Vaefesu 1
1
Kulosa
1 # Wona ni ka: Mith. 18:19-21; 19:1. Ani Paulo, mpostoli wa Jesu Kristu ngu kuranda ka Txizimu, ni bhalela vasawuleki va Efesu, va thembekako ngu ka Kristu Jesu; 2kateko ni kudikha si nave ni nanu, si txi ta ngu ka Txizimu Tate wathu ni Mkoma Wathu Jesu Kristu.
Makatekwa a ka moya
3Txi na dhumiswe Txizimu Tate wa Mkoma wathu Jesu Kristu, txi nga hi katekisa ngu makatekwa a moya wa nzumani, ngu ka Kristu. 4Ngu kota yakwe, Txizimu txi hi sawute, di sinzi kumahwa ditiko, kasi ku hi txi mana wululami wa lirando ni kuzumba hi si nga ni txisolo masoni ka txona. 5Ngu txona Txizimu txi nga hi sikela ngu kale ti to hi na maha vanana va txona, va mafuyiwa, ngu Jesu Kristu, ngu wunene wa kuranda ka txona, 6kasi ku hi txi pfalisa Txizimu ngu wudhumo wa tikateko ta txona, hi nga ningwa ngu Mwanana wa txona wo randeka. 7Hi mani kutirulwa ngu ngene, hi mani divalelo ya sionho ngu mhaka ya mnoha wakwe, i ku kudivalelwa ka sionho sathu, ngu mtamo wa kutala ka tikateko ta Txizimu, 8txi nga thela ngu kuenelela mimoyani kwathu ngu wuzivi wa hombe ni kupima; 9txi hi ninga kuziva makungo a kusisaleka a kuranda ka txona, kota nga ti ti nga txi tsakisa ku ti maha, ngu kale ni kale ngu ka Kristu, 10ati ti nga ti fanela kumaheka kutatisekani ka mbimo: Ti to txi tshanganisa Mfumoni ka Kristu sotshe si si ku nzumani ni si si ku ha mafuni. 11Ngu ngene Kristu kambe, Txizimu nathu txi hi mahile vadyi va thomba ya Txona, nga ti txi nga ti wonisa tona txona txi kotako totshe ngu mtamo wa kuranda ka txona, 12kasi ku hi txi kulisa wudhumo wa txona, ni kupfaliswa ka txona athu hi nga txi verela Kristu ngu kale.
13Nananu, ngako mi nga engisa dipswi da ditshuri, i ku Evhangeli ya kuhanyiswa kwanu, ngako mi nga kholwa ka dona dipswi dile, mi bhatwe ngu txixambanyo txa Moya wo Sawuleka, wu nga ti thembisilwe, 14awu i ku txitsaniso txa thomba yathu, ayi hi no yi mana, ditshiku di Txizimu txi ningako kukhululeka ko gwitisa ka vava i ku va txona, ku mahela ti to ve pfalisa wudhumo wa txona.
Mkombelo wa kubonga
15Ngu toneto, nani, txima ni pfa mhaka ya kukholwa kwanu ka Mkoma Jesu ni lirando lanu ka vasawuleki votshe, 16kha ni leki kubonga ngu kota yanu, na ni txi mi alakanya mikombeloni kwangu. 17Na kombela ka Txizimu txa Mkoma wathu Jesu Kristu, Tate wa wudhumo, ngu wuzivi wa txona, txi mi ninga moya wa wutxhari ni mtuletelo; 18txi woninga timbilu tanu, kasiku mi ziva ti to njithembiso muni atxiya mi dhanelwako txona ngu Txizimu, ni ti to wu talisite kutxani wudhumo wa thomba ya Txizimu, ayi txi nga mi vekela kumweko ni vasawuleki; 19mi ziva kambe tito, kwathu makholwa, mbwa hombe ngutu mtamo wa txona, nyala ni mtamo wa Txona wa hombe, 20#Wona ni ka: Mas. 110:1. awu Txizimu txi nga wu wonekisa ka Kristu, ngu ku mu wusa ka vakufa, txi txi m'khalahatshisa txineneni ka txona nzumani, 21txitimwi ka votshe va va nga ningwa kufuma ni mtamo ni wuhombe ni wukoma, ni txitimwi ka otshe matina awa ma khumbukwako ka txikhati txa nyamsi ni txa mbimo yi yi tako. 22#Wona ni ka: Mas. 8:6; Vakl. 1:18. Hahatshi ka mikondo ya Kristu, Txizimu txi vekile sotshe simaha, kambe txi mmahile Msungo wa dotshe Dibanza, 23adiya i ku mmidi wakwe, dona Dibanza diya di ningwako kuhetiseka ngu Kristu, i ku ene a ningako kuhetisela ka sotshe simaha.
Currently Selected:
Vaefesu 1: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.