Dhewuteronome 33
33
Kukatekiswa ka tihunzu
1Kambe atxiya, njikatekiso a txi Mosi, m'thu wa Txizimu, a nga katekisa ngu txona vanana va ka Israyeli, na a sinzi kufa. 2“A to khene koko:
Mkoma a tile ngu Sinayi,
a kwelete na a txi ta ngu Seyiri;
a woningile a di mmangoni ka Parani,
a txi ta ni 10.000 wa vasawuleki;
txinene kwakwe ku ti ti ni mndilo wa mlayo.
3Ene wa randa vathu vakwe,
votshe vasawuleki vakwe va manzani kwakwe;
vona va khizama mikondoni kwako,
va txi engisela mapswi ako.
4Mosi a hi ningile mlayo,
awu i kuthomba ya msengeletano wa Jakobe.
5Se Mkoma a to maha mfumeli kona Jesurumi,
mbimo yi ku nga sengeletana vathangeli va vathu, ni tihunzu ta ka Israyeli.
6A na hanye Rubheni, a nga fe;
ni vathu vakwe va nave i di votala!”
7Se ati a nga womba ngu Judha a ti khene: Judha a wombile dipswi da kateko a txi khene:
“Mkoma, engisa dipswi da Judha
u txi mu wuletisa ka vathu vakwe;
manza akwe ma nave ni mtamo,
u txi m'lwela ka valala vakwe!”
8Ngu didhawa da Levhi, ene a ti khene:
Simaha sako so sawuleka sa Tumime ni Urime,
si ningetwe ka msawuleki walo,
awule a nga m'duka kona Masa,
awule u nga kanetisana nayo matini ka Meribha;
9ngu tate wakwe ni mame wake ene a khene: “Kha ni zivi ku va wona.”
Nene kha va ziva vanawe,
kambe wa timelelwa ngu vanana vakwe.
Ina vona va xayisile dipswi dako,
kambe va vekisile txitumelelano txako.
10Va gondisile sileleto sako ka Jakobe, ni mlayo wako ka Israyeli;
vona va wuyisile kubhumula ka dibaselo tithonvuni kwako,
ni mningelo wo hiswa txitimwi ka txiluvelo txako.
11 Mkoma katekisa mtamo wawe,
u amukela mthumo wa manza awe!
Phwarasa titsho ta vale va va wukelako
va txi va xanisa,
kasi ku va si sikoti kukhukha va txi ema.
12Ngu didhawa da Bhenjamini, a ti khene:
“Ene njirandwa txa Mkoma,
a na humula ngu kuthutha hafuhi kwakwe,
Nyatxitimwi a na mfenengeta kala kupinduka,
e zumba makatani kwakwe.”
13Ngu didhawa da Josefa, a ti khene:
“Ditiko dako di na katekiswe ngu Mkoma,
di ningwa sihiwa so tshura sa nzumani, i ku mwando
ni mati awa ma ku kuhokomani ka hahatshi,
14mihando ayi yi vitiswako ngu ditambo,
ni mihando yi yi manekako ngu mtxima;
15Ni sa sinene sa mimangoni ka kale, ni sa mikovani ko mbi gwita;
16mihando ya mafu ni kutala ka yona,
ni kateko ya wule a nga aka mu txipoponi.
Makatekwa ma nave ha msungo ka Josefa,
txitimwi ka msungo wa wule
a nga sawulwa hagari ka vanawe!
17Ene ana ni wudhumo wa didhuna da matiwula,
titxheho takwe ti fana ni titxheho ta nyari;
ngu tona a na lovisa votshe vathu
ngu txikhati tximwetxo, kala magwito ka mafu;
ngu vona i ku 10.000 wa va ka Efrayime,
ni vava i ku magumi a mazana a va ka Manasi.”
18Ka Zebhuloni, a ti khene:
“Tsaka Zebhuloni amu mapfhumbani kwako,
ni nawe, Isakari, amu matendani kwako.
19Vona va na ramba vathu va txi ya mmangoni,
ahale va no ya maha miningelo ya kululama,
nguko va na mana tithomba ta lineneni,
ni suma si si nga siswa hahatshi ka mtxhefa.”
20Ngu didhawa da Gadhi, a ti khene;
A katekile wule a endelekisako Gadhi!
Ene wa humula nga ngonyamo ya makati,
ayi yi phatulelako mawoko ni misungo.
21Ene a ti sawulete didhawa do khata,
awu i nga ti txyavelo txa vasungi va milayo.
Ngene a tsimbilako ni vathangeli va vathu,
awu a mahako kululama masoni ka Mkoma, ni sileleto sakwe ka va ka Israyeli!
22Se madingano ni Dhani, a ti khene:
Dhani njingonyamwana,
atxi txi ndakako ngu niya Bhasani.
23Ngu va ka Naftali, a ti khene:
Awe Naftali khura ngu mathomo, kambe tala ngu makatekwa a Mkoma,
teka mswa-ditambo ni wulambwe,
24Ngu didhawa da Aseri, a ti khene:
“A katekile Aseri hagari ka vanana-kulowe,
a katekile hagari ka vanawe,
a na nakanise ngu mtona mikondo yakwe.
25Sikhoto sako si na va sa simbi ni koporo;
mtamo wako wu na simama nga masiku a kuhanya kwako.”
26Awe Jesurumi kha nga ho wa kufana ni Txizimu,
a tako a di gadhile tinzuma kasi ku ta ku vhuna,
a tako ni wuhombe wakwe txitimwi ka marefu!
27Txizimu txa yotshe mbimo, mbuthavelo wako.
Mawoko a txona nzivhuno sako kala kupinduka;
txona txo tovela valala masoni kwako,
txi txi kha txona: Va lovise!
28Israyeli a akile kuxayisekani, txisima txa Jakobe txi zumbisekile,
ka mafu a kupfuna fulaho ni vhinya,
hahatshi ka nzuma, ayi yi wisako mwando.
29Awe Israyeli u katekile!
I mani a fanako ni nawe,
ditiko di di nga hanyiswa ngu Mkoma, kani?
Ene ngene i ku txitxhangu txi txi ku vhikelako,
ditxhari di di ku ningako wundena!
Valala vako va na khoziswa masoni kwako,
awe u na kandetela kutiguleta kwawe.
Currently Selected:
Dhewuteronome 33: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.