Ezekhiyele 22
22
Sihoheto sa Jerusalema
1Se di tile kwangu dipswi da Mkoma di txi ta kha dona:
2Awe koko mwanana wa m'thu, u na lamula, u na lamula didhoropa do theketa mnoha kani? Zivanekisa otshe manyala ako. 3U txi khawe: Mkoma Txizimu a khene: Dikhombo ka didhoropa di di theketako mnoha hagari ka dona, kasi ku yi na hoke mbimo ya kona! Di ti mahelako sithombe sa kutinyenyezisa! 4Ngu mhaka ya mnoha wako wule u nga wu theketa, u ti onhisile, kambe u ti nyenyezisile ngu sithombe sile u nga ti mahela, u hungula masiku ako, ni kuhoka magwito ka malembe ako; ngu toneto ni kumahile txiruko ni txisekiso ka matiko. 5Matiko a hafuhi ni nawe ni a kule ma na kuseka, ma txi kutxhipisa, u talelwa ngu tingana. 6Wona taku vathangeli va ka Israyeli, mmweyo ni mmweyo madingano ni mtamo wakwe, va ku khozisile, kasi kutheketa mnoha. 7Tate ni mame va txhipisilwe kwako, va xanisile mluveli hagari kwanu, va khozisile wo felwa ngu vaveleki, kumweko ni noni. 8U txhipisile siya sangu so sawuleka, kambe u nyenyezisile Masabbata angu. 9Hagari kwako ku ni vavamna va sipoyilo, kasi kutheketa mnoha; kambe va dyete txitimwi ka mimango yako, ni kumahetela wukanganyisi hagari kwako. 10Va vhunungute wumbwiri wa vatate vawe, ve otela ni vavasikati vale va nga txi ti vekisa. 11Mmwani a otete ni msikati wa muakelani wakwe, mmwani a txi otela ni mane wakwe, se mmwani a txi gima ndiyakwe, i ku mwanana wa tate wakwe. 12Ku amuketwe siningo kasi kutheketa mnoha; so honyola ni so bhindulwa u tekile, u maha likungo ka mwakelani, u txi mkhozisa; kambe ani u ni divate, kuwomba Mkoma Txizimu.
13Wona taku, ni pekile manza ngu mhaka ya kufelela kwako aku u nga kumaha, ni mnoha wu wu nga theketwa kwako 14Ina mwendo mbilu yako yi na va yi di tsani kani? Manza ako ma nava ma di ni mtamo, ka masiku ale ni no ku tela kani? Ani Mkoma ni wombile, kambe ni na ti maha. 15Se ni na kuhangalasa hagari ka matiko, ni txi kuhangalasa ka mafu, ni nata heta wubihi wako. 16Awe u na ti nyenyezisa upune, na u txi wonwa ngu matiko, se u na tiziva taku ani ngani Mkoma.
Txikho txo sawulekisa
17Se di tile kwangu dipswi da Mkoma, di txi ta kha dona:
18Awe mwanana wa m'thu, nyumba ya ka Israyeli yi txhipile kwangu; votshe i koporo, ni mthovhu ni simbi, ni simbi yo nemela ngutu, hagari ka txikho; va ti mahile silivhela yo txhipa. 19Ngu kumaha keto, Mkoma a khene: Eko motshenu mi nga ti txhipisa, wonani taku ni na mi sengeleta Jerusalema. 20Nga tile ku patiswako tona silivhela ni koporo, ni simbi, ni simbi yo nemela, ni mthovhu hagari ka txikho, kasi kufuteta mndilo txitimwi ka sona, kasi ku si txi patana, ni na mi patanisisa toneto kuhenyani kwangu ni mu ka txiviti txangu, se ni na mi leka koneho, ni mi nyekisa. 21Kambe ni na mi sengeleta ni futeta txitimwi kwanu, mndilo wa kuhenya kwangu; mi na pataniswa hagari ka txikho. 22Kufana ni kule kupatanako silivhela hagari ka txikho, mi na patanisiswa toneto hagari ka txikho; kambe mi na tiziva taku ani Mkoma, ni na tshakunuta kuhenya kwangu txitimwi kwanu.
Sionho sa vathangeli va ka Israyeli
23Se di tile kwangu dipswi da Mkoma, di txi ta kha dona:
24Awe mwanana wa m'thu, di gele ku khawe: Awe u ditiko daku va u nga mbi sawulekiswa, u si welwiko ngu mati ka ditshiku da kuhenyelwa. 25Kukanetisana ka vaprofeti vako kuho hagari ka dona, kufana ni gonyamo yi bhongako, yi txi ñola txihari; va honyolako tithomba ni simwani somaha, ve engetela tinoni hagari ka dona. 26Vaphaxeli va dona va ndaka mlayo wangu, kambe va nyenyezisela siya sangu so sawuleka; hagari ka wo sawuleka ni wo nyenyeza kha ku nga ni kuhambana, hambi kuhambana ka wo sawuleka ni wa kwa mbi sawuleka; amu ka Masabbata angu, va pfhumisa maso awe, se ngu kumaha keto na nyenyeziswa hagari kwawe. 27Vathangeli vawe hagari ka dona, va fana ni maxolwa ale ma ñolako sihari, kasi kutheketa mnoha, va txi khundumusa mihefemulo, va txi felela. 28Kambe vaprofeti va kona va ti maha dibumba da kwa mbi patelwa, va txi wona kwa mbi nyawula, va txi va gela makuhu va txi kha vona: Mkoma Txizimu a khene; na a sa womba txilo Mkoma. 29Va tsindaveta ngutu vathu ditikoni, va txi pa, va txi lwisa wo xaniseka ni wa kupwata, va txi khozisa mluveli ku si nga ni fanelo.
30Hagari kwawe ni lavile wamwamna wa kuva a nga tsivela diguma, na a ti ka ditshoko masoni kwangu, kasi ku ni si di khundumusi; aniko kha na mana ni wammweyo. 31Ngu kumaha keto, ni tshakunutile kuhenya kwangu; ni va tshokomisile ngu mndilo wa kuhenya kwangu; ni maha ti to nzila yawe yi txi wa txitimwi ka misungo yawe, kuwomba Mkoma Txizimu.
Currently Selected:
Ezekhiyele 22: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
