Ezekhiyele 20
20
Kwa mbi thembeka ka vathu va ka Israyeli
1Ka dilembe ta wutxhanu ni mambidi, ka mtxima wa wutxhanu, ngu ditshiku da digumi ka mtxima, kutota madhota okari a ka Israyeli, ma txi ta wotisa to kari ka Mkoma; se ma to ta khalahatsha masoni kwangu. 2Sekoko di tile kwangu dipswi da Mkoma di txi ta kha dona:
3Awe mwanana wa m'thu, womba ka madhota a ka Israyeli u txi khawe: Mkoma Txizimu a khene: Anu mi tela ku ta ni wotisa kani? Ni xambanya ngu kuhanya kwangu, anu kha mi na mbi ni wotisa txilo, kuwomba Mkoma Txizimu.
4Ina u ndi nava lamula awe mwanana wa m'thu, u ndi na va lamula kani? Va zivise manyala a vatate vawe; 5se va gele ku khawe: Mkoma a khene: Ka ditshiku dile ni nga sawula Israyeli, ni gulete dianza liveleko la Jakobe, ni txi ti zivanekisa kwawe, ditikoni ka Egipta, se ni guletile dianza kwawe, ni txi khani: Ani ngani Mkoma, Txizimu txanu. 6Ka ditshiku dile ni va gulete dianza, kasi ku va humisa ditikoni ka Egipta, va txi ya ka ditiko di ni nga ti va vekete dona, emo ku khulungako masi ni wulombe, i ku wudhundo ka otshe matiko. 7Sekoko ni to va gela ku khani: Mmweyo ni mmweyo a na tshotshe kule manyala, kambe mi nga ti nyenyeziseni ngu sithombe sa Egipta; ani ngani Mkoma, Txizimu txanu. 8Aniko va to ni wukela kha va lava ku ni engisa; ni wammweyo kha tshotsha kule manyala, hambi kuleka sithombe sa Egipta; sekoko ni to khani ni na theketa txiviti txangu, ni kombisa kuhenya kwangu txitimwi kwawe, hagari ka ditiko da Egipta. 9Ati ni nga maha koko, i mhaka ya kuranda ditina dangu, kasi di si ruketelwi masoni ka vamatiko, vale va ku hagari ka vona, avo ni nga ti wonekisa ka vona, kasi ku va humisa Egipta.
10Se ni va humisile Egipta, ni txi va tsulisa txiwulani. 11Ni va ningile sileleto sangu, ni ku va komba milayo yangu, ngako m'thu a txi si londeta, a na hanya ngu sona. 12Kambe ni va ningile Masabbata angu, kasi ku ma txi maha txikombiso hagari kwangu navo, va na tiziva taku ani ngani Mkoma, ni va sawulekisako. 13Aniko nyumba ya ka Israyeli yi ni wukete txiwulani, va si tsimbili ngu sileleto sangu, kambe va lekile milayo yangu, taku ngako m'thu a txi si londeta, a nga hanya ngu sona; kambe va nyetisete ngutu Masabbata angu; se ani ni va gete ku khani ni na theketa txiviti txangu txitimwi kwawe, amu txiwulani, kasi ku va heta. 14Ati ni nga maha i mhaka ya ditina dangu ti taku di si nyetiselwi masoni ka matiko ale ni nga va humisa ka ona. 15#Wona ni ka: Mit. 14:26-35. Hambi keto ni guletile dianza txitimwi kwawe, amu txiwulani, kasi ni si va leki ve wulela ka ditiko dile ni nga ti ti va ningile, dile di khulungako masi ni wulombe, kambe i ku wudhundo wa matiko otshe. 16Nguko va lekile milayo yangu, kha va tsimbila ngu sileleto sangu, kambe va onhetete Masabbata angu; nguko mbilu yawe yi ti ti londetela msana ka sithombe sawe.
17Hambi keto diso dangu di va divalete, ni si va dayi, hambi ku va heta amu txiwulani. 18Aniko ani ni ti khani ka vanana vawe amu txiwulani: Mi nga tsimbileni ngu sileleto sa vatate vanu, kambe mi nga xayiseni milayo yawe, hambi kutinyenyezisa ngu sithombe sawe. 19Ani ngani Mkoma, Txizimu txanu; tsimbilani ngu sileleto sangu, niku, xayisani milayo yangu, kambe ti maheni. 20Se sawulekisani Masabbata angu, kasi kumaha txikombiso hagari kwangu ni nanu, mi na ziva ti to ani ngani Mkoma, Txizimu txanu.
21Aniko vanana va ni wukete, kha va tsimbila ngu sileleto sangu, kambe kha va xayisa milayo yangu, saku m'thu a txi si londeta, a na hanya ngu sona; vona va nyetisete Masabbata angu; ngu mhaka ya eto ni nga khani ni na theketa txiviti txangu txitimwi kwawe, kasi kukombisa kuhenya kwangu amu txiwulani. 22Aniko ni khwanyetile dianza, ngu mhaka yo randa ditina dangu, kasi ku di si nyenyeziswi masoni ka matiko, ka vale ni nga va humisa ka vona. 23Kambe ni va guletete dianza amu txiwulani, kasi ku va hangalasa hagari ka matiko, ni ku va theketa ha mafuni; 24nguko kha va thumisa milayo yangu, kambe va lekile sileleto sangu, ve nyenyezisa Masabbata angu, maso awe ma rendekete ka sithombe sa vatate vawe. 25Nguko ni va ningile sileleto sa kuva i nga si nga sa sinene, ni milayo yile va nga ti si dingani kuhanya ngu yona; 26se ni va nyenyezisile ngu siningo sawe vapune, sa kupindisa ngu ha mndiloni otshe matiwula; kasi ku va xasela, kasi kuva txi tiziva ti to ani ngani Mkoma.
27Ngu toneto, womba ka nyumba ya ka Israyeli, awe mwanana wa m'thu, u txi va gela ku khawe: Mkoma Txizimu a khene: Kambe vatate vanu va ni ruketete, va ni lekile. 28Nguko a kule ni nga ti ti va wuleta ka ditiko dile ni nga guleta dianza, kasi kuvaninga, vona va to wonetela ka sotshe simangwana, ni ka yotshe mindonga yo txhuma, kambe va ningete koneho miphaxo yawe, ve kombisa kona hale ku ni henyisa kwawe ngu miningelo yawe, va txi veketela ni sa kubhumula, se va txi ningela miningelo ya sa kusela. 29Se ani ni to khani kwawe: Mbu khalo muni wonewo wo guleka miyako ka wona kani? Kambe ditina da wona di dhanwako ku i Bhama kala ka ditshiku da nyamsi. 30Ngu tona eto, womba ka nyumba ya ka Israyeli u txi khawe: Mkoma a khene: Anu mi ti nyenyezisa mipune kufana ni vatate vanu ngu txani kani? Mi txi mahetela ta manyala kani? 31Se mbimo yi mi ningelako miningelo yanu, kambe mi pindisa vanana vanu ngu ha mndiloni, ina hi nga ku mi nga ti nyenyezisa ngu sithombe sanu kala ka ditshiku diya kani? Se mi ndi na ni wotisa ta txani, anu va nyumba ya ka Israyeli kani? Na hanya ani, kuwomba Mkoma Txizimu, taku anu kha mi na mbi ni wotisa txilo. 32Kambe ati ti ku mapimoni kwanu, kha ti na mbi maheka, ngu ku mi ku khanu: Hi na fana ni matiko, hi txi nga timwani tihunzu ta ha mafuni, va thumelako so vatwa ni sa kuwumbwa.
Txitsayiso ni divalelo
33Na hanya ani, kuwomba Mkoma Txizimu, nguko ngu dianza da mtamo, ni diwoko do nawuluka, ni kuhenya ku nga theketwa, ni na fuma txitimwi kwanu. 34Kambe ni na mi thavisa hagari ka vathu, ni txi mi sengeleta ka matiko ale mi nga hangalaka ka ona, ngu dianza da mtamo, ni diwoko do nawulutwa, ni kuhenya ku nga theketwa. 35Se ni na mi yisa ka txiwula txa vathu, koneyo ni na ya mi lamula khohe ni khohe. 36Nga kule ni nga lamula vatate vanu, txiwulani ka ditiko da Egipta, ngu kumaha keto ni na mi lamula kuwomba Mkoma Txizimu.
37Kambe ni na mi maha mi pinda ngu hahatshi ka ndonga, se ni txi mi maha mi pinda ngu ka txitsaniso txa txitumelelano. 38Ni na thavisa hagari kwanu avale va kutitsimba, ni vale va nga ni wukela; ni na va thavisa ka matiko ale va luvelako ka ona, aniko kha va na mbi tshumelela ka ditiko da ka Israyeli; se mi na tiziva taku ani ngani Mkoma.
39Kasi ngu kwanu anu va nyumba ya ka Israyeli, Mkoma Txizimu a khene:
Tsulani, mmweyo ni mmweyo eya thumela sithombe sakwe, nguko ani kha mi lavi ku ni engisa; aniko mi nga nyenyeziseni ditina dangu do sawuleka ngu miningelo yanu, ni sithombe sanu. 40Nguko ka mmango wangu wo sawuleka, mmangoni ko guleka ka Israyeli, kuwomba Mkoma Txizimu, nguyo yi no ni thumela kona yotshe nyumba ya ka Israyeli, yotshe ka dona ditiko dile; koneyo ni na tsaka ngu vona, kambe ni na amukela miningelo yanu yo ndiwitelwa, ni miningelo yanu yo khata, ni sotshe somaha sanu so sawuleka. 41Ni na tsakiswa ngu kubhumula ka miphaxo yanu, mbimo yi ni no mi thavisa hagari ka vathu, ni txi mi wuyisa ngu ka matiko ale mi nga hangalaka ka ona, se ni na sawulekiswa ngu nganu, masoni ka matiko. 42Se mi na tiziva taku ani ngani Mkoma, mbimo yile ni no mi maha mi tshumelela ditikoni ka Israyeli, ka ditiko dile ni ngadi gulela dianza, kasi ku di ninga vatate vanu. 43Se koneyo mi na alakanya tinzila tanu ni sotshe simaho sanu, asi mi nga ti nyenyezisa ngu sona, kambe mi na ti nyenya mipune, ngu mhaka ya wotshe wubihi wule mi nga wu maha. 44Kambe mi na tiziva taku ani ngani Mkoma, ngu ti ni no ti maha ngu kuranda ditina dangu, na i si nga ngu tinzila tanu to biha, hambi ngu mithumo yanu ya walo, anu va nyumba ya ka Israyeli, kuwomba Mkoma Txizimu.
Mndilo wu ku Wulambwe
45Se di tile kwangu dipswi da Mkoma di txi ta kha dona:
46Awe mwanana wa m'thu, rendekelisa khohe yako ka nzila ya Wulambwe, se u tshakunuta mapswi ako o wukela va Wulambwe, profeta u wukela txitinga txa thembweni ka Wulambwe. 47Womba ka txitinga txa Wulambwe u txi khawe: Engisa dipswi da Mkoma: Mkoma Txizimu a khene: Wona taku ni na dhivela mndilo ngu kwako, awuwa ngu kwako wu no tshokomisa yotshe mindonga yo nakana ni mindonga ya kuoma; dituro da kona kha di na mbi timeka; di na hisa totshe tikhohe, kukhukhela Wuphemba kala Wulambwe. 48Yotshe nyama yi na ti wona taku ani Mkoma ni dhivete; kha wu na mbi timeka.
49Sekoko ani ni to khani:
Yowe! Awe Mkoma Txizimu! Vona va womba tiya ngu ngani: Ina hi nga ene wu wa kuwombetela sifananiso dwe kani?
Currently Selected:
Ezekhiyele 20: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
