Ezekhiyele 26
26
Txiprofeto txo wukela Tiro
1Se ku to maheka taku, ngu dilembe da wugumi, ka ditshiku do khata ka mtxima, di txi ta kwangu dipswi da Mkoma, di txi da kha dona:
2Awe mwanana wa m'thu, nga kule Tiro a nga khene ka Jerusalema: Yowe! Yowe! Di fayilwe ditimba da vathu; di rendekete kwangu; ni na talelwa, aniko ene a xasetwe!
3Ngu kumaha keto, Mkoma Txizimu a khene: Wona taku ani na kuwukela awe Tiro, se ni na maha ti to matiko o tala ma txi kulwisa, ku nga linene li guletako mavimbi a lona. 4Ona ma na khundumusa maguma a Tiro ni sitezi sa kona, kambe ani ni na hiyela lithulu la kona, ni wumba dirigwi do kenyeka. 5Hagari ka linene ku na omiselwa kona tikoka; nguko ani ni zivisile eto, kuwomba Mkoma Txizimu; kambe dona di na handwa ngu matiko. 6Se vanana vakwe vamahorana va ku thembweni va na dawa ngu ditxhari; kambe va na tiziva taku ani ngani Mkoma.
7Nguko Mkoma Txizimu a khene:
Wona taku Tiro ni na mtisela Nebhukodhonosori, mfumeli wa Bhabhilona, kukhukhela Wuphemba, mfumeli wa vafumeli, ni mahantxhi, ni sikotxikani, ni vagadhi va mahantxhi, ni vaheleketi, ni vathu votala ngutu. 8Mlala a na daya vanana vako vamahorana ngu ditxhari, vale va manekako thembweni, kambe a na ti mahela txivhikelo masoni kwako, ni ku ti akela sitsaniso, ni ko rithimuka ngu kona. 9A na veka so khundumusa maguma ako u txi si wona, ni kukhundumusa sitezi sako ngu matxhapu. 10A na ku fenengeta ngu lithulu la mahantxhi akwe o tala; maguma ako ma na zinginika ngu sigingo sa mahantxhi, ni sa madangarita, ni sa sikotxikani, mbimo yile mlala a no wulela ngu matimba ako, nga o wulela ngu sike si nga tuletelwa sa didhoropa. 11Ngu sitsendo sa mahantxhi akwe, a na ganyatela totshe tinzila tako; a na daya vathu vako ngu ditxhari, ni tiphande ta mkhokhola wako ti na wa hahatshi. 12Se va na pa tithomba tako, va txi handa siya sako, ve khundumusela maguma ako, ni kukhundumusela tinyumba tako ta lisima; ni marigwi ako, ni mapulango ako, se lithulu lako va na li xwaya hagari ka mati. 13Se ni na emisa diguwa da tindando tako, ni dipswi da tiharipa tako kha di na mbi pfala kambe. 14Kambe ni na kumaha dirigwi da kwa mbi keleka; u na va wukhalo wule ku no omisela kona tikoka, khu na mbiswa u txi aketetwa kambe; nguko ani Mkoma ni wombile, kuwomba Mkoma Txizimu.
15 Mkoma Txizimu a khene ka Tiro:
Ina sitondolo kha si na mbi deka-deka ngu diguwa da kuwa kwako, mbimo yile va no keta vale va no dayelwa, mbimo yile ya kudayelwa ko xamalisa hagari kwako kani? 16Se vathangeli va lineneni va na txhika ngu situluni kwawe ka wukoma, kambe va na thavisa sifenengelo sawe, ve ambula simaha sawe so lukelwa; va na ambekwa kudhudhumela, va khalahatsha ha mafuni, va txi dhudhumela yotshe mbimo; kambe ngu mhaka yako, va na xamala. 17Se va na kudila va txi kha vona:
Eto u nga lovisa tona awe didhoropa do akwa kwati do tshura.
Awe u ngadi mtamo lineneni;
awe ni vaaki vako,
mi nga dhukisa votshe vale va nga kuendela!
18Konkuwa, si na zinginika sitondolo
ngu ditshiku da kuwa kwako;
sitondolo si ku lineneni, si na dhungeka ngu kukhukha kwako.
19Nguko Mkoma Txizimu a khene:
Mbimo yi ni no kumaha didhoropa da dirumbi, nga madhoropa ale ma kuwalo vo zumba, aha ni no maha kuhokoma kwako, se mati o tala ma txi kumita, 20sekoko ni na kureleta ni vale va relelako diphalani, ka vathu va kale, ni txi ya kuotelisa ka makhalo a hahatshi ngutu mafuni, ka makhalo a siwula sa kale, ni vale va relelako diphalani, kasi ku ku si maneki vo zumba kwako; kambe ni na veka wudhundo ka mafu a vale vo hanya. 21Ni na kumaha txixamaliso txa hombe, kambe khu na mbi va i di awe kambe; mbimo yi va no kulava, khu na mbi ngadi u manwa kambe, kuwomba Mkoma Txizimu.
Currently Selected:
Ezekhiyele 26: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
