Dhewuteronome 17
17
1“U nga mahe mphaxo ka Mkoma, Txizimu txako, ngu homu mwendo nvuta, yi yi ku ni txibawa mwendo wulima, nguko eto ta nyenyeka masoni ka Mkoma, Txizimu txako.
2Ngako ka dimwedo da madhoropa ale Mkoma, Txizimu txako, a no kuninga, ku txi maneka wamwamna mwendo wamsikati wo thuka a txi maha to biha masoni ka Mkoma, Txizimu txako, ngu kuva a txi hambunyeta txitumelelano txakwe, 3e thumela simwani sizimu, ni kukhizama masoni ka sona, masoni ka ditambo, ni ka mtxima, mwendo ka dotshe dibutho da nzumani, ati ani ni nga mbi leleta; 4ngako eto ti txi landulwa kwako, ni ngako awe u txi tiengisa, kukhata awe u na wotisisa ta tinene; ngako i ti ditshuri, ngako ti di tsani ti to mhakeyo yo nyenyeka yi mahekile ka va ka Israyeli, 5sekoko, u na m'humisa hahanze ka didhoropa, eyo wa mwamna mwendo wamsikati, a nga maha to biha mtini kwako, se u txi ya m'balisela ngu marigwi, eneyo wamwamna mwendo wamsikati kala a txi fa.
6 # Wona ni ka: Mit. 35:30; Dhewut. 19:15; Mat. 18:16; 2 Vak. 13:1; 1 Tim. 5:19; Vaheb. 10:28. Ene a na dawa ngu mhaka ya tifakazi timbidi mwendo tiraru; ni wammweyo m'thu kha na kudawa ngu mhaka ya wufakazi wa m'thu wammweyo dwe. 7Manza a tifakazi ngu ona ma no khata ma txi mpeka kasi ku e dawa, se ngu msana ku txi landa manza a vathu votshe. Ngu kumaha toneto, mi na heta wubihi hagari kwanu.”
Kulamulwa ka timhaka to karata
8“Ngako ku txi humelela mhaka yo karata ku yi lamula awe, timhaka to daya, mwendo to bangelana, ni timhaka to dayisana, mwendo to wusa kuhenyisana sikwenini kwako, u na khukha u txi ya ka wukhalo wule Mkoma, Txizimu txako, a no wu sawula, 9se u na tsula ka vaphaxeli va ka Levhi, ni ka m'thethisi wule a no va a di ha mthumoni ka masiku oneyo, va na ya xolisisa mhaka, se va txi kugela wulamuli wa ditshuri, awu u fanelako ku wu maha. 10Se u na maha madingano ni kuruma ka dipswi di va no kuzivisa ka wukhalo wule wu no sawulwa ngu Mkoma; kambe u na khatalela kumaha totshe madingano ni ti va no ku gela. 11U na maha madingano ni txirumo txa mlayo wu va no ku gela, ni malamulelo ale va no ku gela; u nga leke dipswi di va no ku zivisa, uya txinene mwendo txibhabha.
12M'thu wu koko a no ti kulisa, asi engisi mphaxeli wu a nga vekwa kasi ku thumela Mkoma, Txizimu txako, hambi mlamuli asi mu engisi, m'thu eneyo a fanete kudawa. Ngu kumaha keto, mi na heta wubihi hagari ka va ka Israyeli; 13se votshe vathu va na tiengisa va txi thava, va si ngadi va txi ti kulisa kambe.”
Tifanelo ta mfumeli
14 # Wona ni ka: 1 Sam. 8:5. Mbimo yile u no wulela ka ditiko dile Mkoma, Txizimu txako, a no kuninga, kasi ku u txi di teka, ni kuva u txi aka ka dona, se u txi pimisa u txi khawe: Ni lava ku ti emisela mfumeli, kufana ni mifumo yotshe yi yi nga ni randela; 15ngu tona, u fanete ku ti emisela mfumeli wule a no va a di sawutwe ngu Mkoma, Txizimu txako; u na teka mmweyo wa vananu u txi mu emisa e maha mfumeli, masoni kwako. U na sikota kufumisa wa hahanze, i si nga wule i ku wa ka kwanu.
16 # Wona ni ka: 1 Vafu. 10:28. Kambe mfumeliyo kha kulaveki ku eva ni mahantxhi o tala, hambi kukurumeta vathu ve tshumelela Egipta kasi kuya mana mahantxhi o tala; nguko Mkoma a ti khene: Kha mi na mbi tsimbila kambe ngu yona nzila yiya.
17 # Wona ni ka: 1 Vafu. 11:1-8. A na ti wonele, asi teki vasikati votala, kasi ku mbilu yakwe yi si timetwi; kambe a nga sengeletele nzalama ni silivhela ngu kupindisa.
18“Ngako ene a txi maneka a di ha txikhaloni kwakwe ka wukoma, a fanete ku ti bhalela mlayo wuwa amu ka dibhuku, madingano ni ti wu nga bhaliswa tona ka dibhuku da vaphaxeli va ka Levhi. 19ene a na zumba nado, e di gonda ka otshe masiku a kuhanya kwakwe, kasi ku e gonda kuthava Mkoma, Txizimu txakwe, e vekisa otshe mapswi a mlayo wuwa ni sileleto sa kona, a txi si maha. 20Ngu toneto, kha na mbi ti hambukisa masoni kwakwe eya txinene mwendo txibhabha; kasi kuengetela masiku a mfumo wakwe, ene ni vanana vakwe, hagari ka va ka Israyeli.”
Currently Selected:
Dhewuteronome 17: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.