Ezekhiyele 13
13
Vaprofeti va makuhu
1Se di tile kwangu dipswi da Mkoma, di txi ta kha dona:
2Awe mwanana wa m'thu, profeta u wukela vaprofeti va ka Israyeli, va profetako, u txi womba ka vale va profetako ti ti wonwako ngu timbilu tawe, u txi khawe: Engisani dipswi da Mkoma.
3 Mkoma Txizimu a khene:
Dikhombo ka vaprofeti vo hundeka, va londetako kuranda kwawe vapune, ni ti va nga mbi ti wona! 4Vaprofeti vako awe Israyeli, va fana ni vanyapwe va di siwulani. 5Kha ma kwelela kuya tsiva matshoko, kambe kha ma lema tifa ta nyumba ya ka Israyeli, kasi ku mi txi ya maneka kulwani ngu ditshiku da Mkoma. 6Va wona kwa mbi nyawula ni kuhutetela ta makuhu, vale va ku kha vona: Mkoma a wombile; na kuve Mkoma kha va ruma; ve maha tile to ku na verelwe kumaheka ka tile ti nga wombwa. 7Mi nga woneni siwoniso sa kwa mbi yawula, kambe mi nga huteteleni ta makuhu mi txi khanu: Mkoma a wombile, na kuve to nga eto kha na womba.
8Ngu tona eto, Mkoma Txizimu a khene:
Ngako mi wombawombako ta manyala ni kuwomba makuhu, ngu toneto, ani na mi wukela, kuwomba Mkoma Txizimu. 9Se dianza dangu di na lwisa vaprofeti vale va wonako ta manyala ni kuhuta makuhu; kha va na mbi maneka ka msengeletano wa vathu vangu, kambe kha va na mbi bhalwa ka nyumba ya ka Israyeli, hambi kuwulela ditikomi ka Israyeli; se mi na tiziva taku ani ngani Mkoma Txizimu.
10Ti komba taku ina, tikomba taku va xenga vathu vangu, va txi kha vona: Kuthuthile, na ku si nga ni kuthutha; se mmwani a aka diseta ngu ndope, kambe vamwani va txi di kopola ngu txitsowo, 11gela vale va kopolako ngu txitsowo u txi khawe txi na wa. Ku na wa mati a hombe, se anu mabwinzi a hombe a maralala mi na wa, ni moya wo juja ngutu wu na bhandelela diseta. 12Wonani taku di txi wa diseta, kha va na mbi mi gela ku kha vona: Ma hayi mafu ale mi nga kopola ngu ona kani?
13Ngu mhaka yeto Mkoma Txizimu a khene:
Moya wo juja ngutu wu na bhanda diseta ngu kuhenya kwangu, kambe ma na wa mati a hombe ngu mu ka txiviti txangu, ni mabwinzi a hombe a maralala ngu mu ka kuhenya kwangu, kasi ku di tshokomisa. 14Se ni na wisa diseta di mi ngadi kopola ngu txitsowo, kambe ni na di khundumusa ni di wisa hahatshi, ni sitsaniso sa dona si na sala hahanze; di na wisa tona tiya, kambe anu mi na mwalala hagari ka dona, mi na tiziva taku ani ngani Mkoma.
15Ngu kumaha keto, kuhenya kwangu ku na woneka ha disetani, ni ka vale va di kopolako ngu txitsowo, ni na mi gela ku khani: Diseta kha di nga nga diho, hambi ni vale va ngadi kopola, 16vaprofeti va Israyeli va profetako ngu Jerusalema, na va txi wona txiwoniso txa kuthutha, na ku si nga ni kuthutha, kuwomba Mkoma Txizimu.
Vaprofeti va makuhu va txisikati
17Se awe mwanana wa m'thu, rendekelisa khohe yako ka vanana vamahorana va vathu vako, va profetako to lavwa ngu timbilu tawe, profeta u va wukela, 18u txi khawe: Mkoma Txizimu a khene: Dikhombo ka vale va rungako simasa so veka mikhatani kwawe kotshe, ni ku tshawunyetisa mafadhuko ka misungo ya sotshe sithombe, ngu kuxota mihefemulo! Ina mi na thuka mi xota vathu vangu, mi txi xayisa yanu mihefemulo kani? 19Anu mi ni poyite hagari ka vathu vangu, ngu sevhadha ya yidotho, ni sikhwemu sa mapawu, kasi kudaya mihefemulo yi yi nga si dingani kufa, ni kuxayisa mihefemulo yile yi nga si dingani kuhanya, mi womba makuhu ka vathu vangu, va engiselako makuhu.
20Ngu kumaha keto, Mkoma Txizimu a khene:
Nata kheyo, ku ta thavisa sikhigelo sanu, asile anu mi xotako mihefemulo nga ova sinyana, se ni nata si honyola mawokoni kwanu; ni nata txhatxhisa mihefemulo yile mi yi xotako nga ova sinyana. 21Se ni na bhandelela masilika anu, kambe ni na txhatxhisa vathu vangu manzani kwanu, kha va na mbi ngadi ve maneka kambe manzani kwanu, kasi kuva txi xotwa; se mi na tiziva taku ani ngani Mkoma.
22Nguko mi pandisile mbilu ya wo lulama ngu wukanyisi wanu, na ani ni sa mpandisekisa, kambe mi tsanisile manza a wa kubiha, kasi ku asi humi ka nzila yakwe yo biha a txi hanyiswa, 23ngu kumaha keto kha mi na mbiswa mi di wona manyala kambe, kambe kha mi na mbi ngadi mi hutetela; aniko ni na txhatxhisa vathu vangu manzani kwanu, se mi na tiziva taku ani ngani Mkoma.
Currently Selected:
Ezekhiyele 13: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
