Ezekhiyele 25
25
Txiprofeto txo wukela Amoni
1Se di tile kwangu dipswi da Mkoma, di txi ta kha dona:
2Awe mwanana wa m'thu, thuvikela vanana va ka Amoni, u txi profeta u va wukela. 3Se i nda khawe ka vanana va ka Amoni: Engisani dipswi da Mkoma Txizimu: Mkoma Txizimu a khene: Ngako awe u nga khawe: Yowe! Yowe! Madingano ni nyumba yangu yo sawuleka, mbimo yile yi nga nyenyeziswa; ni mhaka ya ditiko da ka Israyeli, mbimo yile di nga xaselwa; ni mhaka ya va nyumba ya ka Judha, mbimo yile va nga yiswa wukhumbini; 4wona taku ni na kuningela uva thomba ya va Wutxani, va na tsanisa mazambo awe kwako, ve aka tinyumba tawe kwako; va na dya mihando yako, ve sela masi ako. 5Ni na maha ti to Rabha eva wudyiselo wa makamelu, ni vanana va ka Amoni veva txibala txa tinvuta; kambe mi na tiziva taku ani ngani Mkoma.
6Nguko a womba tiya Mkoma Txizimu: U ti woni ti u nga pekisa tona manza, ni kuginga ngu mikondo, ni ti to u tsakile ngu mbilu, ka wotshe wubihi wako, u txi lwisa ditiko da ka Israyeli, 7wona taku ni na nawuluta dianza dangu ni txi kulwisa, se ni na kuningela u handwa ngu matiko, ni txi ku dula hagari ka matiko, kambe ni na kuhasamula hagari ka matiko; se u na tiziva ti to ani ngani Mkoma.
Txiprofeto txo wukela Mowabhi
8 Mkoma Txizimu a khene:
Ngako Mowabhi ni Seyiri va ku kha vona: Wonani taku nyumba ya ka Judha yi fana ni otshe matiko; 9ngu kumaha keto, ani ni na tula ka didhawa da Mowabhi, kukhukhela ka madhoropa, ni ka madhoropa a kule ni mihingano, i ku wudhumo wa ditiko, Bheti-Jesimote, Bhahali-Meyomi, kala Kiriyatayimi; 10kala ka vanana va Wutxani, ka ditiko da vanana va ka Amoni, adi ni no di ningela di txi maha thomba, kasi ku si alakanywi vanana va ka Amoni hagari ka matiko. 11Kambe ni na maha wulamuli kona Mowabhi, se va ka Mowabhi va na tiziva taku ani, ngani Mkoma.
Txiprofeto txo wukela Edhomi
12 # Wona ni ka: Isa. 14:29-31; Jer. 47:1-7; Joy. 3:4-8; Amo. 1:6-8; Zef. 2:4-7; Zak. 9:5-7. Mkoma Txizimu a khene:
Ngako koko va ka Edhomi va nga ti photela ka nyumba ya ka Judha, va txi ti manisa mnandu ngutu, mbimo yile va nga ti photela kwakwe, 13ngu tona eto, Mkoma Txizimu a khene: Ni na nawuluta dianza do wukela Edhomi, kambe ni na dayela kwakwe vathu ni sihari; kambe ni na di maha txiwula, kukhukhela Temani kala Dhedhani, va na dawa ngu ditxhari. 14Se ni na phota txitimwi ka Edhomi, ngu dianza da vathu vangu va Israyeli; vona va na maha ka Edhomi madingano ni kuhenya kwangu, ni madingano ni txiviti txangu; se va ka Edhomi va na ziva kuphota kwangu, kuwomba Mkoma.
Txiprofeto txo wukela Wamsikati wa Mufilista
15 Mkoma Txizimu a khene:
Nga kule Vafilista va nga phota, va txi phota ngu wubihi wa timbilu tawe, va txi fuvisa ngu wulala wa kwa mbi gwita, 16ngu tona eto, Mkoma Txizimu a khene: Wona taku na nawuluta dianza dangu ni txi lwisa Vafilista, kambe ni na dayela Vakereti, ni txi khundumusa mule ku salako i ku mabambe ka linene. 17Se ni na phota ngutu kwawe, ngu sitsayiso sa txiviti, kambe va na tiziva taku ani ngani Mkoma, mbimo yi ni no va ni di photile txitimwi kwawe.
Currently Selected:
Ezekhiyele 25: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
