Dhewuteronome 14
14
Kuwukelwa ka masaluko a txihedheni
1 # Wona ni ka: Levh. 19:28; 21:5. “Anu mi vanana va Mkoma, Txizimu txanu; mi nga loweni mimidini kwanu, hambi kuyolwa titshi tanu, ngu mhaka ya kufa ka m'thu.” 2#Wona ni ka: Eks. 19:5-6; Dhewut. 7:6; Tit. 2:14; 1 Ped. 2:9. Nguko anu mi vathu vo sawuleka ka Mkoma, Txizimu txanu, kambe Mkoma a mi sawute hagari ka vamwani vathu, votshe vale va kuho txitimwi ka mafu, kasi ku mi va vathu vakwe mipune.
Sihari so yila ni sa kwa mbi yila
(Levhi 11:1-47)
3“Mi nga dyeni ni txa tximwetxo txo nyenyeza. 4Sihari si mi fanelako kudya ngu siya: Homu, ni nvuta ni phongo, 5xangu, ni mhoti, ni mangulwe, ni mbalapala, ni xengani, ni mbavala, ni txipene. 6Mi na dya sotshe sihari, sile si ku ni sitsendo so bhandwa, si txi maha sitsendo simbidi, i ku sihari si si nyengako.#14:6 Ti wombako ku: Asi si munyungutelako. 7Hagari ka sihari sile si nyengako mwendo sile si ku ni sitsendo so bhandwa, mi nga dyeni siya: Dikamelu, ni mnvunza, ni xoxwe, nguko sa nyenga, aniko kha si nga ni sitsendo so bhandwa; eso sa yila kwanu. 8Hambi khumba, hambiko yi ku ni sitsendo so bhandwa, aniko kha yi nyengi; yona ya yila kwanu; mi nga dyeni nyama ya sona, hambi kugwesa sirumbi sa sona.
9Ka sotshe si si kuho matini, mi na dya siya: Sotshe sile si ku ni timbaluvalu ni mara.#14:9 Ti wombako ku: Digwagwarimba. 10Aniko mi nga dyeni sotshe si si kuwalo timbaluvalu ni mara; sona sa yila kwanu.
11Dyanani nyama ya sotshe sinyana sa kwa mbi yila. 12Aniko hagari ka sona, mi nga dyeni siya: Digama, ni ditshova, ni tximhungu, 13ni nyamatate, ni likhozi, ni totshe tixaka ta sona; 14ni magwana, ngu tixaka ta ona; 15ni mbuwu, ni ditshukulu, ni nyawungondwani, ni txivaka, ngu tixaka ta sona; 16ni txikhovha, ni mkhoromati, ni tshamani, 17ni digumba, ni mnguvi, ni disekwa, 18ni nyawukolwe, ngu tixaka ta kona, ngakamela, ni didema.
19Ni sotshe sitoto si si purumako, sa yila kwanu; mi nga si dyeni. 20Mi na dya sotshe sinyana so mbi yila.
21 # Wona ni ka: Eks. 23:19; 34:26. Mi nga dyeni ni txa tximwetxo txihari txa ku ti fela; u na txi ningela ka mluveli wu a hanyako ha txikeni kwako a txi dya, mwendo ku txi xavisa ka wa matiko, nguko anu mi vathu vo sawuleka ka Mkoma, Txizimu txako.
Mi nga bhikeni txihongwana ngu masi a mame wa txona.”
Milayo ya sa wugumi
22Ngu ditshuri u na ninga sa wugumi ngu ka mihando yako ya yiphya, ayi u no elula dilembe ni dilembe thembweni kwako. 23Se masoni ka Mkoma, Txizimu txako, ka wukhalo wule a no wu sawula kasi ku ditina dakwe di txi zumba kona, u na dyela kona sa wugumi sa timbewu tako, sa vhinya yako ya yiphya, sa mtona wako, ni matiwula a tihomu tako ta vamakati, ni sa tinvuta tako; kasi ku u gonda kuthava Mkoma, Txizimu txako, otshe masiku. 24Se ngako nzila yi di laphile, ahawa ko u si sikoti ni ku si rwala, ngu kumaneka kule wukhalo wu wu no sawulwa ngu Mkoma, Txizimu txako, kasi ku a txi veka kona eho ditina dakwe, mbimo yile Mkoma, Txizimu txako, a no va a di kukatekisile, 25sekoko si xavise, u fumbareta male manzani, se tsula ka wukhalo wule a nga wu sawula Mkoma, Txizimu txako. 26Se male yile u na yi ningela ngu sotshe si wu no si lava moya wako, ngu tihomu ta vamakati, ni tinvuta, ni vhinya, ni sopa, ni sotshe si wu no kukombela moya wako; dyela kona hale, masoni ka Mkoma, Txizimu txako, se u txi tsaka, awe ni yotshe nyumba yako.
27Aniko u nga leke Mlevhi wule a ku mndani ka sike sako; nguko kha nga ni txyavelo, hambi thomba, kufana ni nawe. 28Msana ka malembe mararu, u na thavisa sotshe sa wugumi sa mihando ya yiphya ka dilembe donedo, u txi ta si veka mndani ka sike sako. 29#Wona ni ka: Levh. 27:30-33; Mit. 18:21. Sekoko a nata Mlevhi (nguko kha nga ni txyavelo hambi thomba kufana ni nawe), ni wa matiko, ni wo felwa ngu vaveleki, ni noni, va kuho mndani ka sike sako, se va na dya, va txi khura, kasi ku Mkoma, Txizimu txako, a na kukatekisa, ka yotshe mithumo ya manza ako, ayile u no yi maha.
Currently Selected:
Dhewuteronome 14: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.