Ezekhiyele 27
27
Ndando ya kutshotshwa ka Tiro
1Se di tile kwangu dipswi da Mkoma, di txi ta kha dona:
2Awe koko mwanana wa m'thu, wusa txidilo txo dila Tiro. 3Se womba ka Tiro, wule a zumbako ka tinzila ta lineneni, e thumisana ni vathu ka sitondolo sasingi, u txi khawe: Mkoma Txizimu a khene:
Awe Tiro u khawe: Ani ni tshurile ko hetelela.
4Mihingano yako yi hagari ka tinene;
avale va nga kuaka, va ku tshurisete kha kwati ngutu.
5Va mahetete otshe mapulango a Seniri;
va ku mahete tisika ngu mikedhari ya Libhanoni.
6Madhavi ako ngo mahwa ngu mikusu ya Bhasani;
Vasiriya va ku tshurisete ngu makwasa a tinzofu
ta sitondoloni ka Ketiyini.
7M'jiyo wako wo lukwa i ti ti wa disilika da Egipta,
kasi ku wu maha ditanga;
da mkuxe ni kubhilivila, sitondoloni ka Elisi
i ti ti didhamba dako.
8U tsimbitisetwe tingalava ngu vazumbi va Sidhoni ni va Arivhadhe;
va rumi va tingalava tako awe Tiro ngu titxhari.
9Madhota a Gebha ni titxhari ta kona,
ngu vona va nga txi lemetela tifa;
sotshe sitimela sa lineneni ni vatsimbitisi va sona, va ti ti maha mabhindu ako.
10Vapersa ni Validhiyo, ni va Pute, i ti ti masotxhwa ako; sitxhangu ni sigoko va hayekile kwako, va ku tshurisete ngu sona. 11Vanana va Arivhadhe ni dibutho dako va ti ti randete maguma, se va ka Gamadhi va ti ti sitezi kwako; va to hayeka sitxhangu sawe ka maguma ako; vona va to ku tshurisela ngu kuhetelela.
12Tarxixi a ti ti thumisana ni nawe, ngu mhaka ya kutala ka totshe tixaka ta tithomba; ni silivhela, ni simbi, mthovhu ni simbi yo nemela ngutu mi ti ti thumisana ka makhalo ako. 13Javhani, Tubhali, ni Meseki i ti ti vaxavi kwako; mi xaviselani tikhumbi ni siya sa koporo. 14Va ti ti tisa mahantxhi ni vagadhi va ona ka makhalo ako, ngu tinyumbani ka Togarima. 15Vanana va Dhedhani i ti ti vaxavi vako; sitondolo sasingi i ti ti makhalo a wukwewu wako; sitondolo sasingi i ti ti dibhindu da manza ako; va ti ti kuninga siningo sa makwasa a tinzofu ni mapulango a mtima. 16Siriya a ti ti xaviselana ni nawe ngu mhaka ya kutala ka si u nga si thuma; sa esmeraldha, so bhilivila, ni so lukwa, ni sa disilika, ni korali, ni kristali, va txi si tisa ka makhalo ako. 17Judha ni ditiko da Israyeli i ti ti vaxavi kwako, va fulaho yota ngu Miniti, ni mpupu, ni wulombe, ni mtona, ni sa kutola, va xaviselani ni nawe 18Dhamasku a xaviselani ni nawe ngu mhaka ya kutala ka si u nga si thuma, ngu mhaka ya kutala ka totshe tixaka ta tithomba, ni vhinya ya Helibhoni, ni matoya o basa. 19Ni ene Dhani ni Javhani, va ti ti pfhukisa ngu ka makhalo ako; ka wuxavisi wako ku ti ti wulela simbi yo swilitelwa, makamba ni titshava to bhumula. 20Dhedhani a ti ti xaviselana ni nawe ngu tinguwo ta lisima to veka ha ka txikotxikani. 21Arabhiya ni otshe madhota a Kedhari, i ti ti vona manza a wuxavisi wako, ngu tinvuta, ni tihamba, ni vamabhongwe; ka soneso va ti ti xaviselana ni nawe. 22Vanyamabhindu va Sabha ni Rama, i ti ti vona vaxavisi vako; ka sotshe sile so bhumula ngutu, ni ka otshe marigwi a lisima, kambe ngu nzalama va ti ti xavisa ka makhalo ako. 23Harani, ni Kane, ni Edheni, i ku vanyamabhindu va Sabha, Asuri ni Kilimadhe, va ti ti xaviselana ni nawe. 24Avava i ti ti vaxavisi vako ka sotshe siya sako, sibubu sa simaha sa sinene ngutu, ni so lukwa, ni siya so veka simaha sa lisima, si di sungeletwe ngu tingoti, ni so mahwa ngu mikedhari. 25Sitimela sa Tarxixi si ti ti longolokisana ngu mhaka ya wukwewu wako.
Ngu mhaka ya wukwewu wako;
se u ti tatete ni ku ti dhumisa hagari ka tinene.
26Vatsimbitisi vako va ku tsulisile ka mati a hombe;
moya wa wutxani wu ku hetile mtamo hagari ka tinene.
27Tithomba tako, makhalo ako, dibhindu dako,
vatsimbitisi vako, ni varumi va kona,
avale vo lemetela tifa, ni vamahi va mabhindu ako,
ni otshe masotxhwa ako, ale ma ku kwako,
ni wotshe msengeletano wako, wu ku hagari kwako,
va na bhwabhwamela lineneni ngu ditshiku da kuwa kwako.
28Ngu diguwa da kuketa ka varumi vako,
va na dhudhumela vatsimbitisi.
29Se votshe vañoli va reme, vatsimbitisi ni votshe varumi va lineneni,
va na txhika ngu sitimelani kwawe, ve ta maneka ha mafuni.
30Va na pfalisa huwa yawe kwako,
ve dila ngu kupandiseka ka hombe, ve ti xwayela lithulu ha msungo,
se va na pulukuta ha ka dikhuma.
31Kambe va na yola misungo ngu mhaka yako,
ve ambala masaka
va na dila kwako ngu kupandiseka ka moya, ngu kudila ka hombe.
32Se va na wusa txidilo txitimwi kwako kudilani kwawe, va na dila kwako va txi kha vona:
I mani a nga nga fana ni Tiro,
awu a nga malatwa hagari ka linene kani?
33Mbimo yile simaha sako si nga ti ti tsuliswa ngu tineneni,
u khurisile vathu votala;
ngu kutala ka tithomba tako
ni mabhindu ako,
u humelelisile vafumeli va ha mafuni.
34Ka mbimo yile u nga phatulelwa tineneni,
hahatshi ngutu ka mati,
ma wite mabhindu ako
ni msengeletano wotshe hagari kwako.
35Votshe vazumbi va sitondoloni va to tala ngu kuxamala ngu mhaka yako; se vafumeli vawe va to dhudhumela ngutu, se tikhohe tawe ti to thuvika. 36Vanyamabhindu hagari ka vathu va to kuvetela miloti; awe u to maha txixamaliso ta hombe, kambe khu na mbiswa kambe u maneka ka yotshe mbimo.
Currently Selected:
Ezekhiyele 27: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
