Dhewuteronome 7
7
Vathu vo sawulwa ngu Txizimu
(Eksodha 35:10-16)
1“Ngako Mkoma, Txizimu txako, a di ku wuletile ka ditiko di uyako ka dona, kasi ku u txi ya di fuma, a di tutumisile matiko amangi masoni kwake, Vaheti, Vagirigaxi, Vaamori, Vakanana, Vaferezi, Vahevhi ni Vajebhusi mtxhanu wa matiko ni mambidi a vathu vo tola ni mtamo wa hombe kupinda awe. 2Ngako Mkoma, Txizimu txako, a txi ma ningela kwako, awe u txi ma khozisa, u ma fuvisa ni ku ma lovisa, u nga mahe txitumelelano nawo, kambe u nga ma mahele wumbilu. 3U nga tekane navo, u nga ningele vanana vako vamahorana ve tekwa ngu vafana vawe, hambi ni kutekela vafana vako mahorana awe. 4Nguko vanana vako va nga hambukiswa ngu vona, va txi khozela simwani sizimu, se txiviti txangu ani Mkoma, txi nga tura, txi mi lovisa ngu kukuluveta. 5Ngu tiya mi fanelako ku va mahela, kukhundumusa siluvelo sawe, mi txi fayetela marigwi awe a wukhongeli, mi wilela tiphande tawe, ni kuhisa sithombe sa Aseri. 6#Wona ni ka: Eks. 19:5; Dhewut. 4:20; 14:2; 26:18; Tit. 2:14; 1 Ped. 2:9. Nguko mbathu vo sawuleka ka Mkoma, Txizimu txako; Mkoma, Txizimu txako, a mi sawute, kasi ku mi maha vathu vo lumba ene, mi txi va mi di ngamu yakwe ene apune, hagari ka votshe vathu va kuho ha mafuni.”
7“Mkoma kha mi randa ni ku mi sawula, ngu mhaka ya kutala ka dibutho danu kupinda a votshe vamwani vathu, nguko anu mi ti ti vadotho ngu mtengo hagari ka votshe vathu vale vamwani. 8Mkoma a maha tiya nguko wa mi randa, kambe a lava kutsanisa txithembiso txakwe, txi ene a nga va a di xambanyile ka vatate vanu, Mkoma a mi humisile ngu dianza dakwe da mtamo, kambe a mi tirute nyumbani ka wukhumbi, manzani ka Faro, mfumeli wa Egipta.
9U na ti zive koko ti to Mkoma, Txizimu txako, Njizimu, Njzimu txo thembeka, a xayisako txitumelelano ni wumbilu, kala ka 1.000 wa tiveleko, ka vale va mrandako, ni kuvekisa sirumo sakwe; 10aniko ene a tshumetela ngu ku va lovisa avale va m'vengako, kha sweli kudihisa, a na va tshumetela. 11Ngu toneto, u na xayisa sirumo, ni milayo, ni sileleto si ni ku leletako nyamsi.”
Sikatekiso ka vale va engisako
(Valevhi 26:3-13; Dhewuteronome 28:1-14)
12Ngako u txi engisa, u txi si vekisa sileleto siya, Mkoma, Txizimu txako, nene a na xayisa txitumelelano ni lirando, ali ene a nga xambanya ka vatate vako; 13se a na kuranda, a na kukatekisa, a na kumaha u anda, a na katekisa mihando ya mndani kwako, ni mihando ya mafu ako, mafaka ako, ni vhinya yako ya yiphya, ni mtona wako, ni sifuyo sako sa tihomu tako ta mikati, sifuyo sako sa sidotho, ka ditiko di a nga xambanya kuninga vatate vako. 14U na katekiswa ngutu kupinda vathu votshe. Ni wammweyo wa hagari kwanu kha na mbi va i di txifule, mwendo mbwamwamna mwendo mbwamsikati, hambi sihari sako so fuywa. 15Mkoma a na hambukisa kwako otshe makhombo; ni yotshe mitungu yo thisa ya Egipta, ayile u yi zivako; kha na mbi yi wisa txitimwi kwako, aniko a na wisa ka vale va ku vengako. 16Ngu kumha keto, u na fuvisa vathu votshe, vale Mkoma, Txizimu txako, a no va ningela kwako; diso dako di nga ve ni wumbilu ngu vona, kambe u nga khozele sizimu sawe, eto ti nga va i di litshenga kwako.
17Ngako u txi womba mbiluni kwako u txi khawe: “Mifumo yiya njayingi ngutu kupinda ani, ni nga yi xulisa kutxani kani?” 18U nga ve ni dizowa ngu vona! Alakanya kwati ati Mkoma, Txizimu txako, a nga maha ka Faro ni ka dotshe ditiko da Egipta. 19Sikarato sa hombe, asi maso ako ma nga si wona, sikombiso ni sidiwukiso, asile dianza do tsana ni diwoko do nawulutwa, adile Mkoma, Txizimu txako, a nga kuhumisa ngu dona. Mkoma, Txizimu txako, a na mahisa toneto ngu vale vathu u va thavako! 20Hahanze ka toneto, Mkoma, Txizimu txako, a na rumela mifi kwawe, kasi kulovisa vale va no sala, avale va nga sisala masoni kwako.
21U nga dhudhumele masoni kwawe, nguko Mkoma Txizimu txako, Njizimu txa hombe, kambe njo thisa.
22 Mkoma, Txizimu txako, kudotho-kudotho a na ma tshotsha hahanze matiko awa, me khukha masoni kwako; khu na mbi ma khundumusela otshe ngu diganda, kasi ku sihari sa txitinga si si andi, si mi randela. 23Se Mkoma, a na ma ningela manzani kwako: Ona ma nava ni pfilu-pfilu ya dizowa, kala me loviswa. 24Ene a na ningela vafumeli va ona manzani kwako, se awe u na pfhita matina awe hahatshi ka nzuma: Ni wammweyo kha na mbi tsana masoni kwako, kala u va fuvisa.
25Mi na hisa ha mndiloni sithombe sa sizimu sawe. U nga navele silivhela ni nzalama yile yi nga si fenengeta, kambe u nga si teke si maha sako, kasi u siwi ha litshengani, nguko nzimaha so nyenyeza ka Mkoma, Txizimu txako. 26Ngu kumaha keto, u nga wuletise simaha so nyenyeza nyumbani kwako: Nguko u nga nyenyeza nawe kumweko naso; u fanete ku si nyenya ngutu, mi txi va kule naso, nguko nzimaha sa manyala.
Currently Selected:
Dhewuteronome 7: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.