Dhewuteronome 8
8
Ditiko di di no honyolwa
1Mi na vekisa sotshe sirumo si nyamsi ni mi leletako, kasi ku mi txi si xayisa, ti to mi na hanya mi txi anda, mi txi wulela mi fuma ditiko di Mkoma, a nga thembisa ngu txixambanyo ka vatate vanu.
2Alakanya yotshe nzila yi Mkoma, Txizimu txako, a nga maha ti to u txi tsimbila ngu yona, mune wa magumi a malembe, txiwulani, kasi ku kukhozisa ni ku kuduka, ti to e ziva ati ti ku mbiluni kwako, ti to mwendo u na vekisa sirumo sakwe, niku khu na mbi si vekisa. 3#Wona ni ka: Mat. 4:4; Luk. 4:4. Se ene a mahile ti to u txi xaniseka, a ku lekile u di ni nzala, e kudyisa manna ale awe u nga ti si ma zivi, hambi vatate vako va ti si ma zive, kasi ku kukomba ti to m'thu kha hanyi ngu sakudya dwe, aniko m'thu a na hanya ngu totshe ti ti humako txisofuni ka Mkoma. 4Syambalo sako kha sa sakala ha mmidi kwako, hambi mikondo yako kha ya simba hagari ka ona malembeyo a mune wa magumi. 5Ngu mhaka yeto, ti zive mbiluni kwako ti to Mkoma, Txizimu txako, a na kutsayisa, kufana ni m'thu a layako mwanana wakwe. 6U na vekisa sirumo sa Mkoma, Txizimu txako, u txi tsimbila ngu tinzila takwe ni ku mthava. 7Wona, Mkoma Txizimu txako, a ku heleketako ka ditiko da dinene, ditiko do tala ngu sinambwana, ni sisima, ni maziva a mati, aale ma humako ma txi khulunga ngu mimangoni ni mu mikovani; 8ditiko di di pfunako fulaho ni sevhadha, da mivhinya ni mixanvu, ni miromani, ditiko da miolivha, ni mtona ni wulombe; 9ka ditiko di u no ya dya sakudya so mbi gumaka dona khu na mbi ya pwata txilo; ditiko di marigwi a kona i ku simbi, mimangoni ka dona u no kela koporo. 10U na ya mana sotshe, u txi dya u txi khura, kambe u na ya bonga Mkoma, Txizimu txako, ngu mhaka ya ditiko di da dinene a nga kuninga.
Txiziviso txo sola kutikulisa
11Zumba u txi ti wonela u si divali Mkoma, Txizumu txako, u txi vekisa sirumo sakwe, ni mithetho yakwe, ni milayo yi nyamsi ni ku ningako; 12ngako u di dyite u khura, u txi maneka u di akile tinyumba ta tinene u zumba ka tona, 13se ngako tihomu tako ni tinvuta tako ti di andile, u txi talelwa ngu silivhela ni nzalama, ni sotshe si u ku naso i di sasingi, 14mbilu yako yi nga ti kukumukise, se u divala Mkoma, Txizimu txako, awu a nga kuhumisa ditikoni ka Egipta, ka nyumba ya wukhumbi; 15awule a nga kutsimbilisa ngu mu ka txiwula txa hombe txo thisa, txo tala ni minyoka ya wuxungu, ni tihume ni mu ka ditiko do mbi na mati, a ku humisete mati ngu ka dirigwi do banga; 16awule a nga kudyisa manna txiwulani, aale vatate vanu va nga mbi ma ziva, na a txi mahela ku kuxanisa ni ku kuduka, kasi ku a txi ku mahela ta tinene;
17ngu toneto, u nga wombe mbiluni kwako u txi khawe: “Mtamo wangu ni mtamo wa manza angu, ngu wona wu nga ni manisa thomba yiya.” 18Alakanya Mkoma, Txizimu txako, nguko ngene a ku ningako mtamo wa kumana thomba, na a txi mahela kutsanisa txitumelelano txi a nga xambanya ka vatate vako, nga ti nyamsi u ti wonako.
19Aniko, ngako u txi divala Mkoma, Txizimu txako, u londetela simwani sizimu, u txi si thumela ni ku si khozela, ani na tsanisa nyamsi masoni kwako ti to mi na lova kha ditshuri. 20Mi na lova nanu, kufana ni matiko awa Mkoma a nga ma lovisa masoni kwanu, nguko anu kha ma engisa dipswi da Mkoma Txizimu txanu.
Currently Selected:
Dhewuteronome 8: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.