Dhewuteronome 18
18
Madingano a Valevhi ni vaphaxeli
1“Vaphaxeli va ka Levhi, lotshe lihunzu la ka Levhi, kha va na mbi va ni txyavelo mwendo thomba kona Israyeli; va va na hanya ngu minigelo yile yi hiselwako Mkoma, ni sile si mlumbako. 2#Wona ni ka: Mit. 18:20. Ngu kumaha keto, kha va na mbi va ni thomba hagari ka vanawe; Mkoma ngene i kuthomba yawe, nga ti ene a nga va gela.
3Asiya koko si dingana kuamukelwa ngu vaphaxeli, ka vathu vale va mahako mhamba ngu homu, mwendo ngu txifuyo txatxidotho, ngu siya: Va na ningela ka mphaxeli, txiphanga, ni milaka ni divhi. 4U na va ninga mihando yo khata ya fulaho yako, ya vhinya yako ya yiphya ni mtona wako, kumweko ni matoya o khata kukaywa a tinvuta tako. 5Nguko Mkoma, Txizimu txako, a sawute, hagari ka totshe tihunzu tako, kasi ku e maneka masoni kwakwe, a txi maha mthumo wa wukhongeli ngu ditina da Mkoma, ene ni vanana vakwe, kala kupinduka.
6Se ngako a txita Mlevhi wokari ngu ka dimwedo da madhoropa ako, ahale ene a zumbako kona, ka dotshe ditiko da ka Israyeli, na a txi navela ngu yotshe mbilu yakwe, kuta ka wukhalo wu Mkoma a no wu sawula, 7a nata thumela ditina da Mkoma, Txizimu txakwe, kufana ni vanawe votshe va ka Levhi, vale va manekako koneyo masoni ka Mkoma, 8a na mana sakudya so dingana ni sa vamwani vaphaxeli, hahanze ka sile asi manako ngu kuxavisa thomba yakwe!”
Kusolwa ka sihena sa wuhedheni
9“Ngako u txi wulela ka ditiko di Mkoma, Txizimu txako, a no kuninga, u nga gonde mahanyelo o biha a vathu vonevo. 10Ku nga maneke hagari kwanu ni wammweyo wo hisa mwanana wakwe wa mfana mwendo wa dihorana ha mndiloni; hambi wa kuthumisa wuñanga, ni kuxaxuva, ni kuhuta, mwendo matiloti, 11hambi wo thumisa wuloyi, ni wu a fembako, mwendo kuxaxuva, ni ku wotisa ka va kufa, 12ni wihi wule koko a mahetelako totshe tiya, njiyenyeko ka Mkoma; se ngu mhaka ya sinyenyeko siya, Mkoma Txizimu txako, a na va tshotsha kule ni nawe vathu vava. 13#Wona ni ka: Mat. 5:48. U na va wo hetiseka, kufana ni Mkoma Txizimu txako.
Txizimu txi thembisa kurumela mmwani mprofeti
14Nguko matiko awa u no ya ma khozisa, ma engisela vanyatixolo ni vauhuti; kambe Mkoma, Txizimu txako, kha ku tumeleli kumaha to nga eto.” 15#Wona ni ka: Mith. 3:22-23; 7:37. “Mkoma, Txizimu txako, a na ku humisela mprofeti wo fana ni nani, hagari ka va ka kwanu; awule mi no fanela ku mu engisa”;
16madinfano ni ti u nga kombelisa tona ka Mkoma, Txizimu txako, mmangoni ka Horebhi, ka ditshiku da msengeletano, u nga khawe: “Kha ni na mbi engeta ni txi engisa dipswi da Mkoma, Txizimu txangu, hambi kuwona mndilo wuwa wa hombe, nguko ni nga fa!” 17Sekoko Mkoma a to khene kwangu: “Vona va wombile ditshuri. 18Wona taku ni na va tumbulukisela mprofeti wo nga awe, hagari ka vanawe. Ni na veka mapswi angu txisofuni kwakwe, se ene a na va gela totshe ti ni no m'leleta tona.
19Se ngako ku txi maneka m'thu wo mbi engisa mapswi anu, aawa ma no huwelelwa ngu mprofeti ditinani kwangu, ani nipune ni na m'dhana e ta ti xamulela.
Vaprofeti va makuhu
20Kambe mprofeti wule a no tsana e womba-womba ngu ditina dangu, mhaka yi ani ni nga mbi mleleta, mwendo a txi womba-womba ngu ditina da simwani sizimu, eyo mprofeti a na fa.”
21Se ngako u txi ti wotisa mbiluni kwako, u txi khawe: “Se hi na ti zivisa kutxani ti to mhaka yiya, hi nga mhaka ya Mkoma kani?” 22Ngako mprofeti a txi womba-womba ngu ditina da Mkoma, aniko mhakeyo yi si maheki mwendo yi si humeleli, tikomba ti to mhakeyo kha ya wombwa ngu Mkoma; mprofeti eneyo a wombawombile ngu kutiguleta, u nga mthave.
Currently Selected:
Dhewuteronome 18: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.