Dhewuteronome 20
20
Milayo ya yimbi
1“Mbimo yi u no huma ku yalwa yimbi ni valala vako, ngako u txi wona mahantxhi ni sikotxikani ni vathu vavangi, vo pinda awe, u nga va thave, nguko Mkoma, Txizimu txako awu a nga kuhumisa ditikoni ka Egipta, ana ni nawe. 2Se ku na maheka taku, mi txi lava kukhata kulwa, mphaxeli a na ema masoni ka vathu e womba-womba, 3a txi khene kwawe: Engisani anu va ka Israyeli, Nyamsi tshuketani mi txi yalwa ni valala vanu; yi nga wike misana yanu; mi nga va thaveni, kambe mi nga dhudhumeleleni, hambi ku telwa ngu dizowa masoni kwawe, 4Mkoma, Txizimu txanu koko, a tsimbila kumweko ni nanu, kasi kulwa ni valala vanu, a txi mi ninga kuxula.” 5Sekoko madhota ma na womba ka vathu, ma txi kha ona: “I mani hagari kwanu a nga aka nyumba ya yiphya, ayi a sinziko kukhata kuotela ka yona kani? A na khukhe a txi tsula m'tini kwakwe, kasi asi fi yimbini, se nyumba yakwe yi txi sala yi txi khata kuotelelwa ngu vamwani. 6Se i mani a nga phaya thembwe ya mivhinya, ayi a sinziko kumana mihando ya yona kani? A na khukhe a txi tsula m'tini kwakwe, kasi ku asi fi yimbini, se thembwe ya mivhinya yi txi khata kuelulwa ngu mmwani m'thu. 7Niku i mani a nga tekana ni wamsikati wokari, a sanziko ku muamukela kani? A na khukhe a txi tsula m'tini kwakwe, kasi asi fi yimbini, se mmwani m'thu a txi sala e mteka.”
8Se va na simama vathangeli va mazana ve womba ka vathu, va txi kha vona: “I mani a ku ni dizowa, awu a nga wika msana kani? A na khukhe a txi tsula m'tini kwakwe, kasi wupwembwe wakwe wu si tshapeli ka vanawe.” 9Se ku na maheka taku, vathangeli va di gwitile kuwombawomba ka vathu, va na sawulwa vahombe va mabutho a tiyimbi, ava va no thangela masoni ka vathu.
10Mbimo yi u no hoka hafuhi ka didhoropa dokari, u txi lava kukhata kulwa navo, u na va gela ngu mhaka ya kudikha. 11Se ngako va txi kuangula ngu kuthutha va txi kutulela matimba, vathu votshe vale va manekako, ka didhoropa donedo, va na va tikhumbi tako, va txi kuthumela txibhalo. 12Kambe va si tumeli kupfana ni nawe, va txi lava kulwa ni nawe, awe u na ranganyeta didhoropa dwe. 13Se Mkoma, Txizimu txako, a na di ningela manzani kwako; u na lovisa vavamna votshe ngu ditxhari, 14hahanze vavasikati ni vanana, ni sihari; ni sotshe sile si no maneka didhoropanimo, sotshe si u no handa, u na si teka si txi maha thomba yako; u na dya sile u no handa ka valala vako, avale Mkoma, Txizimu txako, a nga va ningela manzani kwako. 15U na mahisa toneto ka otshe madhoropa ale ma ku kule ni nawe, madhoropa ale ma si lumbiko mifumo yiya.
16Kambe ka madhoropa a matiko awa Mkoma, Txizimu txako, a no kuninga ma txi maha thomba yako, u nga leke ni txa tximwetxo txivangwa txi txi hanya. 17U na va lovisa va txi bhi, votshe Vaheti, ni Vaamori ni Vakanana, ni Vaferezi ni Vahevhi ni Vajebhusi, nga ti Mkoma, Txizimu txako, a nga ku leletisa tona, 18kasi ku va si mi gondisi kumahetela kotshe kubiha kwawe, akule vona va nga txi mahetela ka sizimu sawe; nguko mi nga va mi txi onhela Mkoma, Txizimu txanu.
19Ngako u txi randela didhoropa dokari ngu mbimo yo lapha, u txi lwa nado kasi ku di teka, u nga dikhetele mindonga ya mihando ngu ku yi gangela ngu nzanga nguko u na dya mihando ya kona (mihando ya mindonga u na dya). Ina mndonga wa thembweni i m'thu wu ulwako nayo kani? 20Aniko ngako i di mindonga yile u ti zivako ti to kha yi veleki mihando yo dyiwa, wa sikota ku yi sengulela, u txi yi wilela, u txi yi maha tiphande to ti bhiyela ngu tona; kasi ku ti vhikela ka didhoropa dile ulwako nado, kala kuza u txi di khozisa.
Currently Selected:
Dhewuteronome 20: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.