Dhewuteronome 15
15
Dilembe da Wutxhanu ni Mambidi
(Valevhi 25:1-7)
1 # Wona ni ka: Eks. 23:10-11. Kugumani ka mtxhanu wa malembe ni mambi, u na divalela minandu. 2Mamahelo a kona ngu awa: Mmwani ni mmwani a nga txenekisa tximaha txokari ka mkwawe, a na m'divalela; kha na mbi m'vila mwakelani wakwe, hambi mwanawe, nguko kuhuweletwe mthetho wa kudivalela, ngu ditina da Mkoma. 3Wa sikota kuvila ka mluveli, aniko asile u nga txenekisa ka wa ka kwanu, si leke.
4Kunene, hagari kwanu, kha ku na mbi va ni txisiwana, nguko Mkoma a na mi katekisa, ka ditiko dile Mkoma, Txizimu txanu a no mi ninga, kasi ku mi txi di teka, di txi maha danu. 5Eto ti na maheka, ngako u txi engisa dipswi da Mkoma, Txizimu txako, u txi khatala ngu kuxayisa sotshe sirumo si nyamsi ni ku leletako sona. 6Mkoma, Txizimu txako, a na kukatekisa, nga ti a nga kuthembisa. Awe u na txenekisa ka mifumo yayingi, aniko awe khu na mbi txeneka, kambe u na fumela mifumo yo tala, aniko yona kha yi na mbi kufumela.
7 # Wona ni ka: Eks. 22:25; Dhewut. 23:19-20. Ngako ku txi maneka txisiwana txokari hagari ka vananu, ka sike sokari sako, ka ditiko dako, adile Mkoma, Txizimu txanu, a ku ningako, u nga bangise mbilu yako, kambe u nga fumbarete dianza dako ka mwananu, wule i ku txisiwana; 8aniko, nawuluta dianza dako, u txi mlomba ngu kutxhatxheka sile a si pwatako, madingano ni kuvilela kwakwe. 9Ti wonele ti to ku si maneki#15:9 Mwendo: mipimiso yo biha. mipimiso yo biha mbiluni kwako, u txi khata kuwomba u txi khawe: Da hoka dilembe da wutxhanu ni mambidi, dilembe da kudivalela sikweneti, se u txi wona mwanana wa txisiwana ngu maso o biha, u si mningi txilo; ene a na dila ka Mkoma ngu ngawe, se awe u na va ni txionho. 10M'ninge ngu kutxhatxheka, ni mbilu yako yi nga kanakane, nguko ngu mhaka ya toneto, Mkoma, Txizimu txako, a na kukatekisa, ka yotshe mithumo yako, ni yotshe mithumo ya manza ako.
11 # Wona ni ka: Mat. 26:11; Mar. 14:7; Joh. 12:8. Kha ku na mbi pwateka txisiwana ha ditikoni; ngu toneto, na kuruma ni khani: Nawuluta dianza dako ngu kutxhatxheka u vhuna mwananu, ni txikulungu txi txi ku ditikoni kwako.
Tikhumbi
(Eksodha 21:1-11)
12Ngako mwanangu wa Muhebheru mwendo ndiyako ya Muhebheru a txi ti xavisa kwako, ene a na kuthumela mtxhanu wa malembe ni dimwedo, aniko amu ka dilembe da wutxhanu ni mambidi, u na mleka e tsula. 13Aniko, ngako u txi mleka e tsula, u nga mleke e tsula asi nga ni txilo manzani kwakwe. 14Mninge sifuyo sokari sa mtxhambi wako, ni silo sa ha dithalani kwako, ni sa mu dipipani kwako, u txi m'vhuna ngu sile, Mkoma, Txizimu txako, a nga kukatekisa ngu sona. 15Alakanya ti to na nawe u ti ti khumbi ditikoni ka Egipta, ni ti to Mkoma, Txizimu txako, a ku tirute; ngu mhaka ya toneto, ani na kuninga mlayo wuwa nyamsi.
16Kambe, ngako ene a txi kugela ku khene: “Kha ni tumeli ku kuleka, ngako a txi kudhunda awe ni nyumba yako, ni kuva a txi pfa kutshamba mbiluni kwakwe ngu ngawe,” 17sekoko, u na teka linyunzi u txi m'thola nzeve ha txikeni, se ene a na va i di khumbi yako yotshe mbimo; u na maha toneto kambe ngu khumbi yako ya wamsikati.
18 # Wona ni ka: Levh. 25:39-46. Ti nga ku mahe u txi karateka ngu mhaka ya ku mleka e tsula, nguko ene a kuthumete mtxhanu wa malembe ni dimwedo, a ku mahete dibhindu da sithumi simbidi, se Mkoma, Txizimu txako, a na kukatekisa ka totshe ati u no ti maha.
Matiwula a tihomu ta vamakati ni a tinvuta
19 # Wona ni ka: Eks. 13:12. “U na ningela ka Mkoma, Txizimu txako, otshe matiwula a vamatune va tihomu tako ni a tinvuta tako, u nga thuke u txi thumisa matiwula a vamatune a tihomu tako, kambe u nga kaye matiwula a vamatune va tinvuta tako.
20U na ya ma dya, dilembe ni dilembe, masoni ka Mkoma, Txizimu txako, awe ni wotshe mwaya wako, ka wukhalo wule Mkoma a no va a di wu sawute. 21Ngako txifuyo txako txi di ni wulima wokari, txi txi nzoda mwendo txi di fite maso, hambi kuva ni wumwani wulima wa hombe, u nga txi ningele ka Mkoma, Txizimu txako ha txiluveloni. 22Wa sikota ku txi dyela m'tini kwako; awule a nga basa ni wule a nga mbi basa, votshe va na dya, nga ti va dyisako tona mhoti ni xangu. 23#Wona ni ka: Gen. 9:4; Levh. 7:26-27; 17:10-14; Dhewut. 12:16,23. Mnoha wa kona dwe u nga dye; wu thekete ha mafuni nga mati.
Currently Selected:
Dhewuteronome 15: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.