Dhewuteronome 19
19
Madhoropa o thavela ka ona
(Mitengo 35:9-29)
1Ngako Mkoma, Txizimu txako, a di fuvisile mifumo yile matiko a kona a no kuninga, ni kungako u di yi khozisile, u maneka u di akile madhoropani ka yona, ni ku va u txi zumba tinyumbani ka ona, 2#Wona ni ka: Dhewut. 4:41-43; Jox. 20:1-7. u na sawula madhoropa mararu hagari ka ditiko di Mkoma, Txizimu txako, a no kuninga. 3U na lulamisa tinzila ta kona, u bhanda mihingano, u abanisa ditiko ngu madhawa mararu, ditiko di Mkoma, Txizimu txako, a no kuninga, di txi maha thomba yako; kasi ku ni wuhi a dayako m'thu e thavela kona.
4Se mhaka yi yi ningako m'dayi fanelo ya kulava wuthavelo kasi ku e hulukisa wutomi wakwe, ngu yiya. Awu a dayako muakelani wakwe ngu phango, na a sa thanga ngu ku m'venga. 5Kufana ni kungako mmwani m'thu a txi tsula ni muakelani wakwe txitingani, kuya ganga tikhuni; se mbimo yi a ndiwitako dianza dakwe, a di ni nzanga manzani, kasi kunganga mndonga, se nzanga yi gwandeka ha ka muhini, yi txi ya ganga muakelani wakwe, yi txi m'daya; konako ene a nga sikota kuthavela ka dimwedo da madhoropa oneyo, e hulukisa wutomi wakwe; 6i si nga toneto, mphoteli wa mnoha, ngu kuva a di henyile mbiluni kwakwe, a nga sikota ku mlondeta, kala a txi mmana e m'daya, ngako mpfhuka wa nzila i di wa hombe, na kasi m'thu eneyo a ti si nga ni fanelo yo m'daya, nguko a ti si m'vengi ka masiku ale ma nga pinda. 7Ngu toneto, ni ku layako ngu tona, ni txi khani: “Sawula madhoropa mararu.”
8Ngako Mkoma, Txizimu txako, a txi maha ti to ditiko dako di txi anda, nga ti a nga xambanya ka vatate vako, se e kuninga dotshe ditiko di a nga thembisa ti to a na di ninga vatate vako, 9(nguko ngako u txi xayisa ni kuvekisa sotshe sirumo siya nyamsi ni ku leletako, ngu kuva u txi randa Mkoma Txizimu txako ni kuva u txi tsimbila ngu tinzila takwe otshe masiku), sekoko u na va u txi engetela kambe mamwani madhoropa a mararu, ka ale a mararu o khata; 10kasi ku si thekeli mnoha wo mbi na mnandu ka ditiko di Mkoma, Txizimu txako, a no kuninga, di txi maha thomba yako, ni kuva ku si maneki mnandu wo thekela mnoha, txitimwi kwako.
11Ti di ngeto, ngako m'thu wokari a txi maneka a txi phika muakelani wakwe, aha koza a txi m'baramela, a txi mu wukela, e m'daya, se ngu msana a txi thava e tutumela ka dimwedo da madhoropa ale, 12madhota a didhoropani mule, va na rumela vathu va txi ya mteka, e mningela manzani ka mphoteli wa mnoha, kasi ku e dawa nene. 13Kha kulaveki u txi mtsetsa; kambe u na fuvisa mhaka ya kutheketa mnoha wo mbi na mnandu ka va ka Israyeli se u na kateka.
Sikombiso sa kuabanisa
14 # Wona ni ka: Dhewut. 27:7. U nga txitxe muhingano wa muakelani wako, awu vahombe vanu va nga wu bhanda amu ka thomba yi u no yi mana ka ditiko di Mkoma, Txizimu txako, a no kuninga di txi maha dako.
Tifakazi
15 # Wona ni ka: Mit. 35:30; Dhewut. 17:6; Mat. 18:16; Joh. 8:17; 2 Vak. 13:1; 1 Tim. 5:19; Vaheb. 10:28. “Fakazi yimweyo yokha kha yi dingani ka mhaka ya m'thu, ni ka yihi mhaka yo biha mwendo txionho txokari, txi nga mahwa. Mhaka yi na tsaniswa ngu wufakazi wa vathu vambidi mwendo vararu. 16Ngako fakazi ya makuhu yi txi lumbeta m'thu mhaka yo biha, kasi kufakaza yi txi mu wukela 17sekoko vathu vale ngu wuhambunyeti wokari vavambidi valwako, va na ya ema masoni ka Mkoma, ni masoni ka vaphaxeli, ni masoni ka valamuli vale va no maneka va txi thuma ka masiku oneyo. 18Se valamuli va na xolisisa kha kwati mhaka; ngako fakazi i di ya makuhu, yi txi maneka yi di lumbetile muakelani wa yona, 19mi na yi mahela ati yona yi nga ti lava ku ti txi mahwa ka muakelani wa yona; se mi na thavisa kubiha hagari kwanu. 20Kasi ku vamwani ngako va txi tiengisa, va na thava, va si swi va txi maha kubiha ko nga koneko hagari kwanu. 21#Wona ni ka: Eks. 21:23-25; Levh. 24:19-20; Mit. 5:38. Diso dako di nga mtsetse. Wutomi wu na dihwa ngu wutomi, diso ngu diso, dikwasa ngu dikwasa, dianza ngu dianza, mkondo ngu mkondo.”
Currently Selected:
Dhewuteronome 19: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.