Ezekhiyele 10
10
Wudhundo wa Txizimu wa leka Dithepele
1 # Wona ni ka: Eze. 1:26; Mtu. 4:2. Msana keto, ni to wona ndengalenga ya txitimwi ka misungo ya makerubhima, yi to woneka txitimwi kwawe ni dirigwi da safira, do wonekisa kufana ni txitulu txa wukoma. 2Se a to womba ka wamwamna wule wo ambala sa linyu, a txi khene:
Pinda ngu hagari ka madangarita, kala hahatshi ka dikerubhima, u tata manza ngu makala o tura hagari ka makerubhima, se maxwaye didhoropani.
Se ene a to wulela ni txi muwona. 3Kambe makerubhima ma ti ti ka didhawa da txinene da nyumba, mbimo yile a nga wulela awule wa wamwamna; direfu dokari di to tata muhubhe wotshe. 4Sekoko wudhundo wa Mkoma wu to khukha ngu txitimwi ka makerubhima, wu txi ya txikenini ka nyumba; se nyumba yi to tatwa ngu direfu, ni muhubhe wu to tala ngu kuphatima ka wudhundo wa Mkoma. 5Se diguwa da tibhapi ta makerubhima di to pfala kala ka muhubhe wa hahanze, kufana ni dipswi da Txizimu txa Mtamo-wotshe txi txi womba-womba.
6Se ku to maheka koko taku Mkoma a txi ruma wamwamna wule a nga ti ambate sa linyu a txi khene: Hala mndilo wa hagari ka madangarita, a hagari ka makerubhima, ene a to wulela eya maneka hagari ka madangarita. 7Sekoko dikerubhima dimwedo di to nawuluta dianza ngu hagari ka mamwani makerubhima, ka mndilo wule wu nga ti ti hagari ka makerubhima; se di to hala di txi wu thela manzani ka wule a nga ti ambate sa linyu, ene a to wu amukela e huma.
8Se ka makerubhima ku to woneka txo fana ni dianza do nga da m'thu ngu hahatshi ka tibhapi ta ona. 9Sekoko ni to wona mune wa madangarita hafuhi ka makerubhima, didangarita dimwedo hafuhi ka dikerubhima dimwedo ni dimwedo; se mawonekelo a madangarita ma ti ti nga mxowo wa dirigwi da lisima. 10Se ngu mawonekelo a ona, otshe madangarita amune ma ti ti fana; ma ti ko ngako va ni didangarita hagari ka dimwani. 11Ma txi tsimbila makerubhima, ni ona madangatira ma ti ti tsimbila ka mune wa madhawa; ma ti si tshemberekeli ma txi tsimbila, aniko ma ti tikomba khe msungo wu nga ti ti rendekete kona; ma ti si tshemberekeli ma txi tsimbila. 12Kambe wotshe mmidi wa makerubhima ni misana ya ona, ni manza a ona, ni tibhapi ta ona, se ni madangarita a ona, madangarita ale mune wa makerubhima ma nga ti nawo, ma ti randetwe ngu maso amangi. 13Se ma to raywa madangarita awa ni txi tiengisa ani, taku kutshemberekela.
14Se dikerubhima dimwedo ni dimwedo di ti ti ni mune wa tikhohe: Khohe ya do khata i ti ti ya dikerubhima, khohe ya da wumbidi i ti ti ya m'thu, khohe ya da wuraru i ti ti ya ngonyamo, se khohe ya wumune i ti ti ya digama. 15Se makerubima ma to guleka meya txitimwi; asiya ngu sona sihari sile ni nga si wona hafuhi ni mnambo wa Kebhari. 16Se ma txi tsimbila makerubhima, madangarita ni ona ma ti tsimbila; se makerubhima ma txi guleta tibhapi ta ona, kasi ku ma txi guleka ngu ha mafuni, ni ona madangarita ma ti si ti hambanisi nawo. 17Ma txi ema makerubhima, ni ona madangarita ma ti ko ema, ma txi guleka, ni ona ma ti ko guleka, nguko moya wa wutomi wu ti tiho ka madangarita ale.
18Sekoko wudhundo wa Mkoma wu to khukha ngu ha txikeni ka nyumba, wu txi ta ema txitimwi ka makerubhima. 19Se makerubhima ma to guleta tibhapi ta ona, me guleka ngu ha mafuni, na ni txi ma wona, mbimo yile ma nga khukha; se madangarita ma to ma heleketa ma txi ta ema ka txike txa didhawa da wutxani ka Nyumba ya Mkoma; se wudhundo wa Txizimu txa Israyeli, wu ti ti ngu txitimwi ka ona. 20Asiya ngu sona sihari si ni nga si wona hahatshi ka Txizimu txa Israyeli, hafuhi ni mnambo wa Kebhari, se ni si zivile taku i ti ti makerubhima.
21Dikerubhima dimwedo ni dimwedo di ti ti ni mune wa tikhohe, ni mune wa tibhapi, ni sa kufana ni manza a m'thu, ngu hahatshi ka tibhapi ta ona. 22Se tikhohe tona ti txi fanana ni tile ni nga ti wona hafuhi ni mnambo wa Kebhari; ti di ni mawonekelo mamwewo, i ti ka so va tona tipune; dimwedo ni dimwedo ti ti tsimbilela ha di nga rendekela kona.
Currently Selected:
Ezekhiyele 10: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
