Dhewuteronome 6
6
Mlayo wa hombe
1“Ayiya koko, ngu yona milayo ni sileleto ni mithetho, asi Mkoma, Txizimu txanu, a nga ruma ti to ni mi gondisa, kasi ku mi txi si maha, ka ditiko di mi yako ka dona, mi txi ya di fuma. 2Ngu toneto, thava Mkoma, Txizimu txako, kambe vekisa yotshe milayo yakwe, ni sirumo si nyamsi ni ku leletako, awe ni vanana vako, ni mtukulu wako, otshe masiku a kuhanya kwako, kasi ku masiku ako ma na anda. 3Ngu toneto, awe Israyeli, engisa u txi khutalela kuvekisa milayo yiya, u na mana kukateka, kambe u na anda ngutu, ka ditiko di di khulungako masi ni wulombe, nga ti a nga kugela Mkoma, Txizimu txa vatate vako.
4Engisa awe Israyeli, Mkoma, Txizimu txathu, Mkoma mmweyo dwe. 5#Wona ni ka: Mat. 22:37; Mar. 12:30; Luk. 10:27. Ngu toneto, u na randa Mkoma, Txizimu txako, ngu yotshe mbilu yako, ngu wotshe moya wako, ni wotshe mtamo wako. 6Mapswi awa ni ku leletako nyamsi, ma nave mbiluni kwako. 7Awe u na ma gondisa ka vanana vako, kambe u na womba-womba ngu ona, u di khalahatshile m'tini kwako, ni kungako u txi tsimbila amu mapfhumbani kwako, ngako u txi otela, ni kungako u txi wuka. 8Kambe u na ma sunga diwokoni kwako kasi kumaha txialakanyiso, ni kuva txikombiso hagari ka maso ako. 9Awe u na ma bhala aha ka misasimo ya nyumba yako, ni mu ka matimba ako.”
Txiziviso txo wukela kwa mbi engisa
10Ngako Mkoma Txizimu txako a txi ku wuletisa ka ditiko di ene a nga thembisa ngu kuxambanya ka vatate vako Abrahamu, Isaake ni Jakobe, ti to a na kuninga, i ku madhoropa a hombe o tshura, aawa u nga mbi ma aka, 11ka tinyumba ti ti nga tala ni sotshe sa sinene, asi si nga mbi sengeletwa ngu ngawe; sisima si si nga mbi kelwa ngu ngawe; tithembwe ta mivhinya ni miolivha, ayi yi nga mbi phawa ngu ngawe; ngako u txi dya u txi khura. 12Ti wonele, u si divali Mkoma, a nga kuhumisa ditikoni ka Egipta, ka nyumba ya wukhumbi. 13U na thava Mkoma, Txizimu txako, u txi mkhozela, ni kuxambanya ngu ditina dakwe. 14Mi nga khozeleni simwani sizimu, asi si ku hagari ka sizimu sa vathu, vale va mi randelako. 15Nguko Mkoma, Njizimu txako, atxi txi nga aka hagari kwanu, Njizimu txa txiluse; ngako kuhenya ka Mkoma, Txizimu txako, ku txi vhiluka, ene a nga kufuvisa ha mafuni.
16 # Wona ni ka: Eks. 17:1-7; Mat. 4:7; Luk. 4:12. Mi nga dukeni Mkoma, Txizimu txanu, nga kule mi nga m'duka kona Masa. 17Mi na vekisa ta tinene sirumo sa Mkoma, Txizimu txanu, kumweko ni wufakazi ni mithetho, ayi ene a nga mi leleta. 18U na maha ati i ku to lulama, ni ti i ku ta tinene masoni ka Mkoma, kasi ku u na zumbiseka kala kuza u txi wulela ka ditiko da dinene, adi Mkoma a nga thembisa ngu kuxambanya ka vatate vako, 19ni kututumisa votshe valala vako, masoni kwako, nga ti Mkoma a nga womba.
20Ka mbimo yi yi tako, ngako mwanana wako a txi ku wotisa, a txi khene: “Wufakazi, ni milayo ni sileleto, asi Mkoma, Txizimu txathu, a nga mi gela, si womba txani kani?” 21Konako u na mxamula u txi khawe: “Athu hi ti tikhumbi ta Faro ditikoni ka Egipta, aniko Mkoma a hi humisile kona Egipta ngu dianza da mtamo. 22Se Mkoma a mahile sikombiso sa hombe ka Faro, ni ka yotshe nyumba yakwe, ni sixamaliso so thisa, hi txi si wona; 23se a hi thavisile koneyo, a txi hi tisa muwa, kasi ku ta hi ninga ditiko diya, a nga thembisa ka vatate vathu, ngu txixambanyo. 24Se Mkoma a hi leletete ti to hi vekisa sotshe sileleto siya, hi thava Mkoma, Txizimu txathu, kasi ku hi na mana kuzumbiseka yotshe mbimo, e hi ninga wutomi, kufana ni ditshiku da nyamsi. 25Ti nava i di kululama kwathu, ngako hi txi khatala ngu kuvekisa sotshe sirumo siya, masoni ka Mkoma, Txizimu txathu, nga ti a nga hi leleta.”
Currently Selected:
Dhewuteronome 6: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.