Ezekhiyele 14
14
Kutsayiswa ka vale va khozelako sithombe
1Se va to ta vathu vokari va madhota a ka Israyeli, va txi ta khalahatsha masoni kwangu. 2Sekoko dipswi da Mkoma di txi ta kwangu, di txi ta kha dona:
3Awe mwanana wa m'thu, vathu vava ngu timbilu tawe va themba sithombe sawe, ni wubihi wawe va wu vekile masoni kwawe; ina ni dingana kuwotiswa ngu vo nga vona kani?
4Ngu kumaha keto, womba-womba navo u txi va gela tiya: Mkoma Txizimu a khene: Ni wihi wamwamna wa nyumba ya ka Israyeli a no tiemisela txithombe mbiluni kwakwe, e teka wubihi wu maha txitsha masoni kwakwe, a txi ta ka mprofeti, na ni txi mmona ani Mkoma, ni na mxamula madingano ni kutala ka sithombe sakwe; 5kasi kuñola nyumba ya ka Israyeli mbiluni kwakwe, va to tsula kule ni nani, ve londeta sithombe sawe.
6Ngu kumaha keto, womba ka nyumba ya ka Israyeli u txi khawe: Mkoma Txizimu a khene: Hundulukani, mi txi leka sithombe sanu, tshemberisani tikhohe tanu mi si woneteli manyala anu.
7Nguko ni wihi m'thu wa nyumba ya ka Israyeli, mwendo wa valuveli vale va zumbako ka Israyeli, a ni lumbako, a txi ti emisela sithombe mbiluni kwakwe, a teka wubihi wu maha txitsha masoni kwakwe, se a txi ta ka mprofeti, ku ta ni wotisa ngu ha kwakwe, ani Mkoma, ni na mxamula nipune. 8Se ni na mronokela eyo m'thu, ni na mmaha txixamaliso, txikombiso ni divingu, kambe ni na mthavisa hagari ka vathu vangu; mi na tiziva taku ani ngani Mkoma.
9Se ngako mprofeti a txi xengwa e womba to kari, ani Mkoma ni nga mkujetela eyo mprofeti; ni na nawuluta dianza dangu ni txi mfuvisa hagari ka vathu vangu va Israyeli. 10Se mprofeti ni m'thu wule, va na rwala mnandu wawe; mnandu wa wule a wotisako wu na va mnandu wa mprofeti; 11kasi ku nyumba ya ka Israyeli yi si swi yi khukha kwangu, hambi kuwulelelwa kambe ngu wuhambunyeti wa yona; sekoko vona va na va vathu vangu, ani ni na va Txizimu txawe, kuwomba Mkoma Txizimu.
Nowa, Dhaniyele ni Jobe
12Di tile kambe kwangu dipswi da Mkoma di txi ta kha dona:
13Awe mwanana wa m'thu, ngako ditiko dokari di txi ni onhela, di txi ni wukela ngutu, sekoko ni na nawuluta dianza ni txi di tsayisa, se ni na kengeta dipawu, ni na rumela nzala ka dona, ni na thavisa ka dona vathu ni sihari; 14hambi va ti ko vaho hagari ka ditiko vavamna vava vavararu i ku Nowa, Dhaniyele ni Jobe, vona ngu kululama kwawe, va ndi na hulukisa mihefemulo yawe dwe, kuwomba Mkoma Txizimu.
15Ngako ani ni txi pindisa ngu ditikoni kwawe sihari sa txhofu, se sona si txi di xasela, di na xaselwe, ni wammweyo a nga pinde ngu ka dona ngu mhaka ya sibanda; 16hambi i di ku ngako vavamnevo vavararu va di nga diho hagari ka dona, na hanya ani, kuwomba Mkoma Txizimu, kha va na mbi hulukisa vanana vawe va majaha ni vamahorana; va ndi na huluka vona dwe, se ditiko di na xaselwa.
17Ni ku ngako ni txi tisa ditxhari txitimwi ka ditiko, ni txi khani: Awe ditxhari, pinda ngu ditikoni mule: Se ani ni txi thavisa ka dona vathu ni sihari; 18hambi i di ku ngako vavamna vale vavararu va di nga diho ka dona, na hanya ani, kuwomba Mkoma Txizimu, va si hulukisi vanana vawe va majaha ni vamahorana, aniko va ndi na huluka vona dwe.
19Niku ngako ani ni txi rumela mtungu ditikoni, ni theketa txiviti txangu ka dona ngu mnoha, kasi kuthavisa ka dona vathu ni sihari; 20hambi i di ku ngako Nowa ni Dhaniyele ni Jobe na va diho hagari ka dona, na hanya ani, kuwomba Mkoma Txizimu, va si hulukisi mwanana hambi wa dijaha mwendo wa muhorana, aniko va ndi na hanyisa mihefemulo yawe vapune dwe, ngu kululama kwawe.
21 # Wona ni ka: Mtu. 6:8. Nguko Mkoma Txizimu a khene:
Ngutu-ngutu ni txi rumela valamuli vangu va mune va tshofu, ditxhari, nzala, sihari sa tshofu, ni mtungu, kona Jerusalema, kasi kuthavisa vathu ni sihari kani? 22Aniko wonani taku vokari ka vona va na va hagari ka ditiko, va na humiswa hahanze, vanana va majaha ni vamahorana; wonani taku va nata kwanu, se mi na wona tinzila tawe ni simaho sawe; mi na thavelelwa ka wubihi wu ni no va ni di wu tisile Jerusalema, ni sotshe si ni nga si tisa txitimwi ka dona. 23Se mi na thavelelwa, mbimo yile mi no wona tinzila tawe ni simaho sawe; se mi na tiziva taku kha na ti maha walo totshe ti ni nga maha ka dona, kuwomba Mkoma Txizimu.
Currently Selected:
Ezekhiyele 14: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
