Dhewuteronome 13
13
1Ngako ku txi humelela hagari kwanu, mprofeti, mwendo mlori a txi mi komba txikombiso mwendo txidiwukiso, 2“se kumaheka txikombiswetxo mwendo txidiwukiso txile a nga nga txi womba a txi khene: A hi londeteni simwani sizimu, sile u si si ziviko, hi txi si thumela,” 3u nga engise mapswi a mprofeti eneyo mwendo mlori eneyo, nguko Mkoma, Txizimu txanu, ngene a mi dukako, kasi kuziva ti to ina ngu ditshuri ma randa Mkoma, Txizimu txanu, ngu yotshe mbilu yanu, ni wotshe moya wanu.
4Mi na londisa Mkoma, Txizimu txanu, mi txi mthava, mi vekisa sirumo sakwe, mi txi engisa dipswi dakwe, mi txi thumela ene, mi namarela kwakwe.
5Se mprofeti wule mwendo mlori, a fanete kudawa, nguko a kujetete vathu kuhambana ni Mkoma, Txizimu txanu, awu a nga mi humisa ditikoni ka Egipta, a txi mi hulukisa ka nyumba ya wukhumbi; kasi ku mi hambukisa ka nzila yi Mkoma, Txizimu txanu, a nga mi leleta, kasi ku mi tsimbila ngu yona; ngu kumaha keto, mi na thavisa wubihi hagari kwanu.
6Ngako mwananu, awu i ku mwanana wa mame wako, mwendo mwanana wako wa mfana, mwendo wa dihorana, mwendo msikati wa mbilu yako, mwendo mndoni wako wo randeka ngutu, a txi lava ku ku kujetela ngu malengo, a txi khene: “He tsimbile hi txi ya khozela simwani sizimu,” sizimu sile awe ni vatate vako mi nga mbi si ziva, 7hagari ka sizimu sa vathu vale i ku vaakelani vanu, va hafuhi mwendo va kule ni nawe, kukhukhela magwito ka mafu kala kumwani magwito, 8u nga tumelelani nayo, hambi ku mu engisa, kambe maso ako ma nga mtsetse; u nga ve ni wumbilu nayo, kambe u nga msise, 9aniko kha ditshuri u fanete ku m'daya; dianza dako ngu dona di no khata di txi mpeka, kasi ku m'daya, se ngu msana manza a votshe vathu. 10Se u na m'balisela ngu marigwi kala a txi fa, nguko a duketile ku ku hambukisa ka Mkoma, Txizimu txako, awu a nga kuhumisa ditikoni ka Egipta, amu ka nyumba ya wukhumbi. 11Kasi ku votshe va ka Israyeli ve tiengisa, ve thava, ni ti to va siswi ve maha to biha, to nga toneto hagari kwanu.
12Ngako u txi engisa kuwomba ti to ka dimwani didhoropa ka ale Mkoma, Txizimu txako, a nga kuninga kuzumba ka ona, 13vathu vokari, vanana va Beliyali, va humile hagari kwanu, va timetile vaaki va didhoropani kwawe, va txi kha vona: “He tsimbileni hi ya khozela simwani sizimu,” sizimu sile mi si si ziviko, 14sekoko u fanete kuxolisisa, u wonisisa, ni ku wotisisa kha kwati. Ngako i ti ditshuri, ngako ti di tsani ti to mhakeyo yo biha yi mahekile hagari kwanu, 15sekoko u na daya ngu ditxhari vaaki va didhoropa donedo, ni dona didhoropa di khundumusele, kumweko ni sotshe sile si ku ka dona, kumweko ni sihari sawe sa sifuyo. 16Se u na tshanganisa yotshe thomba yawe hagari ka mthanda wa didhoropa, u hisa dotshe didhoropa, ni yotshe thomba ya dona, sotsheso u hisela Mkoma, Txizimu txako, u si siyi ni txa tximwetxo; se di na va dirumbi yotshe mbimo, kha di na mbiswa di aketwa. 17Kambe ni txa tximwetxo ka sile i ku so yila, kha kulaveki txi maneka manzani kwako, kasi ku Mkoma a txi boxa dikhulo da txiviti txakwe, a txi kupfela wusiwana, a txi va ni wumbilu ngu ngawe, a txi kuandisa, nga ti a nga xambanya ka vatate vako, 18ngako u txi engisa dipswi da Mkoma, Txizimu txako, u vekisa sotshe sirumo sakwe, asi nyamsi ni ku leletako, u maha ti i ku to lulama masoni ka Mkoma, Txizimu txako.
Currently Selected:
Dhewuteronome 13: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.