Ezekhiyele 9
9
Kutsayiswa ka Jerusalema
1Sekoko Mkoma a to kwangula ngu dipswi da hombe tinzeveni kwangu, a txi khene:
Tisani vatsayisi va didhoropa, mmweyo ni mmweyo ni matxhari akwe manzani, o khundumusa ngu ona.
2Wona taku ku ti ti ta mtxhanu wa vavamna ni mmweyo ngu nzila ya ditimba do guleka, do rendekela wuphemba, mmweyo ni mmweyo ni matxhari akwe manzani, o khundumusa ngu ona, se hagari kwawe ku ti ti ni wamwamna a nga ti ambate sa linyu, ni txiya txi nga ti ti ni so bhala ngu sona; se va to wulela veya maneka hafuhi ni txiluvelo txa koporo.
3Se wudhundo wa Txizimu txa Israyeli, wu to khukha ngu ka dikerubhima dile wu nga ti ti ka dona, kala txikenini ka nyumba; wu to kwangula ka wule a nga ti ti ambate sa linyu, a nga ti ti ni txiya txa so bhala ngu sona, txiwununi.
4Se Mkoma a to khene kwakwe: Tsimbila ngu hagari ka didhoropa, ngu hagari ka Jerusalema, u veka sikombiso ka timbanza ta vavamna vale va ku ni mahika, va dilako, ngu mhaka ya otshe manyala ale ma mahekako hagari ka didhoropa.
5Se Mkoma a wombile ka vamwani, na ni txi tipfa nani:
Mlondeteleni ngu msana didhoropani muwa, mi txi va xasela; wonisisani kha kwati, kambe mi nga va maheleni wumbilu. 6Dayelani sikosana ni vavaphya, ni timbiri, ni sifanyana, ni vavasikati, kala ku va fuvisa; aniko votshe vavamna vale va ku ni txikombiso, mi nga va gweseni; kambe khatelani wukhaloni kwangu ko sawuleka.
Se va to khata ngu vavamna vale va sikosana, va nga ti ti masoni ka nyumba.
7Se a to va gela ku khene:
Nyenyezisani nyumba, mi tata mithanda ngu sirumbi, se mi huma.
Se va to huma ve xasela didhoropa.
8Ku to maheka koko taku, na va di va dayete, se ni sala ani nokha, ni to wa ngu khohe, ni dila, ni txi khani: Yowe! Mkoma Txizimu! U ni mhaka yo lava kufuvisa Vaisrayeli vale va nga sala, ngu kutheketa kuhenya kwako, txitimwi ka Jerusalema kani?
9Sekoko a to ni gela ku khene:
Wubihi wa nyumba ya Israyeli ni ya ka Judha mbwa hombe ngutu, ditiko di tate ngu mnoha, ni didhoropa di tate ngu wukanganyisi; vona va kha vona: Mkoma a lekile ditiko. Mkoma kha woni. 10Kwangu koko, ngu dangu didhawa, diso dangu kha di na mbi tsetsa, kambe kha ni na mbi maha wumbilu; mithumo yawe yo biha yi na wa txitimwi ka misungo yawe.
11Se wona taku wamwamna wule a nga ti ti ambate sa linyu, eyo libhandi la kona li nga ti ti ni txiya txa so bhala ngu sona, a to tshumela ni xamulo yo khene: Ni mahisile tona ti u nga ni rumisa tona.
Currently Selected:
Ezekhiyele 9: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
