Mitengo 35
35
Madhoropa a va ka Levhi
1Se Mkoma a to womba ka Mosi, libalani ka Vamowabhi, hafuhi ni Jordhani ka Jeriko, a txi khene:
2 # Wona ni ka: Jox. 21:1-42. Ruma vanana va ka Israyeli taku, ka makhalo awa ma no va thomba yawe, ningani Valevhi madhoropa awa va no zumba ka ona; mi va wilela ni ko dyisa kona sifuyo sawe, hafuhi kwawe. 3Madhoropa awa, va na zumba ka ona, se madhawani ka kona, ma na maha a sifuyo sawe, ni ka thomba yawe, ni sihari sawe sotshe. 4Se madhawa a madhoropa awa mi no ma ningela ka va ka Levhi, kukhukhela ka diguma da didhoropa kuya hahanze, ngo dingana 1.000 wa mikono. 5Se ngu hahanze ka didhoropa, ngu didhawa da wutxani, mi na pima 2.000 wa mikono, se ka didhawa da wulambwe 2.000 wa mikono, ka didhawa da mswa ditambo, 2.000 wa mikono, ka didhawa da wuphemba 2.000 wa mikono, ni didhoropa hagari.
6Ka madhoropa ale koko mi no ma ningela ka Valevhi, ku nava ni mtxhanu wa madhoropa ni dimwedo a wuthavelo, aawa mi no ningela, kasi ku awu a dayako e zumba ka ona; mi na va ninga kambe mune wa magumi ni mambidi a madhoropa. 7Otshe madhoropa awa mi no ninga Valevhi, ma nava mune wa magumi ni mtxhanu ni mararu a madhoropa, kupata ni wudyiselo wa kona. 8Se madhoropa awa mi no ningela ngu ka thomba ya vanana va ka Israyeli, ka va va ku ni sasingi ku na tekwa sasingi, se ka vale va ku ni sa sidotho, ku na tekwa sa sidotho; mmwani ni mmwani a na ningela madhoropa akwe, ka va ka Levhi, madingano ni thomba yakwe, yi a ku nayo.
Madhoropa o thavela ka ona
(Dhewuteronome 19:1-13; Joxuwa 20:1-9)
9 Mkoma a to womba kambe ka Mosi, a txi khene: 10Gela vanana va ka Israyeli u txi khawe:
Ngako mi txi txhatuka Jordhani, mi wulela ka ditiko da Kanana, 11#Wona ni ka: Jox. 20:1-9. mahani ti to madhoropa meva manzani kwanu, madhoropa a wuthavelo, kasi kuamukelwa ka ona, wule a no daya wokari ngu kuphazama. 12Madhoropa awa, awu a no daya m'thu ngu phango a na ya sisala ka ona, a txi thava vaphoteli, kasi ku asi fi, eza e lamulwa, masoni ka msengeletano. 13Se ka madhoropa ale mi no ma ningela, ku nava ni mtxhanu wa madhoropa ni dimwedo, aawa anu mi no thavela ka ona. 14Mi na ningela madhoropa mararu a mtxhatuko ka Jordhani, ni madhoropa mararu a ditiko da Kanana; kasi ku ma txi maha madhoropa a wuthavelo. 15Madhoropa awa a mtxhanu ni dimwedo, va na thavela ka ona vanana va ka Israyeli, ni mluveli, ni va va hanyako hagari kwawe, kasi ku mmwani ni mmwani wawe, wu a no daya m'thu ngu phango, eya sisala kona.
16Ngako a txi dayisa m'thu ngu simbi, a txi fa, m'dayi ngu ditshuri; m'dayi a nafa. 17Mwendo a txi dayisa m'thu ngu dirigwi, do dingana ku a txifa, se a txifa, m'dayi, ngu ditshuri; m'dayi a nafa. 18Mwendo a txi dayisa m'thu ngu donga, yi a nova a di nayo manzani kwakwe, e m'dayisa a txifa, ngu ditshuri m'dayi; a fanete kudawa nene, a txifa. 19Mphoteli wa mnoha a na daya apune m'dayi, ngu ditshiku di a mmanako.
20Se m'thu a txi retha m'thu ngu mhaka ya ku mnyenya, mwendo kurinza txo maha txi m'daya, 21mwendo a txi peka mlala wakwe ngu txibhakela, se a txifa, ngu ditshuri m'dayi a nafa, nguko m'dayi, se mphoteli wa mnoha, a na daya m'dayi, ditshiku di a no mmana.
22Aniko ngako a txi retha m'thu ngu phazamo, awu i singako mlala wakwe, mwendo ku mrinza txo maha ngu phazamo; 23mwendo a txi rinza dirigwi na asi muwoni, do dingana ku m'daya, se atxi fa, na i si nga mlala wakwe, mwendo kulava ku m'daya, 24sekoko msengeletano wu na lamula hagari ka wule a nga dayiswa ni ka mphoteli, madingano ni milayo yiya. 25Se msengeletano wu na hulukisa m'dayi manzani a mphoteli wa mnoha, kambe msengeletano wu na mtshumeta eya ka didhoropa da wuthavelo, amu a nga ti tutumete kona; eya zumba kona an'ze a txifa mphaxeli wa hombe, awu va nga mtota mafura o sawuleka. 26Kambe ngako m'dayi a txi thuka e huma ka mihingano ya didhoropa da wuthavelo wakwe, emo a nga ti tutumete kona, 27se e manwa ngu mphoteli wa mnoha mihinganoni ka didhoropa da wuthavelo wakwe, ngako mphoteli wa mnoha a txi daya m'dayi, kha na mbi mana mnandu. 28Nguko m'dayi a fanela kuzumba didhoropani ka wuthavelo wakwe, an'ze kuza a txifa mphaxeli wa hombe; aniko msana ka kufa ka mphaxeli wa hombe, m'dayi a nga tshumela e tsula ditikoni kwakwe. 29Timhaka tiya ti nava i di mthetho wo dingana tiveleko tanu, kotshe amu mi no ya zumba kona.
30 # Wona ni ka: Dhewut. 17:6; 19:15. Ni wihi wu a no daya m'thu, madingano ni kuwomba ka tifakazi, va na daya m'dayi; aniko fakazi yimweyo dwe kha yi na kufakaza eza e dawa m'thu, 31kambe kha mi na mbi amukela mhamba yo tsiveta#35:31 Mwendo: Muhefemulo. wutomi wa m'dayi, wu a ku ni mnandu wo dingana kudawa; ngu ditshuri a na dawa. 32Kambe mi nga amukeleni mhamba ya m'thu wule a nga zumba didhoropani ka wuthavelo, kasi kutshumela eya hanya ditikoni kwakwe, an'ze a txifa mphaxeli wa hombe. 33Ngu maha yeto, kha mi na mbi nyenyezisa ditiko di mi ku ka dona; nguko mnoha wa maha ditiko di nyenyeza; kambe ni wawumwewo mphaxo wa kuthavisa txionho, kha wu na mbi mahwa ngu mhaka ya ditiko, ngu mhaka ya mnoha wu wu no thekela ka dona, hahanze ka mnoha wa wule a nga theketa mnoha wa mmwani m'thu. 34Mi nga nyenyeziseni koko, ditiko di mi zumbako ka dona, adi ni no zumba ka dona; nguko ani Mkoma, ni zumba hagari ka vanana va ka Israyeli.
Currently Selected:
Mitengo 35: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.