Ezekhiyele 16
16
Jerusalema, didhoropa da kwa mbi thembeka
1Se di tile kwangu dipswi da Mkoma, di txi ta kha dona:
2Awe mwanana wa m'thu, zivisa Jerusalema manyala akwe. 3U txi khawe: Mkoma Txizimu a khene ka Jerusalema:
Wuzikwa wako ni kuvelekwa kwako, si khukhela ka ditiko da Vakanana; tate wako i ti ti Muamori, se mwamwako i ti ti Muheti. 4Se ngu kuvelekwa kwako, ka ditshiku dile u nga velekwa, khwa wilwa likhofori, kambe khwa sambiswa ngu mati, kasi ku kusawulekisa, hambi ku dziringelwa ngu mnyu, mwendo kuphutelwa ngu nguwo. 5Kha ku nga ni m'thu wo kutsetsa, a txi ku mahela totshe tiya ngu wumbilu; u ta so rinzwa txitingani, ka ditshiku dile u nga velekwa ka dona, nguko va ti ti kunyenya.
6Se ni to pinda ngu hafuhi ni nawe, ni kuwona u di nyete ngu mnoha, ni nje khani kwako: Hambiko u ku mnohani kwako, wa hanya; ina, nguko ni khani: Hambiko u ku mnohani kwako, wa hanya. 7Ni kumahile u anda nga similwa sa txitingani, u kute, u mahile wa hombe, kambe u tshurile ngutu; titshumbu tako ti kute, ni misisi yako yi kute; aniko u sa fenengetwa, u ti ti tximbwiri.
8Se ni to pinda ngu ha u nga ti ti kona, ni kuwona, ni wona taku mbimo yako i ti ti mbimo ya lirando; se ni to fenengeta wumbwiri wako ngu didhamba dangu; ni to kuthembisa ni maha txixambanyo ni nawe, kuwomba Mkoma Txizimu, se awe u mahile wangu.
9Sekoko ni to kusambisa ngu mati, se ni ku bahulela mnoha, ni kutota mafura. 10Kambe ni ku ambekile ngu sa ku lukwa, ni ambeka mikondo yako ngu didhowo da ditxalo, ni txi ku phutela ngu masilika, ni ku ku fenengeta ngu disedha. 11Ni ku bombisile ngu so tshura, ni ku ambekile masinda mawokoni, ni wusekenya mkoloni. 12Ni ku namekile txingwavila ha thonvuni, ni singeda tinzeveni, ni m'bhoti wa wudhundo ha msungo. 13Se ngu kumaha keto, u to tshuriselwa ngu nzalama ni silivhela, ni syambalo sako nza disilika do hehuka, ni disedha, ni so lukelwa; u ndyisilwe ngu mpupu, ni wulombe, ni mafura; kambe u tshurile ko pindeletisa, u manile kuhumelela, uza u hoka kuva mfumeli wa txisikati. 14Se nduma yako yi to hoka matikoni, ngu mhaka ya kutshura kwako, nguko u ti ti hetelete, ngu kule ni nga ti ti vekile wudhundo wangu txitimwi kwako, kuwomba Mkoma Txizimu.
15Aniko u thembile kutshura kwako, ni kuxengwa ngu nduma yako, se u txi maha wugango ni votshe vale va nga ti ti pinda, u txi va lumba. 16Kambe u tshurisete makhalo o guleka ngu syambalo sako sa mixowo yo tala, u txi maha wugango txitimwi ka sona; to nga eto kha ti zivi kumaheka, kambe kha ti na mbi ngadi ti maheka. 17Se u tekile singwavila sako so tshura, asile ni nga kuninga sa nzalama yangu, ni sa silivhela yangu, u txi khanda sithombe sa txiwamna, u txi maha wugango naso. 18U fenengetile sithombe ngu syambalo sako asile so lukwa; u txi veka mafura a lisima masoni ka sona. 19Dipawu dangu dile ni nga kuninga, ni mpupu, ni mafura ni wulombe, asi ni nga txi kudyisa sona, kambe u vekile kubhumula masoni ka sona; ti mahisile eto, kuwomba Mkoma Txizimu.
20Hahanze keto, u tekile vanana vako va majaha ni vamahorana, avale u nga ni velekela, u txi phaxa ngu vona ka sona, va txi tshokomiswa; ina wugango wako mbudotho kani? 21U date vanana vangu u txi va ningela ka sithombe, kasi kuva txi pinda ngu ha mndiloni. 22Se ka otshe manyala ako, ni ka wugelegele wako, khwa alakanya masiku a wuphya wako, mbimo yile u nga ti ti tximbwiri, u sa fenengela txilo, na u di nyetisetwe ngu mnoha wako.
Jerusalema digelegele
23Se ku to maheka msana ka wotshe wubihi wako:
(Dikhombo! Dikhombo kwako! Kuwomba Mkoma Txizimu), 24u ti akete nzuma u maha makhalo o guleka ka totshe tinzila. 25Ka otshe mahandakanya u akile makhalo o guleka, u nyenyezisile kutshura kwako, u randanile ni votshe vapindi va nzila; kambe u andisile wugelegele wako. 26Kambe u mahile wugelegele ni vanana va Egipta, vaakelani vako vale i ku siro sa hombe, u mahile wugelegele wako kasi ku ni wusela kuhenya.
27Ngu kumaha keto ni nawulutile dianza dangu txitimwi kwako, ni hungute txokari kwako, ni kuningela ka vale va ku nyenyako, i ku vanana va Vafilista, vale va nga ti tipfa tingana ngu tinzila tako ta walo.
28Kambe u mahile wugelegele ni vanana va majaha a Asiriya, nguko u ti si khuri; hambiko u nga maha navo wugelegele khwa kolwa; 29u andisile wugelegele wako ditikoni ka Kanana kala kuya hoka Kaldheya, hambi ka toneto khwa kolwa.
30Mbilu yako kha ya tsana, kuwomba Mkoma Txizimu:
U mahile totsheto i ku mithumo ya dibhoyi da nduma! 31Mbimo yi u nga ti akela nzuma ka mahandakanya a tinzila, u aka makhalo o guleka kona tinzilanimo, khwa maha nga dibhoyi, nguko u kalate hakhelo; 32u mahisile ku nga wamsikati wa wugango, a lekako mwamna wakwe e amukela vamwani vavamna. 33Otshe mabhoyi ma hakelwa, aniko awe u ninga somaha ka sotshe sigango sako; kambe u mahela ti to va nate ngu ka otshe madhawa, ngu wugelegele wako. 34Wugelegele wako wa hambana ni ti wu mahekisako tona ka vamwani vavasikati, nguko kha va ku londeteli amu ka wugelegele wako; nguko mbimo yile u hakelako, na awe u si amukeli hakhelo, ti hambana ngu koneho.
Kusolwa ka Jerusalema
35Ngu tona eto, awe digelegele engisa dipswi da Mkoma. 36Mkoma Txizimu a khene:
Nguko u theketete male yako, kambe wu tumbulekile wumbwiri wako, amu ka wugelegele wako ni sigango sako, kumweko ni sotshe sithombe sa manyala ako, ni mu ka mnoha wa vanana vako vale u nga si ninga, 37wona taku ni na sengeleta sotshe sigango sako, asile u nga patana naso, ni votshe vale u nga va randa, ni votshe vale u nga va nyenya, ni na va tshanganisa va txi kurandela ve kuwukela, ni na kombisa wumbwiri wako masoni kwawe, kasi kuve wona wumbwiri wako wotshe. 38Ni na ku lamulisa ti va lamuliswako tona va wugango, ni vale va theketako mnoha; ni na gwitisa ku kudaya ngu kuhenya ni txiluse. 39Se ni na kuningela manzani kwawe, va na wisa nzuma yako, kambe va na onhetela makhalo ako o guleka, va txi kuambula syambalo sako, ve teka singwavila sako sa ku ti tshurisela ngu sona, va na kusiya u di tximbwiri u sa fenengela txilo.
40Sekoko va na patana ve kwelela va txi ta kuwukela, va txi kubalisela ngu marigwi, va na kuthola ngu matxhari awe. 41Se va na hisa tinyumba tako ngu mndilo, ve lamula ngu kuweketa, masoni ka vavasikati votala; kambe ni na wilisa wugelegele wako, khu na mbi ngadi u hakela txilo. 42Ku kuhenyela kwangu ku na boxa, ni kulusa kwangu ku na kuvayilela, ni na malala, kha ni na mbi ngadi ni henya kambe. 43Ngako u nga mbi alakanya masiku a wuhorana wako, u txi ni wusela kuhenya ngu totshe tiya, wona taku ni na kutshumetela madingano ni mithumo yako, kuwomba Mkoma Txizimu, kambe khu na mbi ngadi u maha to hambana, ta manyala.
Mwanana wa dihorana a tekelela mame wakwe
44Wona taku ni wihi a thumisako mavingu, a na womba divingu diya, a txi khene:
Mwanana wa dihorana a tekelela mwamwakwe.
45Awe u mwanana wa dihorana wa mwamwako, a nga ti ti lekile mwamna wakwe ni vanana vawe; se awe u mwanawe wa vananu, vale va nga ti ti lekile vamna vawe ni vanana vawe; mwamwanu i ti ti Muheti, kambe tate wanu i ti ti Muamori.
46Se mkomwako ngu Samariya, ene ni vanana vakwe vamahorana, a zumbako txibhabha kwako; se mnanda wako, a zumbako ka dianza dako da txinene, ngu Sodhoma ni vanana vakwe vamahorana. 47Hambi keto khwa tsimbila ka tinzila tawe, kambe khwa londisela manyala awe; aniko eto ndidotho, u ti nyetisete ngutu kupinda vona, ka totshe tinzila tako.
48Ani na hanya, kuwomba Mkoma Txizimu, kha ya maha Sodhoma mwananu, ene ni vanana vakwe, nga tile u nga maha awe ni vanana vako vamahorana. 49Wubihi wa mwananu Sodhoma ngu wuwa: Kutikulisa, kulondola sakudya, wukara wakwe ni vanana vakwe vamahorana; aniko kha zivi kuthumisa manza a txisiwana ni awule wo pwata so maha. 50Kambe va ti kulisile ve mahetela ta manyala masoni kwangu; ngu kumaha keto ni va thavisile hale, mbimo yile ni nga ti wona eto.
51Hambi Samariya kha maha hafu ya sionho sako; u andisile ngutu manyala ako kupinda vona, se u emete vananu, ngu otshe manyala ale u nga ma maha. 52Awe koko, u xaniswa ngu tingana tako, u nga basisile vananau ngu sionho sako, u nga mahetela manyala ngutu kupinda vona; vona va lulamile ngutu kupinda awe; wa ti wisa tingana koko, u xaniswa ngu tingana tako, ngu kumaha keto u basisile vananu.
Sodhoma ni Samariya va wuyile ka txikale txawe
53Ani koko ni na wuyisa vale va wukhumbini:
Va wukhumbini ka Sodhoma ni vanana vawe vamahorana, ni wukhumbini ka Samariya ni vanana vawe vamahorana, ni tikhumbi ta wukhumbi wako; 54kasi ku u txi xaniswa ngu tingana tako u txi wa tingana ngu totshe tile u nga maha, u txi va ninga kuthavelelwa. 55Mbimo yile vananu i ku Sodhoma ni vanana vakwe vamahorana, va no tshumelela ka zumbelo yawe yo khata, ni Samariya ni vanana vakwe va mahorana, va no tshumelela ka zumbelo yawe yo khata, na nawe ni vanana vako mi na tshumelela ka zumbelo yanu yo khata. 56Hambi mwananu Sodhoma, kha khumbukwa ngu txisofu txako, ka ditshiku da kutiguleta kwako, 57na ku si se tumbulwa wubihi wako kani? Konkuwa, u tshumete u fana nayo, a nga txhipiswa ngu vanana vamahorana va Siriya, ni votshe vale va nga ti ti madhawani kwakwe, i ku vanana va Vafilista, va nga ti ti ku randete. 58U na rwala wuhambunyeti wako ni manyala ako, kuwomba Mkoma.
Txitumelelano txa kwa mbi gwita
59Nguko Mkoma Txizimu a khene:
Ni na kumaha tile u nga maha, u nga txhipisa txixambanyo, u txi bhenula txitumelelano. 60Hambi keto, ani ni na alakanya txitumelano txi ni nga txi maha ni nawe, ka masiku a wuhorana wko; kambe ni na maha ni nawe txitumelelano txa kwa mbi gwita. 61Sekoko u na alakanya tinzila tako, u kanganyiseka, mbimo yi u no amukela vakomwako ni vananda vako, nguko ni na va maha vanana vako, aniko na i si nga ngu txitumelelano txako. 62Nguko ni na maha txitumelelano ni nawe, se u na tiziva taku ani ngani Mkoma; 63ekasi ku u na alakanya, u txi wa tingana, khu na mbiswa kambe u tula txisofu txako, ngu mhaka ya tingana tako, mbimo yile hi no divalelana ni nawe, ka totshe tile u nga ti maha, kuwomba Mkoma.
Currently Selected:
Ezekhiyele 16: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
