Ezekhiyele 12
12
Mprofeti a txi nga muluveli
1Se dipswi da Mkoma di tile kwangu, di txi ta kha dona:
2Awe mwanana wa m'thu, u zumba hagari ka vathu va kutitsimba, va maso o dingana kuwona aniko kha va woni, kambe va ni tinzeve to dingana kuengisa aniko kha va engisi; nguko i nyumba ya kutitsimba.
3Awe koko mwanana wa m'thu, lulamisela siya u na rura ditikoni, se ni mitshikari u na khukha ka wukhalo wako, va txi kuwona; se ngu ka wukhalo wako, u na khukha uya ka wumwani wukhalo, va txi kuwona; ti nga koteka kuva txi ti wona kha kwati eto, hambiko i ku va nyumba ya kutitsimba. 4Na va txi ti wona koko, u na thavisa siya sako nga wolava kurura; sekoko u na khukha ni wusiku va txi kuwona, nga wule a khukhako ka wukhalo a txi ya ka wumwani. 5Dhoda diguma na va txi kuwona, u humisa siya. 6U na si pakata na va txi kuwona, kambe u na si thavisa ku di phumile, na u di tsivile khohe, kasi ku u si woni mafu; nguko ni ku ningete ku va txikombiso txo xamalisa, nyumbani ka Israyeli.
7Ni mahile tiya nga ti ni nga rumiswa tona: Ni thavisile thundu yangu ni mitshikari, nga no lava kurura; sekoko ni minova ni to dhoda diguma ngu manza angu; ni txi si thavisa na ku di phumile, ni si pakata, na va txi ni wona.
8Se di tile kwangu dipswi da Mkoma, ni mixo, di txi ta kha dona:
9Awe mwanana wa m'thu, ina kha va ku wotisi va nyumba ya ka Israyeli kule i ku nyumba ya kutsitsimba, va txi kha vona: Wo maha txani kani? 10Va gele ku khawe: Mkoma Txizimu a khene: Mrwalo wuwa wu komba mthangeli wa Jerusalema, ni yotshe nyumba ya ka Israyeli yi ku hagari. 11Womba ku khawe: Ani ngani txikombiso txanu txo xamalisa. Nga tona ti ni nga mahisa tona, va na mahiswa tona eto ni vona; va na ya luvela wukhumbini. 12Se mthangeli wule a ku hagari kwawe a na pakata siya, ku di phumile e huma; va na dhoda diguma va txi si thavisa; va na tsiva maso awe, kasi ku va si woni mafu. 13#Wona ni ka: 2 Vafu. 25:7; Jer. 52:11. Kambe ni na mu riyela ngu mlawu, a na bzwetwa ngu mlawu wangu; se ni na mtsulisa Bhabhilona, ditikoni ka Vakaldheya, aniko kha na mbi di wona, hambiko a no ya fela kona. 14Se votshe vale va no maneka hafuhi kwakwe kasi ku mlamulela, ni masotxhwa akwe, ni na va hangalasa ka otshe madhawa; ni na va tutumisa ngu ditxhari.
15Ngu toneto, va na tiziva taku ani ngani Mkoma, mbimo yile ni no va hangalasa hagari ka matiko, ni txi va wavalasa mafuni. 16Aniko, hagari kwawe ni na siya vokari, vo huluka ka ditxhari, ka nzala ni mtungu, kasi ku va na xawutela manyala awe ka matiko ale va no ya ka ona; se va na tiziva taku ani ngani Mkoma.
Kuthava kukhundumuswa
17Sekoko di tile kwangu dipswi da Mkoma, di txi ta kha dona:
18Awe mwanana wa m'thu, u na dya dipawu dako u txi thava, ni mati u na ma sela ngu kudhudhumela ni dizowa. 19Se u na khawe ka vathu va ditikoni: Mkoma Txizimu a womba tiya madingano ni vazumbi va Jerusalema, ditikoni ka Israyeli: Va na dya dipawu dawe ngu kuthava, kambe va na sela mati ngu kudhukadhuka, sekoko ditiko dawe di na handwa amu kupfunani ka dona, ngu mhaka ya kulwa ka vale va zumbako ka dona. 20Kambe madhoropa ma ku ni vathu ma na fuviswa, se mafu ma na maha sisapa; se mi na tiziva taku ani ngani Mkoma.
Siprofeto si na tatiseka
21Di tile kambe kwangu dipswi da Mkoma, di txi ta kha dona:
22Awe mwanana wa m'thu, divingu muni mi ku nado ditikoni ka Israyeli, daku khanu: Masiku ma na lapha, si na mwalala sotshe siwoniso kani? 23Sekoko va gele ku khawe: Mkoma Txizimu a khene: Ni na fuvisa mawombelo awa, kha ma na mbi va mavingu kambe ka Israyeli; aniko va gele ku khawe: Ma hokile masiku ni dipswi da sotshe siwoniso.
24Nguko kha ku na mbi maneka kambe ni txa tximwetxo txiwoniso txa walo, hambi kuxaxuva ka walo, hagari ka Israyeli. 25Nguko ani Mkoma, ni na womba-womba, ati ni no womba ti na maheka; kha ti na mbi swela; nguko ka masiku anu, anu va nyumba ya kutitsimba, ni na womba mhaka, kambe ni na yi maha, kuwomba Mkoma Txizimu.
26Di tile kambe kwangu dipswi da Mkoma, di txi ta kha dona:
27Awe mwanana wa m'thu, wona taku va nyumba ya ka Israyeli, va kha vona: Txiwoniso txi a txi wonako wuwa, nja masiku amangi, kambe a profeta ngu timbimo ti tiku kule. 28Sekoko va gele ku khawe: Mkoma Txizimu a khene: Kha ku na mbi swela kambe ni dimwedo ka mapswi angu, se dipswi di ni ngadi womba di na maheka, kuwomba Mkoma Txizimu.
Currently Selected:
Ezekhiyele 12: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
