Ezekhiyele 24
24
Khadi yo bhirela
1Se di tile kwangu dipswi da Mkoma, ngu dilembe da wutxhanu ni mune, ka mtxima wa wugumi, ka ditshiku da wugumi da mtxima, di txi ta kha dona:
2 # Wona ni ka: 2 Vafu. 25:1; Jer. 52:4. Awe mwanana wa m'thu, bhala ditina da ditshiku diya, da dona ditshiku diya; nguko mfumeli wa Bhabhilona wa tshuketela Jerusalema ka dona ditshiku diya. 3Kambe maha txidinganiso u txi m'gela tiya: Mkoma Txizimu a khene:
Releka khadi ha mndiloni, yi releke u thela mati ka yona,
4beta sitxuwu sa sinene sa nyama,
minenge ni siphanga
u txi yi tata ngu marambu o langelwa.
5Ñola txifuyo txatxinene ka mtxhambi,
hisa marambu a kona hahatshi ka khadi;
yi halise kha kwati,
kambe ma na vitwe kha kwati marambu ale.
6Ngu kumaha keto, Mkoma a khene:
Dikhombo ka didhoropa do theketa mnoha, ka khadi yo nzihala, eyo kunzihala ka kona ku si thavekiko! Thavisa txitxuwu txa nyama ka yona tximwetxo ngu tximwetxo, u nga wise txilo. 7Nguko mnoha wa kona wu hagari ka dona; wu nga thelwa txitimwi ka dirigwi, kha wa thekela hahatshi, kasi ku wu si kuletelwi ngu mafu; 8kasi ku kwelisa kuhenya, kuteka ku ti photela, ni thete mnoha amuka dirigwi do keleka, kasi ku wu si kuletelwi.
9Ngu tona eto, Mkoma a khene:
Dikhombo ka didhoropa do theketa mnoha! Kambe ni na dhivela txikho txa hombe. 10Sengeletela tikhuni tatingi, dhivela mndilo, vitiswa nyama, u txi yi thela sithimbelo, marambu a kona ma na ture. 11Sekoko, u na releka khadi yiya txitimwi ka makala a mndilo na yi si nga ni txilo, kasi ku yi txi hisa, ku txihya kubhirela kule, ku txi mwalala yotshe nzambwa, ku txi guma ku nzihala ka yona. 12Ngu thuma ka walo; kha ka thaveka ku nzihala ka khadi; ku nzihala ka yona ku na ya mndiloni. 13Amu ka wubihi wako ku ni nduma yo biha, nguko ni ku sawulekisile, aniko awe khwa ti sawulekisa; khu na mbiswa u sawulekiswa ka wubihi wako, ngako ni si leki ku ku henyela. 14Ani Mkoma ni ti khani: Ti na maheka, ni na ti maha; kha ni na mbi tshumelela msana, kambe kha ni na mbi pimela, hambi kutilaya; madingano ni tinzila tako, ni madingano ni mithumo yako, va na kulamula, kuwomba Mkoma Txizimu.
Kufa ka msikati wa mprofeti
15Se di tile kwangu dipswi da Mkoma, di txi ta kha dona:
16Awe mwanana wa m'thu, wona taku ni na thavisa kunavela ka maso ako ngu ku kupeka, aniko khu na mbi pandiseka, kambe khu na mbi dila, hambi kuwa mirongo yako. 17Dilisa kutipimela; u nga dilele vafi, ambala txigoko txako, ni tikathula mikondoni kwako; u nga sisale u txi dya sakudya sa vathu.
18Ni mixo ni wombawombile ka vathu, se ni minova a txi fa msikati wangu. Ni ti mahile ngu mlayo wa kona ni mixo. 19Se vathu va to kha vona kwangu:
Ina khu na mbi hi ninga txhamuselo ya tona ti u mahako kani?
20Se ani ni to khani kwawe:
Di tile kwangu dipswi da Mkoma, di txi ta kha dona: 21I nda khawe ka nyumba ya ka Israyeli: Mkoma Txizimu a khene: Wonani taku ni na nyenyezisa nyumba yangu yo swuleka, i ku wudhumo wa kutsaniswa kwanu, ni kunavela ka maso anu, ni kutsaka ka mihefemulo yanu; se vanana vanu va mazambi ni vamahorana vale mi nga va siya, va na dawa ngu ditxhari. 22Kambe mi na mahisa ti ni nga mahisa tona; mi nga sisaleni, kambe mi nga dyeni sakudya sa vathu. 23Kambe mi na ambala sigoko ka misungo yanu, ni tikathula mikondoni kwanu; kha mi na mbi pandiseka hambi kudila, aniko mi na fela ka wubihi wanu, mi txi dila vamwevo ka vamwani. 24Ngu kumaha keto, Ezekhiyele a na va txikombiso kwanu; mi na maha totshe tile a no va a di mahile; se mbimo yi eto ti no maheka, mi na tiziva taku, ani ngani Mkoma Txizimu.
25Se ngu kwako awe mwanana wa m'thu:
Kha ku na mbi maheka taku, ka ditshiku di ni no thavisa mkhokhola wawe, i ku wudhundo wa ku ti bombisa kwawe, ni kunavela ka maso awe, kuwusetwa ka mihefemulo yanu, ni vanana vanu va mazambi ni vamahorana, 26kedo ditshiku, ina a nata wokari kwako, ka vale va no huluka, a txi ta womba tinzeveni kwako tona tiya kani? 27Kedo ditshiku, txi na tuleka txisofu txako ka wule a no huluka; se u na womba-womba, khu na mbi maha txiduma ka mbimo yo lapha; ngu kumaha keto, u na va txixamaliso kwawe, kambe va na tiziva taku ani ngani Mkoma.
Currently Selected:
Ezekhiyele 24: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
