Ezekhiyele 19
19
Ndando ya kupandiseka
1Se awe wusa txidilo txitimwi ka vakoma va ka Israyeli,
2u txi khawe: I mani mame wako kani?
Ngonyamo ya makati hagari ka tingonyamo, yi wunjile vanana va yona
hagari ka singonyamwana.
3Kambe yi kulisile tximwetxo ka vanana va yona,
a txi maha txingonyamwana,
txi gondelako kuxota, se txi kakatxute vathu.
4Se matiko ma di pfite kuwomba ngu yona,
yi to ya manwa diphalani ka yona,
ve yi vekela mkhalo va txi yi tisa Egipta.
5Ngonyamo yile ya makati yi di ti woni taku kha yi ngadi ni themba,
yi to teka mmwani ka vanana va yona
yi mmaha txingonyamwana.
6Se mbimo yile txi nga kula,
txi tsimbila-tsimbila hagari ka tingonyamo,
txi to maha txingonyamwana txo gondela kuxota,
se yi txi kakatxula vathu.
7Yi to ziva tinyumba tawe ta wukoma, yi khundumusela madhoropa awe;
va to xasela mafu ni sotshe si nga ti ti ka ona,
ngu kupfa kubhonga ka yona.
8Sekoko vathu va matiko a hombe,
va to sengeletana ve yi randela,
va txi yi lwisa,
veza veya yi mana diphalani ka yona.
9Kambe va to yi ndinda ngu mkhalo
va txi yi wuleta mkorani, ve yi heleketa ka mfumeli wa Bhabhilona;
va txi yi wuleta ka makhalo o banga,
kasi di si ngadi di pfala dipswi da yona
mimangoni ka Israyeli.
Mxanvu wa kuoma
10Israyeli i ku mame wako
a ti ti nga m'vhinya,
wu nga phaywa hafuhi ni mati;
wu tata madhavi ngu mihando,
ngu mhaka ya kutalelwa ngu mati.
11Wu ti ti ni tindonga to banga,
tindonga to dingana vakhozisi,
se wu to guleka hagari ka madhavi o txhuma,
ku txi wonwa kuguleka ka wona
ni madhavi a kona amangi.
12Aniko wu to dulwa ngu txiviti,
wu txi wiswa hahatshi,
moya wa wutxani wu to omisa mihando ya kona;
tindonga ta kona to banga ti to funyeka ti oma,
ti txi tshokomiswa ngu mndilo.
13Se kona kuwa wu phayilwe txiwulani,
ka mafu a kuoma, a txisapa.
14Ngu ka ndonga yimweyo ya madhavi a wona
ku to huma mndilo, wu tshokomisa mihando ya kona,
kha kuswi kumaneka ni ya yimweyo ndonga
yo banga, yo fuma ngu yona.
Atxiya njidilo, txi no thumela kumaha txidilo.
Currently Selected:
Ezekhiyele 19: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
