Dhewuteronome 11
11
Wuhombe wa Txizimu
1“U na randa koko Mkoma, Txizimu txako, u vekisa yotshe mbimo ati a nga kugela, milayo yakwe, sileleto sakwe, ni sirumo sakwe. 2Se nyamsi mi na tiziva tito, kha ni wombawombi ni vanana vanu, ava va si tiziviko, ni va va nga mbi ti wona, ati a nga gondisa Mkoma, Txizimu txanu, wuhombe wakwe, dianza dakwe do tsana, ni diwoko dakwe da mtamo; 3#Wona ni ka: Eks. 7:8--12:13. ni sikombiso sakwe, ni mithumo yakwe yi ene a nga yi maha ka Vaegipta, ni ka Faro, mfumeli wa Egipta, ni ka dotshe ditiko dakwe; 4#Wona ni ka: Eks. 14:28. ni ti ene a nga maha ka dibutho da yimbi ya Egipta, ni ka sikotxikani sawe, ni ka mahantxhi awe, ati a nga maha ta ku va bhwabhwamelisa lineneni ko Bhilivila, mbimo yi vona va nga txi mi hinga, ahawa Mkoma a nga va fuvisa, kala ni nyamsi; 5ni tiya ene a nga mi mahela txiwulani, kala kuza mi hoka ka wuwa wukhalo; 6#Wona ni ka: Mit. 16:31-32. ni ti Mkoma a nga maha ka Dhatani, ni ka Abhiramu, vanana va Eliyabhe, wa lihunzu la ka Rubheni; ahawa mafu ma nga asama txisofu txa ona ma txi va mita, kumweko ni mimwaya yawe, ni matenda awe, ni votshe vale va nga ti va londeta, hagari ka votshe va ka Israyeli. 7Maso anu ma woni yotshe mithumo ya hombe ayi Mkoma a nga yi maha.
Sikatekiso sa Ditiko da Txithembiso
8Ngu toneto, vekisani sotshe sirumo si ni mi leletako nyamsi, kasi ku mi mana mtamo wa kuwulela, mi teka ditiko di mi txhatukelako kuya di fuma. 9Kasiku mi txi andiselwa masiku anu ka ditiko di Mkoma a nga thembisa ngu txixambanyo, ti to a na di ningela ka vatate vanu ni vatukulu vawe, ditiko di di khulungako masi ni wulombe. 10Nguko ditiko di uyako ka dona, kuya di teka, kha di fanani ni di u nga huma ka dona, ditiko da Egipta, ahawa u nga ti phaya mbewu yako u txi theletela mati ngu mkondo wako, nga ti kumahwako amu ka thembwe. 11Ditiko di mi yako ka dona, kasi kuya di teka, ditiko di di ku ni mimango ni mikova, adi di nakaniswako ngu mati a kuwa ngu nzumani. 12Ditiko di Mkoma, Txizimu txako, a di xayisako; maso a Mkoma, Txizimu txako, ma wonetela dona yotshe mbimo, kukhukhela kukhatani, kala kugumani ka dilembe. 13Se ku na maheka taku, ngako ngu ditshuri mi txi vekisa sirumo siya nyamsi ni mi leletako, mi txi randa Mkoma, Txizimu txanu, ni ku mkhozela, ngu yotshe mbilu yanu, ni wotshe moya wanu, 14ni na wuyisa mati ka ditiko danu, a kuwa ngu mbimo yi yi lavekako, mati a wuxika ni mati a mbimo ya minyuko. Ngu toneto, u nga sikota kuelula fulaho yako, ni vhinya yako, ni mtona wako. 15Ni na ninga lihawu libalani ka sifuyo sako, se mi na dya mi khura. 16Ti woneleni timbiluni kwanu, mi si phazami, mi txi hambukiswa, mi ya khozela simwani sizimu, mi txi khizama masoni ka sona, 17nguko Mkoma a nga mi henyela e tsiva nzuma, ku siwi kambe mati, mafu ma si swi me mi ninga sakudya, se anu mi lova ngu kukuluveta ka ditiko da dinene, adi Mkoma a nga mi ninga dona.
18Mapswi awa angu koko, ma veketeni timbiluni kwanu ni mimoyani kwanu, mi txi ma sugelela mawokoni kwanu, me maha txialakanyiso, ma txi maha txikombiso hagari ka timbanza tanu. 19Ma gondiseni ka vanana vanu, mi womba-womba ngu ona mi di khalahatshile mitini kwanu, ni kungako mi txi tsimbila tinzilani kwanu, kungako mi di otete ni kungako mi di wukile. 20#Wona ni ka: Dhewut. 6:6-9. Awe u na ma bhala aha ka misasimo ya nyumba yako, ni ha matimbani kwako, 21kasi ku masiku anu ni masiku a vanana vanu ma txi anda, ka ditiko diya Mkoma a nga xambanya ku di ningela ka vatate vanu, di txi anda kufana ni kuanda ka nzuma yi yi ku txitimwi ka mafu.
22Nguko ngako mi txi vekisa kwati sotshe sirumo si nyamsi ni mi leletako, mi si londeta, mi txi randa Mkoma, Txizimu txanu, mi tsimbila ngu totshe tinzila takwe, na mi txi ti ningetetela kwakwe, 23kambe Mkoma a na tutumisa masoni kwanu yotshe mifumoyo, na nanu mi na xula mifumo ya hombe ni ya mtamo kupinda anu. 24Otshe makhalo ale mikondo yanu yi no ma kanda, ma nava i di anu. Ditiko danu di na khukhela txiwulani ka Libhanoni, ni kukhukhela mnamboni ka Ewufrate, kala lineneni ka mswa-ditambo. 25#Wona ni ka: Jox. 1:3-5. Kha ku na mbi va ni m'thu wo mi tsanela; Mkoma, Txizimu txanu, a na thela dizowa ni kudhudhumela ngu mhaka yanu, ka vathu va dotshe ditiko di mi no wulela ka dona, nga ti ene a nga mi gela.
Txikatekiso ni txiruko
26Wonani, nyamsi na veka txikatekiso ni txiruko masoni kwanu: 27Txikatekiso, ngako mi txi xayisa sirumo sa Mkoma, Txizimu txanu, asi nyamsi ni mi leletako; 28kambe mi na va txiruko, ngako mi si xayisi sirumo sa Mkoma, Txizimu txanu, ni kungako mi txi huma ka nzila yi ni mi kombako nyamsi, mi txi londisa simwani sizimu, sile mi si si ziviko. 29#Wona ni ka: Dhewut. 27:11-14; Jox. 8:33-35. Se ku na maheka tito, mbimo yi Mkoma, Txizimu txako, a no ku wuleta ka ditiko di uyako ka dona kuya di teka, u na ya huwelela txikatekiso txitimwi ka mmango wa Gerizimi, se txiruko u na ya txi huwelela txitimwi ka mmango wa Ebhali. 30Ina mimango yiya kha yi maneki mtxhatuko ka Jordhani, ngu msana ka nzila ya mswa-ditambo, ditikoni ka Vakanana, avale va nga aka kona Arabhe, masoni ka Giligali, hafuhi ni mikusu ya More kani?
31Nguko mi na txhatuka Jordhani mi ya wulela ni kuteka ditiko di Mkoma, Txizimu txanu, a mi ningako; se di na mi lumba, mi aka ka dona. 32Ngu mhaka yeto koko, khatalelani kuxayisa yotshe milayo ni sotshe sileleto si nyamsi ni mi ningako.”
Currently Selected:
Dhewuteronome 11: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.