Ezekhiyele 17
17
Txidinganiso txa m'vhinya ni txa magama
1Se di tile kwangu dipswi da Mkoma, di txi ta kha dona:
2Awe mwanana wa m'thu, maha txidinganiso ka nyumba ya ka Israyeli. 3U txi khawe: Mkoma Txizimu a khene: Digama da hombe, da tibhapi ta hombe, da maphapho a hombe, do tala ngu mitenga ya mixowo yo hambanela, di tile Libhanoni, di ta teka didhavi do lapha ngutu da mkedhari. 4Se di to funya tshoka ya txitimwi ngutu ya didhavi da mkedhari, di yi tisa ka ditiko da wukwewu; di ta yi veka didhoropani ka va nyamabhindu. 5Di to teka mbewu ya ditikonimo di yi xwaya ka thembwe yokari; di to yi phaya hafuhi ni mati, kha kwati ngutu. 6Tshoka yile yi to thunga yi maha m'vhinya wo nava ngutu, wo laphanyana, madhavi a kona ma txi komba ka mndonga wa kona, ni mikoloti yo tshima; se wu to maha m'vhinya, wu veleka mihando, wu txi baleka mazokoro a maphya.
7Ku ti ti ni dimwani digama da hombe kambe, da tibhapi ta hombe, da mitenga yo tala; se m'vhinya wu to di hokela ngu mikoloti, ni madhavi, kukhukhela hale wu nga phaywa kona, kasi ku ku theletelwa mati. 8M'vhinya wuwa wu phayilwe ka mafu amanene, madhawani ka mati amangi, kasi ku ma txi thunga madhavi, ni kuninga mihando, wu maha m'vhinya wa wunene.
9Womba u txi khawe: Mkoma Txizimu a khene: Ina wu na humelela kani? Ina kha na mbi dula ngu mikoloti, a txi wila mihando ya kona, kasi ku wu txi oma kani? Wu na oma ka otshe madhavi a wona; na i si nga ngu mhaka ya diwoko da hombe, hambi ngu mhaka ya vathu votala, wu na dulwa ngu mu ka mikoloti ya kona. 10Ina wu txi phaywa wu na humelela kani? Ina wu txi pekwa ngu moya wa wutxani kha wu na mbi oma kani? Wu na oma kukhukhela mabambe ka mule wu nga phaywa kona.
Kutxhamuselwa ka txidinganiso
11Sekoko di tile kwangu dipswi da Mkoma, di txi ta kha dona:
12 # Wona ni ka: 2 Vafu. 24:15-20; 2 Mak. 36:10-13. Kona kuwa i nda khawe ka nyumba ya kutitsimba: Kha mi tizivi taku ti womba txani tona tiya kani? I nda khawe: Wonani taku, a tile kona mfumeli wa Bhabhilona, e ta ñola mfumeli wa Jerusalema ni madhota akwe, e tsula navo Bhabhilona; 13se a to teka mmweyo wa liveleko la wukoma, e maha txitumelelano nayo; a to mxambanyisa, e teka ni vathangeli va hombe va mafu ditiko, 14kasi ku wukoma wu txi khoziswa, wu si wuki kambe; kasi ku a txi ngadi e xayisa txitumelelano takwe, e simama e fuma. 15Aniko mfumeli wa Jerusalema a to eyisa wule wa Bhabhilona, ngu kurumela mitumi yakwe Egipta, kuya kombela ku tiselwa mahantxhi ni vathu votala; ina a na humelela hambi kuhuluka, awule a mhako eto kani? Niku mwendo a na funya txitumelelano e tutuma kani?
16Ngako ni hanyako, kuwomba Mkoma Txizimu, ka wukhalo wu a zumbako ka wona, mfumeli wule a nga fumiswa ngu ngene, akule a nga eyisa txixambanyo ni kufunya txitumelelano, ina, a na fela kona Bhabhilona. 17Se Faro, hambi ni dibutho dakwe da hombe, ni votshe vale votala va m'vhunako, kha na mbi nga maha ta txilo ta yimbi, a txi kela mibhala ni kuaka maguma kasi kuheta vathu. 18Nguko a eyisile txixambanyo, e funya txitumelelano, txo mahwa ngu kuñolana ka manza; a di mahetete totshe eto, kha na mbi huluka.
19Ngu kumaha keto, Mkoma Txizimu a khene:
Na hanya ani, txixambanyo txangu atxi u nga txi eyisa, ni txitumelelano txangu u nga txi funya, si na wa ha msungo kwako. 20Ni na riyela m'thu ngu milawu yangu, se a na bzetwa ngu mlawu wangu; kambe ni na mtsulisa Bhabhilona, eyo ni no ya mlamula kona, ngu mhaka ya ku a nga ni wukela. 21Se votshe vathu vakwe vale va tutumako, ni masotxhwa a kona, va na dawa ngu ditxhari, kambe avale va no sala, va na hangalaka ka madhawa amangi; mi na tiziva taku ani Mkoma ni wombile.
Txithembiso txa kuthemba
22 Mkoma Txizimu a khene:
Se ni na teka tshoka ya mkedhari ni txi yi phaya;
ka ale ma thungako ni na wila da diphya ngutu,
ni txi ya di phaya ka mmango wo guleka, wo tshura.
23Ka mmango wo guleka wa ka Israyeli,
ni na ya phaya mkedhari,
wu na humisa midhari, ni kuveleka mihando,
wu na va mkedhari wa wunene;
sotshe sinyana si na zumba hahatshi ka mtsudi
wa madhavi a kona.
24Ngu kumaha keto, yotshe mindonga ya txitinga
yi na tiziva taku ani Mkoma, ni date mndonga wo lapha,
ni guletile mndonga wo koma,
ni omisile mndonga wo nakana,
ni nakanisa mndonga wa kuoma;
Ani Mkoma ni wombile, kambe ni na ti maha eto.
Currently Selected:
Ezekhiyele 17: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
