Ezekhiyele 23
23
Vavasikati vambidi mkoma ni mnanda vavaonhi
1Di tile kambe kwangu dipswi da Mkoma, di txi ta kha dona:
2Awe mwanana wa m'thu, ku vile ni vavasikati vambidi, vanana va mame mmweyo. 3Va to maha wugango Egipta; va mahile wugango i di ngadi vavaphya; va khutaretwe tikhana tawe, titshumbu ta wumbiri wawe ti kamaretetwe. 4Se matina awe i ti ti awa: Ohola, i ku mkomwa kona, ni Oholibha, i ku mnanda; va vile vangu, va velekile vanana vavafana ni vamahorana; kasi ngu ditina dakwe Samariya, i Ohola, se Jerusalema, i Oholibha. 5Se Ohola, na kuve mbwangu; kambe a randanile ni sigango sakwe sa Vasiriya, i ku vaakelani vakwe. 6Va ti ambate sa mkuxe, vathangeli ni vathaviseki, votshe vavaphya, ni vagadhi va mahantxhi na va di ma gadhile. 7Ngu kumaha keto, Ohola a mahile navo wugango, i ku vona i nga ti ti siluva sa vanana va ditiko da Asiriya, ni votshe vale a nga randana navo; a ti nyenyezisile ngu sotshe sithombe sawe. 8Ni wotshe wugelegele wule a nga ta nawo ngu Egipta kha wu leka; nguko va otete nayo i di ngadi mphya, kambe va ñoletete titshumbu ta wuhorana wakwe, se ve thela kwakwe wubihi wawe. 9Ngu kumaha keto, ni mningete manzani ka sigango sakwe, i ku manzani ka vanana va Vasiriya, avale a nga randana navo. 10Vona va vhunungute wumbwiri wakwe, va tekile vanana vakwe va txiwamna ni va txisikati, aniko ene va m'date ngu ditxhari; se a vile ni nduma hagari ka vavasikati, kambe kulamula ku vile txitimwi kwakwe.
11Mnanda wa kona Oholibha mbimo yile a nga ti wona, a to kulisa wugelegele wakwe kupinda wa mkomwakwe, wugelegele wakwe wu to maha wa hombe kupinda wa mwanawe. 12A randani ni vanana va Vasiriya, ni vathangeli ni vathaviseki, i ku vaakelani vakwe, va nga ambala so tshura, va di gadhile mahantxhi, votshe majaha o tshura. 13Se ni woni taku a ti ti nyenyezisile; nzila yawe ngu wumbidi wawe i ti ti yimweyo.
14Oholibha a to engetekelana ka wugelegele wakwe, nguko a woni vavamna vo pendwa, ha disetani, i ku sifananiso sa Vakaldewu, sa mxowo wo bhilivila; 15na siwunu sawe si di sungiliwe, ni sigoko so anama msungoni kwawe, votshe va txi fanana ni vathangeli va yimbi, na va txi fanana ni vanana va Bhabhilona kona Kaldheya, eyo va nga velekelwa kona. 16Se Oholibha a to randana navo, mbimo yi a nga va wona, a to rumela mtumi kwawe kona Kaldheya. 17Sekoko vanana va Bhabhilona va to mtela, va txi otela nayo ha ditahoni ka lirando; se ene a to ti nyenyezisa navo; sekoko moya wakwe wu hambana navo. 18Ngu kumaha keto, a to maha wufenze, e humisa wumbwiri wakwe; sekoko moya wangu wu to ya kule nayo, nga kule moya wangu wu nga ti ti tsute kule ni mkomwakwe. 19Ene koko a to andisa wugelegele wakwe, a txi alakanya masiku a wuhorana wakwe, mbimo yile a nga ti ti maha wugango, ditikoni ka Egipta. 20Se a to randana ni sigango sakwe, esso siro sa sona si fanako ni sa timbongola, ni minavelo ya kona yi fanako ni minavelo ya mahantxhi.
21Ngu kumaha keto, u wuyisile mapimoni kwako, zumbelo ya wuhorana wako, mbimo yile Vaegipta va nga txi ñoletela titshumbu tako, hakhana ka wuhorana wako.
Kutsayiswa ka mnanda wa kona wa txisikati
22Ngu konaho, awe Oholibha, Mkoma a khene: Wona taku ni na wusa sigango sako, asile moya wako wu nga ti ti hambani naso, se ni na si wuyisa ngu ka otshe madhawa, si txi ta kuwukela. 23I ku vanana va Vabhabhilona, ni votshe Vakaldheya va niya Pekodhe, va ku Sowa, Kowa, ni votshe vanana va Vasiriya va ku navo, mazambi ni mahorana o tshura, kumweko ni votshe vathangeli ni vathaviseki, vathangeli va tiyimbi ni votshe va ku ni nduma, votshe nava di gadhile mahantxhi. 24Se va nata kuwukela va di ni sikotxikani ni vathu votala; va txi ta kurandela va di ni sitxhavangu, ni sigoko; kambe ni na veka masoni kwawe valamuli, ava va no kulamula ngu malamulelo awe. 25Se ni na veka kwako kuhiseka kwangu, se va na kuhenyela; va na kuthavisa thonvu ni tinzeve, kambe a txi txi no sala kwako, txi na wiswa ngu ditxhari; va na kutekela vanana vako va majaha ni vamahorana, se asi si no gwitisa kusala kwako, si na tshokomiswa ngu mndilo. 26Kambe va na kuambula simaha, va txi kuhonyola si u ti bombisako ngu sona. 27Ngu kumaha keto, ni heta wubihi wako, ni wugango wako wa ditikoni ka Egipta; kambe khu na mbi va gulela maso, hambi ku ngadi u txi alakanya Egipta.
28Nguko Mkoma Txizimu a khene:
Wona taku ni na kuningela manzani ka vale u va nyenyako, i ku manzani ka vale moya wako wu nga ti ti hambanile navo. 29Va na zumba ni nawe ngu livengo, kambe va na teka wotshe mthumo wako, va txi kusiya u di tximbwiri u sa ambala txilo; ku na tumbulwa tingana ta wugango wako, ni wubihi wako, ni wugelegele wako. 30Eto ti na ku mahekela, nguko u mahile wugango ni vamatiko, kambe u ti nyenyezisile ngu sithombe sawe. 31U tsimbite ngu nzila ya mkomwako; ngu kumaha keto, ni na ningela digombe dakwe manzani kwako.
32 Mkoma Txizimu a khene:
U na sela digombe da mkomwako
do tshima ni kuanama;
u na va txiruko ni txisekiso;
nguko di tate ngutu.
33U na leva ngutu, ni kupandiseka;
digombe da mkomwako Samariya
ndigombe da txixamaliso ni xomulo.
34U na di sela koko, u heta,
u na phatulela likasani ka dona,
kambe u na txukulutela titshumbu tako;
nguko ni zivisile, kuwomba Mkoma Txizimu.
35Ngu toneto, Mkoma Txizimu a khene:
Ngako u nga ni divala, u ni tshuralela, u na rwala wubihi wako ni wugelegele wako.
Kutsayiswa ka vavasikati va mkoma ni mnanda
36Se Mkoma a to khene kwangu:
Awe mwanana wa m'thu, ina u nga lamula Ohola ni Oholibha kani? Va kombe manyala awe koko. 37Nguko va mahile wugango, se ku ni mnoha manzani kwawe; va mahile wugango ni sithombe sawe, ni vanana vale va nga ni velekela, va va pindisile ngu mndiloni, wu txi va tshokomisa. 38Timwani va nga ni mahela ngu tiya: Va nyenyezisile nyumba yangu yo sawuleka, ka dona ditshiku edo, ve nyenyezisa Masabbata angu. 39Ngako va nga phaxela ngu vanana vawe ka sithombe sawe, va ti ti ta ka nyumba yangu yo sawuleka ka dona ditshiku edo, va txi ta yi nyenezisa; kambe va si mahile hagari ka nyumba yangu.
40Kambe va tisile vavamna vokari ngu kule; va nga va rumelela mtumi, se vona va nje kuta; u sambile ngu mhaka ya ku va randa, u pendetete maso ako, u txi ti bombisa ngu so tshurisela. 41Kambe u khalahatshile ha m'bhedhuni ka lisima, eho ku ngadi lulamisetwe meza; se u to ya sanzeka ka yona dibaselo dangu ni mafura angu. 42Ku to pfala dipswi da kutsaka da dibutho, se ku to tiswa vathu va wusiwana kumweko ni madevi a txiwulani; va to va ambeka masinda mawokoni kwawe, ni mibhoti yo phatima ka misungo yawe. 43Sekoko ni to khani ka wule wo kumbela wugangoni: Konkuwa va na ti nyenyezisa nayo, se nene kumweko navo. 44Se va to randana nayo, kufana ni loku va txi randana ni digelegele; ngu kumaha keto, va to randana ni Ohola ni Oholibha, i ku vavasikati va nduma yo biha. 45Ngu kumaha keto, vavamna vo lulama, va na lamula Ohola ni Oholibha, ngu malamulelo a magelegele, ni ku nga vo lamula vale va theketako mnoha; nguko vona magelegele, kambe mnoha wu manzani kwawe.
46Nguko Mkoma Txizimu a khene:
Ni na va maha ve lwiswa ngu msengeletano, ni txi va ningela ve thaviswa ditikoni, va txihandwa. 47Se msengeletano wu na va balisela ngu marigwi, ni ku va tholetela ngu matxhari; vanana vawe va mazambi ni vamahorana va na dawa, ni tinyumba tawe ti na hisetelwa ngu mndilo. 48Ngu kumaha keto, ni na wilisa nduma yo biha amu ditikoni, kasi ku votshe vavasikati va na leka kulondeta nduma yanu yo biha. 49Se wubihi wanu mi na wu rwala, mi na rwala ni sionho sa sithombe sanu; kambe mi na tiziva taku ani ngani Mkoma Txizimu.
Currently Selected:
Ezekhiyele 23: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
