Dhewuteronome 5
5
Milayo ya digumi
(Eksodha 20:1-17)
1Se Mosi a to dhana votshe va ka Israyeli a txi ta va gela ku khene:
“Engisa, awe Israyeli, milayo ni sileleto si nyamsi ni huwelelako tinzeveni kwanu. Si gondeni, mi si xayisa ni ku si vekisa.” 2Mkoma, Txizimu txathu, a mahile txitumelelano ni nathu mmangoni ka Horebhi. 3Mkoma kha maha txitumelelano txiya ni vatate vathu, aniko a txi mahile ni nathu, athu hi kuho hawa, hotshethu hi hanyako. 4Mkoma a wombawombile ni nanu khohe ni khohe, a di hagari ka mndilo, txitimwi ka mmango. 5Konako ani ni emile hagari ka Mkoma ni nanu, kasi ku ni mi gela dipswi da Mkoma, nguko mi ti ti ni dizowa ngu mndilo, ngu mhaka yeto kha ma kwela mmangoni. Ene a ti khene: 6“Ani ngani Mkoma, Txizimu txako, ni nga kuhumisa ditikoni ka Egipta, ka nyumba ya wukhumbi.
7Khu na mbi va ni simwani sizimu hahanze kwangu.
8Awe khu na mbi ti mahela txifananiso txo vatwa, hambi txo fana ni txokari txa si si ku txitimwi nzumani, mwendo hahatshi ha mafuni, mwendo matini hahatshi ka mafu; 9#Wona ni ka: Eks. 34:6-7; Mit. 14:18; Dhewut. 7:9-10. khu na mbi si khozela, kambe khu na mbi si thumela, nguko ani, Mkoma, Txizimu txako, ni Txizimu txa txiluse, atxi txi tsayisako vanana ngu mhaka ya sionho sa vaveleki vawe, kala ka liveleko la wuraru ni la wumune ka vale va ni vengako. 10Kambe na maha wumbilu ka magumi a mazana a vale va ni randako, ni kuvekisa sirumo sangu.
11Khu na mbi khumbuka walo ditina da Mkoma, Txizimu txako, nguko Mkoma kha na mbi leka, asi tsayisi, awule a sakanako ngu ditina dakwe, walo.
12U na vekisa ditshiku da Sabbata u txi di sawulekisa, nga ti a nga ku leletisa tona Mkoma, Txizimu txako. 13U na thuma amu ka mtxhanu wa masiku ni dimwedo, u txi maha yotshe mithumo yako. 14Ditshiku da wutxhanu ni mambidi, i Sabbata ya Mkoma, Txizimu txako; khu na mbi maha ni wawumwewo mthumo, awe ni mwanana wako, wa mfana mwendo wa dihorana, ni khumbi yako, ya wamwamna mwendo ya wamsikati, ni homu yako, ni mbongola yako, ni txihari txokari txako, ni mluveli wu a ku m'tini kwako. Ngu kumaha keto, khumbi yako ya wamwamna mwendo ya wamsikati, va na sikota kuhumula ni vona kufana ni nawe. 15Alakanya ti to nawe u ti ti khumbi ditikoni ka Egipta, ni ti to Mkoma, Txizimu txako, a ku humisile koneyo ngu dianza da mtamo ni diwoko do guleka. Ngu mhaka ya toneto, Mkoma, Txizimu txako, a ku leletete ti to u vekisa ditshiku da Sabbata.
16 # Wona ni ka: Dhewut. 27:16; Mat. 15:4; 19:19; Mar. 7:10; 10:19; Luk. 18:20; Vaef. 6:2,3. Thava tate wako ni mame wako, nga ti Mkoma, Txizimu txako, a nga kuleleta, kasi masiku ako ma na anda ni nawe u na kateka, ka ditiko di Mkoma, Txizimu txako, a no kuninga.
17U nga daye.
18U nga mahe wugango.
19U nga pe.
20U nga lumbete muakelani wako, ngu wufakazi wa makuhu.
21U nga navele msikati wa muakelani wako, kambe u nga navele nyumba ya muakelani wako, hambi thembwe yakwe, hambi khumbi yakwe ya wamwamna mwendo ya wamsikati, hambi homu yakwe, ni mbongola yakwe, hambi ni txihi tximaha txi lumbako muakelani wako.”
22Aawa ngu ona mapswi a Mkoma a nga huwelela, ngu dipswi do guleka, ka wotshe msengeletano wanu, txitimwi ka mmango, a di hagari ka mndilo, ni direfu, ni txidema. A to womba-womba ngu dipswi da hombe, a si engeteli txilo; a to bhala timhaka tiya, aha ka sileti simbidi sa marigwi, a txi si ningela kwangu.
Vathu va zumba ni dizowa
(Eksodha 20:18-21)
23Ti di ngeto, mbimo yi mi nga engisa dipswi di txi huma ngu hagari ka txidema, na mmango wu txi tura ngu mndilo, anu motshenu, ni vathangeli vanu va tinyumba ni madhoropa, mi to tshuketa hafuhi kwangu, 24se mi ti khanu: “Mkoma, Txizimu txathu, a hi kombile wudhumo wakwe ni wuhombe wakwe, athu hi engisile dipswi dakwe di txi huma ngu hagari ka mndilo. Nyamsi hi woni ti to Txizimu txa sikota kuwombawomba ka m'thu, se m'thu e tama a txi hanya. 25Se konkuwa hi nga fa ngu mhaka muni kani? Mndilo wuwa wa hombe wu na hi hisa. Ngako hi txi tama hi engisa dipswi da Mkoma, Txizimu txathu, athu hi na fa. 26Nguko i mani a nga engisa, kufana ni nathu, dipswi da Txizimu txi txi hanyako, txi txi womba-womba hagari ka mndilo, e tama a txi hanya kani? 27Tshuketa awe, u txi ya engisa totshe ti Mkoma, Txizimu txathu, a no ya womba. Se awe u nata hi gela totshe ti Mkoma, Txizimu txathu, a no ya kugela, athu hi nata tiengisa, hi txi ti vekisa.”
28 Mkoma a engisile mapswi anu, aawa mi nga womba-womba ni nani, e ni gela a txi khene: “Ni engisile mapswi ale vathu vava va nga kugela, totshe ti va nga ti womba ndinene ngutu. 29Sikwawe, idiku timbilu tawe yotshe mbimo to va ni mapimo o nga toneto, veva ni txithavo, va txi vekisa ngu kusimama sotshe sirumo sangu, va ndi na zumbiseka ta tinene, vona ni vanana vawe, kala kupinduka. 30Tsula u ya va gela ve tshumelela matendani kwawe. 31Kambe awe, zumba kona hawa ni nani, ni txi ku geletela sotshe sirumo, ni milayo, ni sileleto si u no ya va gondisa, kasi kuva txi ya si maha ka ditiko dile ni no va ninga va txi di fuma.”
32Ngu kumaha keto, khatalelani kumaha ati Mkoma, Txizimu txanu, a nga mi leleta tona. Mi nga ti hambukiseni, mi txi ya ka didhawa da txinene mwendo da txibhabha. 33“Mi na tsimbila ngu yotshe nzila yi Mkoma, Txizimu txanu, a nga mi leleta, kasi ku mi txi hanya, mi di katekile, ni ti to masiku anu ma txi anda, ka ditiko di mi no ya di teka, di txi maha danu.”
Currently Selected:
Dhewuteronome 5: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.