Vagalatiya 6
6
Rwalelanani mirwalo yanu
1Vanathu, ngako m'thu a txi maneka a di mahile ta walo, anu mi ku vavanene, m'ziviseni kha kwati, na m'thu ni m'thu a txi ti wonela, kufela kunene asi wi mu kudukwani. 2Vhunanani kurwala mirwalo yanu, kasiku mi na sikota kuveketa Mlayo wa Kristu. 3Nguko, ngako m'thu a txi pimisa ti to njilo, na i si nga txilo, wo ti xenga apune. 4Aniko m'thu ni m'thu a na wonisise mithumo yakwe, se ngu kona a no sikota ku ti dhumisa ngu mithumo yakwe dwe, i si nga ngu ku ti dinganisa ni vamwani; 5nguko m'thu ni m'thu a na rwala thundu yakwe.
6Awule a gondiswako Dipswi, a na abane ni m'gondisi wakwe sotshe sa sinene si a ku naso.
7Mi nga ti xengeni. Txizimu kha txi sakanelwi. M'thu ni m'thu a na elula asi a phayako. 8Awule a phayako so tsakisa mtumbuluko wakwe wa nyama, a na elula so sina si humako ka mtumbuluko wakwe wonewo; aniko awu a phayako so tsakisa Moya, a na elula asi si humako ka wona Moya, i ku wutomi wo mbi guma. 9Hi nga rerekeni kuthuma ta tinene, nguko ngu mbimo ya kona, hi na elula, ngako hi txi timisela. 10Ngu konaho, he maheni wunene ka votshe vathu, na hi di ngadi ni mbimo, ngutu-ngutu ka makholwa kulothu.
Sileleto so gwita ni madingula
11Hi ngani wona ti li nga kulisa tona lyanza li ni mi bhalelako ngu lona. Ngani nipune ni litsako ngu dianza dangu. 12Avale va lavako ku ti maha vavanene masoni ka vathu, evo ngu vona va mi kurumetako kuyiswa wukwerani. Va maha eto kufela ku va si xaniswi ngu mhaka ya txihambano txa Kristu; 13nguko hambi vona va va ti yisako wukwerani kha va veketi mlayo. Aniko va navela ku mi yisa wukwerani, kasiku ve ti dhumisa ngu nyama yanu. 14I di ani, ti nave kule ni nani ku ti dhumisa ngu txilo tximwani, hahanze ka txihambano txa Mkoma Wathu Jesu Kristu. Kunene, ngu mhaka ya txihambano, kwangu, ditiko di bethetwe ha txihambanoni. 15Ngu toneto, wukwera hi nga txilo, wukhutu ni wona hi nga txilo. Mhaka ya hombe ngu kuhunduluka hi maha txivangwa txa txiphya. 16Kurula ni wumbilu si nave txitimwi ka votshe vale va hanyako wutomi wawe madingano ni mlayo wuwa, ni ka votshe vanana va ka Israyeli wa Txizimu.
17Kukhukhela konkuwa, m'thu a nga thuke a txi ni karata, nguko ha mmidi kwangu, nina ni timbirimbi ta silonda si ni nga si mana ngu mhaka ya Jesu.
18Makatekwa a Mkoma Wathu Jesu Kristu ma nave ni nanu, vanathu. Amen.
Currently Selected:
Vagalatiya 6: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.