Ezekhiyele 28
28
Txiprofeto txo wukela mfumeli wa Tiro
1Se di tile kwangu dipswi da Mkoma, di txi ta kha dona:
2Awe mwanana wa m'thu, gela mthangeli wa Tiro ku khawe: Mkoma Txizimu a khene: Nguko mbilu yako yi ti guletile u txi khawe: Ani ni Txizimu, ni khalahatshile ha txituluni ka Txizimu, hagari ka tinene (na u di m'thu, khu nga Txizimu), kambe u themba mbilu yako ku nga yova mbilu ya Txizimu; 3Wona taku u txharihile kupinda Dhaniyele: Kha ku na txihunja ni txa tximwetxo txo timeleka kwako. 4Mtamo wako u wu mani ngu wutxhari wako ni mapimo ako, kambe u mani nzalama ni silivhela txisangalani kwako. 5Mtamo wako u wu engetete ngu kuanama ka wukwewu wako; se u guletile mbilu yako ngu mhaka ya mtamo wako.
6Ngu kumaha keto, Mkoma Txizimu a khene: U themba mbilu yako koko, ku nga yova mbilu ya Txizimu. 7Wona taku, ni na tisa vamatiko txitimwi kwako, avale vo karata ngutu hagari ka matiko, avale va no swomola matxhari awe, ve wukela kutshura ka wutxhari wako, kambe va na nzihalisa kuphatima kwako. 8Va na kureleta diphalani, u na fa ngu felo ya vale va dawako hagari ka tinene. 9Kambe u na khawe masoni ka wule a no kudaya: Ani ni Txizimu kani? Kuve awe u m'thu, khu nga Txizimu, manzani ka wule a ku dayako. 10U na fa ngu felo ya vanyamakhutu, manzani ka vamatiko, nguko ani ni wombile, kuwomba Mkoma Txizimu.
Kuwa ka mfumeli wa Tiro
11Di tile kambe kwangu dipswi da Mkoma, di txi ta kha dona:
12Awe mwanana wa m'thu, wusa txidilo txitimwi ka mfumeli wa Tiro, u txi m'gela ku khawe: Mkoma Txizimu a khene: Awe mfumeli u lipimo lo hetiseka, wo tala ngu wutxhari ni kutshura ko hetiseka. 13U ti ti maneka Edheni, thembweni ka Txizimu; u fenengetwa ngu otshe marigwi a lisima: I ku sardhoni, topazi, dhayimani, turkeza, onekisi, jasiperi, safira, karbhukulu, esmeraldha, ni nzalama, i ku mthumo wa tingoma tako ni makhombela ako, si ti ti kwako; si nga lulamiselwa ka ditshiku dile u nga vangwa ngu dona. 14U ti ti dikerubhima do totwa kasi kuvhikela, kambe ni kuvekile; u ti ti mmangoni ko sawuleka ka Txizimu, u ti ti tsimbila hagari ka marigwi o phatimisa ku nga mndilo. 15U ti ti hetisekile ka matsimbilelo ako kukhukhela ka ditshiku dile u nga vangwa ngu dona, kala ku ku txi ta maneka wubihi kwako. 16Ngu kutala ka wukwewu wako, mndani kwako ku to tala ngu timboyinga, se u txi onha; ngu kumaha keto ni na kutshotsha u dinyenyezile hahanze ka mmango wa Txizimu; kambe ni na kulovisa, awe dikerubhima do vhikela, hagari ka marigwi o phatimisa ku nga mndilo. 17Mbilu yako yi gulekile ngu mhaka ya kutshura kwako, u onhile wutxhari wako ngu mhaka ya kuphatima kwako, ni ku tshotshile ha mafuni, ni kuvekile masoni ka vafumeli, kasi kuva txi kuwonetela. 18Ngu mhaka ya kutala ka wubihi wako, ni wukwewu wako wo dyelela u nyenyezisile tinyumba tako to sawuleka: Ani koko ni humisile mndilo ngu hagari kwako wu txi kutshokomisa, kambe ni kumahile dikhuma txitimwi ka mafu, masoni ka votshe vale va kuwonako. 19Votshe vale va ku zivako hagari ka vathu, va ku kuxamala: U ti mahile txixamaliso txa hombe, khu na mbi nga ngadi u diho kambe.
Txiprofeto txo wukela Sidhoni
20Se di tile kwangu dipswi da Mkoma, di txi ta kha dona:
21Awe mwanana wa m'thu, thuvikela Sidhoni, profeta u txi muwukela. 22Se i nda khawe: Mkoma Txizimu a khene: Wona taku na kuwukela awe Sidhoni, kambe ni na dhumiswa hagari kwako, mi na tiziva taku ani ngani Mkoma, mbimo yi ni no mlamula, ni txi ti sawulekisa kwakwe. 23Nguko ni na rumela mtungu ka dona, ni mnoha tinzilani ka dona, se avale vo dayelwa va na wetetela hagari ka dona, ngu ditxhari di di mrandelako; se va na tiziva taku ani ngani Mkoma.
Makatekwa ka vathu va ka Israyeli
24Se nyumba ya ka Israyeli, kha yi na mbiswa kambe yi di ni mpa wa ku yi tholetela, hambi mpa wo pfisa kupanda, ka ni wihi wa wule a va pelako madhawani kwawe: Va na tiziva taku ani ngani Mkoma Txizimu.
25Ngu kumaha keto, Mkoma Txizimu a khene:
Mbimo yile ni no sengeleta va nyumba ya ka Israyeli hagari ka matiko, ale va nga hangalaka ka ona, se ni txi ti sawulekisa hagari kwawe, masoni ka matiko, sekoko va na zumba ka ditiko dawe, dile ni nga ninga txithumi txangu Jakobe. 26Se va na zumba ka dona ngu kutsana, va na aka tinyumba ni kuphaya mivhinya: Ina, va na zumba ngu kutsana, mbimo yile ni no lamula votshe vale va va pelako madhawani kwawe; va na tiziva taku ani ngani Mkoma, Txizimu txawe.
Currently Selected:
Ezekhiyele 28: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
