vanana va ka Israyeli, thomba yawe yi engetelwa ka thomba ya lihunzu la vale va no tekana navo; ngu mamahelo awa thomba yawe yi na thaviswa ka thomba ya vatate vathu.
5Sekoko Mosi a to ruma vanana va ka Israyeli, madingano ni kuruma ka Mkoma, a txi khene:
Lihunzu la vanana va ka Josefa, li womba-womba to pfala. 6Dipswi di Mkoma a nga ruma ngu mhaka ya vanana vamahorana a Zelofeyadhi, a txi khene: Va nave vasikati va ni wihi wu a no va wona a txi va navela, va txi tekwa ka mwaya wa lihunzu la tate vawe. 7Ngu toneto, thomba ya vanana va ka Israyeli, kha yi na mbi pinda yiya ka lihunzu ni lihunzu; nguko vanana va ka Israyeli va na mana thomba ya lihunzu la vatate vawe. 8Se ni wihi mwanana wa dihorana a no mana thomba yokari ya lihunzu la vanana va ka Israyeli, a na tekana ni wokari wa liveleko la lihunzu la tate wakwe; kasi ku vanana va ka Israyeli, ve lumbwa ngu tithomba ta vatate vawe. 9Ngu mamahelo eyo, thomba kha yi na mbi pinda ka lihunzu limwelo yiya ka limwani; nguko tihunzu ta vanana va ka Israyeli, ti na mana tithomba ta tona.
10Vanana vamahorana va Zelofeyadhi, va mahisile tona ti Mkoma a nga rumisa tona ka Mosi. 11Makila, ni Tiriza, ni Hogila, ni Milika, ni Nowa, i ku vanana vamahorana va Zelofeyadhi, va tekani ni vanana va vatatanyani vawe. 12Va vile vasikati va va ka Manasi, mwana Josefa; ngu kumaha keto, thomba yawe yi zumbile ka lihunzu la mwaya wa tate wawe.
13Ayi ngu yona milayo ni sileleto si Mkoma a nga ruma ngu dianza da Mosi ka vanana va ka Israyeli, libalani ka va ka Mowabhi, hafuhi ni Jordhani, ka Jeriko.
Currently Selected:
Mitengo 36: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.