Dhewuteronome 9
9
Kwa mbi engisa ka vathu
1Awe Israyeli, engisa:
Nyamsi u na txhatuka mnambo wa Jordhani, kasi kuya khozisa mifumo ya hombe ngutu, ni mtamo wa hombe kupinda awe, ni madhoropa a hombe o bhiywa ngu diguma do lapha kala nzumani. 2Vathu va kona mba hombe, kambe va laphile, mbanana va Anaki, ava u va zivako, avava u nga engisa nduma yawe, va txi kha vona: “I mani a ndi no ema, masoni ka vanana va Anaki kani?” 3Ngu toneto, ti zive nyamsi ti to Mkoma, Txizimu txako, ngene a no thangela masoni kwako, kufana ni mndilo wo hisa; ngene a no lovisa ni ku va fuvisa masoni kwako. Sekoko awe u na va hinga, u txi va fuvisa, nga ti Mkoma, a nga womba.
4Ngako koko Mkoma, Txizimu txako, a di va tutumisile masoni kwako, u nga wombe mbiluni kwako u txi khawe: “Mkoma a ni fumisile ka ditiko diya, ngu mhaka ya kululama kwangu,” nguko Mkoma a tutumisa matiko awa ngu mhaka ya kubiha ka ona. 5Hi nga ngu mhaka ya kululama kwako, kambe hi nga ngu mhaka ya wunene wa mbilu yako, aku u ngaza u wulela, u teka ditiko dawe, aniko Mkoma a tutumisa matiko awa masoni kwako, ngu mhaka ya kubiha ka ona; ni ti to a maha tiya, kasi kutsanisa dipswi di ene a nga xambanya ka vatate vako, Abrahamu, Isaake, ni Jakobe. 6Ti zive koko tito, Mkoma, Txizimu txako, kha ku ningi walo ditiko diya da dinene, di maha dako, nguko anu va ka Israyeli, mi vathu va misungo yo banga.
7Alakanya, u nga divale ti to u henyisile Mkoma, Txizimu txako, kona txiwulani. Kukhukhela ka ditshiku di u nga huma ditikoni ka Egipta, kala u hoka ka wuwa wukhalo, mi vathu va kanu masoni ka Mkoma; 8hambi ni mmangoni ka Horebhi, mi henyisile Mkoma; Mkoma eza e henya ngu nganu, aha koza e lava ku mi lovisa. 9#Wona ni ka: Eks. 24:18. Mbimo yi ani ni nga kwela kasi kuya amukela sileti simbidi sa marigwi, sileti sa txitumelelano, atxi Mkoma a nga maha kumweko ni nanu, sekoko ni ti ya zumba mmangoni, mune wa magumi a masiku, ni mune wa magumi a wusiku, ni sidyi dipawu, hambi kusela mati. 10Mkoma a ni ningile sileti simbidi sa marigwi, so bhalwa ngu litiho la Txizimu; txitimwi ka sona ku ti ti bhatwe otshe mapswi awa Mkoma a nga ma womba kwanu mmangoni, adi hagari ka ndilo, ngu ditshiku da msengeletano.
11Ku to maheka taku, msana ka mune wa magumi a masiku, ni mune wa magumi a wusiku, Mkoma e ni ninga sileti simbidi sa marigwi, sileti sa txitumelelano. 12Konako Mkoma a ni gete a txi khene: “Khukha, relela konkuwa, nguko vathu vako, avale u nga va humisa ditikoni ka Egipta, se va mahile kubiha; va kuluvetile kuleka nzila yi ani ni nga va leleta; va ti mahete txithombe txo tshulwa!” 13Mkoma a to engeta a txi khene: “Ni woni to vathu vava, mbathu va dihanyo do biha. 14Ni leke ni va lovisa, ni fuvisa ditina dawe hahatshi ka nzuma; ni na maha ngu ngawe mfumo wa mtamo ngutu, ni kutala kupinda vona.”
15Ni to tshumela ni relela ngu mmangoni, mmango wu ti ti tura ngu mndilo; se sileti simbidi sa txitumelano si ti ti manzani kwangu. 16Ni woni ti to kha ditshuri, mi onhile ka Mkoma, Txizimu txanu, ngu ku ti mahela dirole da simbi yo tshulwa, mi kuluveta ku ti hambukisa ka nzila yi Mkoma a nga mi leleta. 17Konako, ni to teka sileti sile sa simbidi, ni si rinza ngu manza angu a mambidi, ni si faya masoni kwanu. 18Ni to ti wisa kambe masoni ka Mkoma, nga txikhati txo khata, ni heta mune wa magumi a masiku, ni mune wa magumi a wusiku, ni sidyi dipawu, ni si seli mati, ngu mhaka ya txionho txiya txa hombe, txi mi nga txi maha, ngu kumaha ati i ku to biha masoni ka Mkoma, mi txi mu henyisa. 19#Wona ni ka: Vaheb. 12:21. Nguko ani ni ti ni dizowa ngutu ngu mhaka ya kuhenya ni txiviti txa Mkoma, a nga ti mi henyela, aha koza e lava ku mi lovisa. Hambi keto, Mkoma a ni engisile kambe ka txiya txikhati. 20Mkoma a ti henyile kambe ngu mhaka ya Aroni, a txi lava ku mlovisa; aniko ka txonetxo txikhati, ni kombete kambe ngu Aroni. 21Kambe ni tekile txionho txanu, i ku dirole di mi nga ti di wumbile, ni txi di hisa ngu mndilo, kambe ni txi di rukuta, ni txi di kuya khakwati, kala kuza di txi maha mpupu; se mpupu wa kona ni wu xwayile ka txinambwana, txile txi nga ti relela ngu mmangoni.
22 # Wona ni ka: Eks. 17:7; Mit. 11:3,34. Kambe mi henyisile Mkoma, kona Tabhera, ni Masa, ni Kibroti-Hatahava. 23#Wona ni ka: Mit. 13:17,30; Dhewut. 1:21,26. Mbimo yile Mkoma a nga mi ruma kukhukhela Kadhesi-Bharneya, a txi khene: Kwelani mi ya teka ditiko di ni nga mi ninga, mi kanetile. Mbimo yile Mkoma, Txizimu txanu, a nga mi ruma, mi si kholwi, mi si engisi dipswi dakwe. 24Anu mi vaeyisi ka Mkoma, kukhukhela ka ditshiku di ni nga khata ku mi ziva.
Mosi e kombelela vathu
25Ngu mhaka yeto, ani ni to khizama masoni ka Mkoma, ni ti veka hahatshi, ni heta mune wa magumi a masiku, ni mune wa magumi a wusiku, ni txi mi khongelela, nguko Mkoma a ti ti khene a na mi fuvisa. 26Ni to khongela ka Mkoma ni txi khani: Mkoma Txizimu, u nga lovise vathu vako, ni thomba yako, ngawe u nga va tirula ngu wuhombe wako, u txi va humisa ditikoni ka Egipta, ngu dianza dako da mtamo. 27Alakanya sithumi sako, Abrahamu, Isaake ni Jakobe; u nga wone kubanga ka timbilu ta vathu vava, hambi wubihi wawe, ni txionho txawe. 28Kasi ku vathu va ditiko dile u nga hi humisa ka dona, va si wombi va txi kha vona: “Mkoma a tandekile ku va hokisa ka ditiko dile a nga va thembisa”; ene, “ngu mhaka ya livengo navo, a va humisile kasi kuya va daya txiwulani.” 29Aniko, vona mbathu vako ni thomba yako; awe ngawe u nga va humisa wukhumbini, ngu mtamo wako wa hombe, ni diwoko dako da wundena.
Currently Selected:
Dhewuteronome 9: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.