Ezekhiyele 18
18
Mmweyo ni mmweyo a ti xamulela apune
1Se di tile kwangu dipswi da Mkoma, di txi ta kha dona:
2 # Wona ni ka: Jer. 31:29. Njitxani mi ku natxo anu, anu mi wombako txidinganiso madingano ni ditiko da ka Israyeli, mi txi khanu: Vatate va dyite mauvha amambisu, se makwasa a vanana ma pfite wutsila kani?
3Na hanya ani, kuwomba Mkoma Txizimu, kha mi na mbi ngadi mi womba kambe mavingu ka Israyeli. 4Wonani taku yotshe mihefemulo njangu; nga kule muhefemulo wa tate i ku wangu, muhefemulo wa mwanana ni wona mbwangu; muhefemulo wule wu no onha, ewo wu na fa.
5Ngako koko m'thu a di lulamile a maha kululama, 6asi dyeli mimangoni, kambe asi guleti maso e wonetela sithombe sa nyumba ya ka Israyeli, mwendo kuxenga msikati wa muakelani wakwe, hambi kuyela wamsikati wule a ti veka didhawa; 7asi xuphi ni m'thu mmweyo, a tshumetako ka nyamne asile a nga vekisa ngu sona, asi piko, a ningako sakudya ka wule a ku ni nzala, e ambeka wule i ku tximbwiri; 8asi ningeliko male yakwe ngu kubhindulisa, asi amukeli ngu kupindisa, a vayilelisako dianza dakwe ka kwa mbi lulama, a lamulako m'thu ngu kululama masoni ka mmwani m'thu; 9#Wona ni ka: Levh. 18:5. a tsimbilako ngu sileleto sangu, ni kuxayisa wululamo wangu, kasi ku e maha madingano ni ditshuri, eyo mlulami ngu ditshuri a na hanya, kuwomba Mkoma Txizimu.
10Se ngako ene a txi veleka mwanana wa kupa, mtheketi wa mnoha, a sikotako kumaha to fana ni tiya 11na asi londisi totshe tifanelo, aniko a dyelako txitimwi ka mimango, e xowokisa msikati wa muakelani wakwe, 12a txi xanisa txisiwana ni wule wo pwata, a txi pa, kambe asi tshumeti sile so vekiswa, a gulako maso akwe me wonetela sithombe, e mahetela to nyenyeza, 13a zumbako ni siya so lombwa, a amukelako so tala, ina a nga hanya kani? Kha na mbi hanya! Otshe manyala awa a ma mahile, ngu ditshuri a na fa; mnoha wakwe wu na va txitimwi kwakwe.
14Se wona taku ngako a txi veleka mwanana, e wona sotshe sionho so mahwa ngu tate wakwe, niku a di si woni, asi mahi nene tona eto, 15asi dyeli txitimwi ka mimango, asi guliko maso akwe me wonetela sithombe sa nyumba ya ka Israyeli, kambe asi xowokisiko msikati wa muakelani wakwe, 16kambe asi xanisi m'thu ni wammweyo, asi zumbiko ni so vekiswa, asi pi, a ningako sakudya ka wo pfa nzala, e ambeka wule i ku tximbwiri, 17asi nemetiseliko mxaniseki ngu dianza dakwe, asi amukeliko somaha ngu kupindeletisa, a txi londeta wululamo wangu, ni kutsimbila ngu sileleto sangu, eyo kha na mbi fa ngu mhaka ya wubihi wa tate wakwe; ngu ditshuri a na hanya. 18Tate wakwe, nga kule a nga xanisa, a txi pa somaha sa mwanawe, e maha ti i singako ta tinene hagari ka vathu, wona taku a na fa ngu mhaka ya wubihi wakwe.
19Aniko wombani ku khanu: Ngu kutxani mwanana asi tekeleli wubihi wa tate wakwe kani? Nguko mwanana a mahile tinene ni wululamo, kambe a xayisile sotshe sileleto sangu a txi si maha, ngu mhaka ya eto, ngu ditshuri a na hanya. 20Muhefemulo wule wu onhako, ewo wu na fa; mwanana kha na mbi tekelela wubihi wa tate, hambi tate kha na mbi teka wubihi wa mwanana; kululama ka wo lulama ku nava txitimwi kwakwe, ni wubihi wa m'bihi wu na va txitimwi kwakwe.
21Aniko ngako m'bihi a txi hunduluka ka sionho si a nga si maha, se a txi xayisa sotshe sileleto sangu, a txi maha tinene ni kululama, ngu ditshuri a na hanya; kha na mbi fa. 22Ka sotshe sihambunyeto si va nga si maha, kha si na mbi alakanywa; a na hanyiswa ngu kululama kwakwe a nga kumaha. 23Ina ani ni ndi na tsaka ngu kufa ka wo biha kani? Kuwomba Mkoma Txizimu; kha ni tsakeli ku e hunduluka ka tinzila takwe e hanya kani?
24Aniko ngako m'thu wo lulama a txi leka kululama kwakwe, se a txi maha ta kwa mbi lulama, a txi maha totshe ta manyala tile ti mahwako ngu m'bihi, ina a nga hanya kani? Kotshe kululama kule a nga kumaha, kha ku na mbi alakanywa; wuhambunyeti wu a nga hambunyeta ngu wona, ni txionho txile a nga txi maha, a na fela ka sona.
25Ma womba mi txi khanu: Nzila ya Mkoma hi nga yo lulama. Engisa koko awe nyumba ya ka Israyeli: Nzila yangu kha ya lulama kani? Hi nga tinzila tanu ti nga gombonyeka kani? 26Ngako m'thu wo lulama a txi huma kululamani kwakwe a txi maha wubihi, a na fa ngu wona; a na fela ka wona wubihi wule a nga wu maha. 27Aniko ngako m'bihi a txi hunduluka ka wubihi wakwe wule a nga wu maha, se a txi maha tinene ni kululama, a na xayisa muhefemulo wakwe, wu txi hanya. 28Nguko awule a tshumelako e hunduluka ka sotshe sihambunyeto sile a nga si maha, ngu ditshuri a na hanya, kha na mbi fa. 29Hambi keto nyumba ya ka Israyeli yi kha yona: Nzila ya Mkoma kha ya lulama. Ina tinzila tangu kha ta lulama, awe nyumba ya ka Israyeli kani? Ina tinzila tanu kha ta gombonyeka kani?
30Ngu kumaha keto, ani ni na mi lamula, mmweyo ni mmweyo ngu tinzila takwe, awe nyumba ya ka Israyeli, kuwomba Mkoma Txizimu; ngonani, hundulukani ka sotshe sihambunyeto sanu, se wubihi kha wu na mbi mi humba. 31Tshotshani sotshe sihambunyeto si mi nga hambunyeta ngu sona, se kulaveka mi va ni mbilu ya yiphya ni moya wa wuphya; nguko mi ndi na fela txani anu nyumba ya ka Israyeli kani? 32Nguko kha ni tsakeli kufa ka wule afako, kuwomba Mkoma Txizimu; hundulukani koko, kambe hanya.
Currently Selected:
Ezekhiyele 18: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
