Mitengo 34
34
Mihingano ya ditiko
1 Mkoma a to womba kambe ka Mosi, a txi khene: 2Gela vanana va ka Israyeli u txi khawe:
Ngako mi di wulete ditikoni ka Kanana, ditiko diya di na va thomba yanu: Ditiko da Kanana, madingano ni mihingano ya dona.
3Didhawa da wulambwe, di na khukhela ka txiwula txa Zini, kala ka mihingano ya Edhomi; se m'hingano wa wulambwe wu na khukhela magwito ka Linene la Mnyu, kala ka didhawa da wutxani. 4Muhingano wuwa, wu na horoloka kukhukhela wulambwe, mimangoni ka Akrabhime, kala Zini; wu na khukhela wulambwe ka Kadhesi-Bharineya; wu na khukhela Hasari-Adhara wu pinda ngu Azimoni; 5muhingano wuwa wu na horoloka kambe ngu Azimoni kala ka mnambo wa Egipta; wu txi ya gwitela ka didhawa da linene.
6Ngu didhawa da mswa-ditambo, mi na maha muhingano ngu Linene la Hombe; linene ngu wona muhingano wanu wa mswa-ditambo.
7Se muhingano wa ditiko danu, ngu didhawa da wuphemba ngu wuwa: Kukhukhela ka Linene la Hombe, kala ka mmango wa Hori. 8Kukhukhela mmangoni ka Hori, mi na veka muhingano wo wulela Hamati; wu txi gwitela Sedhadhi. 9Se muhingano wuwa wu na tsimbila kala Sifironi, wu txi ya gwitela Hasari-Enana; se awuwa wu na va muhingano wa wuphemba.
10Se muhingano wa didhawa da wutxani, mi na wu veka kukhukhela Hasari-Enana, kala Xefamu. 11Se muhingano wuwa, wu na khukhela Xefamu, kala Ribhila, didhawa da wutxani ka Ayini, wu ngirimela lidhongani ka Linene la Kinereta, ngu didhawa da wutxani. 12Kambe muhingano wuwa wu na kwitima wo londetela mnambo wa Jordhani, wu txi ya gwitela ka Linene la Mnyu;
adiya i nava ditiko danu, madingano ni mihingano yi yi di ranganyetako.
13 # Wona ni ka: Mit. 26:52-56; Jox. 14:1-5. Se Mosi a to gela vanana va ka Israyeli, a txi khene:
Adiya ngu dona ditiko di mi no di teka, diva thomba yanu, adi Mkoma a nga ruma ti to di ningelwa ka mtxhanu wa tihunzu ni mune, ni ka hafu ya lihunzu. 14Nguko lihunzu la vanana va Rubheni, ni lihunzu la vanana va Gadhi ti amukete; ni hafu ya lihunzu la vanana va Manasi di amukete thomba ya dona. 15Tihunzu timbidi ni hafu ya lihunzu, ti amukete thomba ya tona, mtxhatuko ka Jordhani, wa Jeriko, ngu didhawa da wutxani, ka wutxani.
Vathangeli va va zivako mihingano ya mafu
16 Mkoma a wombile kambe ka Mosi, a txi khene:
17Aawa ngu ona matina a vathu va va no phakela ditiko: Mphaxeli Eleyazari, ni Joxuwa, mwana Nuni. 18Ka lihunzu limwani ni limwani, mi na teka mthangeli mmweyo, awu a no vhuneta ka mthumo wo phakela ditiko, di maha thomba.
19Se matina a vathu va kona ngu awa: Ka lihunzu la ka Judha, i Kalebhi, mwana Jefoni. 20Ka lihunzu la vanana va Simiyoni, i Samiyela, mwana Amihudhi; 21ka lihunzu la ka Bhenjamini i Elidhadhe, mwana Kisiloni; 22ka lihunzu la vanana va Dhani, mthangeli i Bhuki, mwana Jogili; 23ka lihunzu la vanana va Manasi, vanana va ka Josefa, mthangeli i Haniyela, mwana Efodhi; 24ka lihunzu la vanana va Efrayime, mthangeli i Kemuweli, mwana Xifitana; 25ka lihunzu la vanana va Zebhuloni, mthangeli i Elisafani, mwana Parinaka; 26ka lihunzu la vanana va Isakara, mthangeli i Palatiyeli, mwana Azani; 27ka lihunzu la vanana va Azera, mthangeli i Ayihudhi, mwana Zelome; 28ka lihunzu la vanana va Nafitali; mthangeli i Pedhayeli, mwana Amiyudi.
29Avava ngu vona va Mkoma a nga va ruma tito, ve phakela thomba, ka vanana va ka Israyeli, ditikoni da Kanana.
Currently Selected:
Mitengo 34: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.