Ezekhiyele 29
29
Txiprofeto txo wukela Egipta
1Ka dilembe da wugumi, ka mtxima wa wugumi, ngu ditshiku da digumi ni mambidi ka mtxima, di tile kwangu dipswi da Mkoma, di txi ta kha dona:
2Awe mwanana wa m'thu, rendekelisa khohe yako ka Faro, mfumeli wa Egipta, se profeta u txi mu wukela, u wukela ni dotshe ditiko da Egipta. 3Womba u txi khawe: Mkoma a khene: Wona taku na kuwukela awe Faro, mfumeli wa Egipta, mwamilambo wa hombe, u khandamako hagari ka minambo yako, kambe u khawe: Mnambo wangu mbwangu, ngani ni nga ti mahela wona. 4Aniko ni na vekela simemba titshayani kwako, kambe ni na khweketela sihaka sa minambo yako ka magwagwarimba ako. 5Se ni na ya kuleka txiwulani, awe ni sotshe sihaka sa minamboni kwako; u na wa ha mafuni, khu na mbi rolelwa hambi kusengeletwa; u na dyiwa ngu sihari sa ha mafuni ni sinyana sa nzuma. 6Se votshe va zumbako Egipta va na tiziva taku ani, ngani Mkoma.
Nguko va ti mahile ndonga ya litshava masoni ka nyumba ya ka Israyeli. 7Mbimo yile va nga kuñola ngu dianza, u ti funyile u txi va dayisela otshe makata. 8Ngu tona eto, Mkoma a khene: Wona taku ni na tisa ditxhari txitimwi kwako, ni txi ta dayela votshe vathu ni sihari. 9Se ditiko da Egipta di na maha dirumbi ni txiwula; kambe va na tiziva taku ani ngani Mkoma.
Nguko u ti khawe: Mnambo mbwangu, ngani ni nga wu maha, 10ngu tona eto, ani na kuwukela, ni kuwukela minambo yako; se ni na maha Egipta eva dirumbi ni txiwula txa txiwunda, kukhukhela Migidholi kala Seveni, kala mihinganoni ka Etiyopiya. 11Kha ku na mbi pinda mkondo wa m'thu ngu ka dona, hambi mkondo wa txihari kha wu na mbi pinda ngu ka dona, kha ku na mbi va ni vo zumba amu ka mune wa magumi a malembe. 12Nguko ni na maha ditiko da Egipta di va dirumbi hagari ka mafu a marumbi; ni madhoropa a kona, hagari ka madhoropa a siwula, ma na maha siwula amu ka mune wa magumi a malembe; kambe ni na hangalasa Vaegipta hagari ka matiko, ni txi va theketa ha mafuni.
13Aniko Mkoma Txizimu a khene:
Kugumani ka malembeyo a mune wa magumi, ni na tshanganisa Vaegipta ka makhalo ale va nga hangalaka ka ona. 14Se ni na thavisa wukhumbi wa Vaegipta, ni txi va wuyisa ditikoni ka Patrosi, i ku ditiko di va nga ta ngu ka dona; koneyo, va na va mfumo wa wudotho. 15Wu nava mfumo wa hahatshi kupinda yimwani mifumo, kha wu na mbi va txitimwi ka yimwani mifumo; nguko ni na va hungula, kasi ku va si khozisi yimwani mifumo. 16Kambe khu na mbi ngadi u thembeka ka nyumba ya ka Israyeli, kasi ku va alakanyisa ngu wubihi wawe, ngako va txi wona msana kwawe; va no tiziva dwe taku ani ngani Mkoma Txizimu.
Nebhukodhonosori e khozisa Egipta
17Se ku to maheka taku ngu dilembe da magumi mambidi ni mtxhanu ni mambidi, ka mtxima wo khata, ka ditshiku do khata da mtxima, di tile kwangu dipswi da Mkoma di txi ta kha dona:
18Awe mwanana wa m'thu, wona taku, Nebhukodhonosori mfumeli wa Bhabhilona, a mahile ti to dibutho dakwe di txi maha mthumo wa hombe wa kuxasela Tiro; veza ve kuluwuka ni misisi ve maha tigwayi, ku pshwerukela ni makata, aniko Nebhukodhonosori kha nga wuyelwa ngu txilo kona Tiro, hambi ni dibutho dakwe, ka mthumo wule di nga maha wa kuwukela Tiro.
19Ngu tona eto, Mkoma Txizimu a khene: Wona taku ni na ningela ditiko da Egipta ka Nebhukodhonosori, mfumeli wa Bhabhilona, kambe a na teka ni mabutho a kona, e teka ni sile so handwa, ni kupa sile si nga manwa, nguso di no wuyelwa ngu sona dibutho dakwe. 20Kasi kudihela mthumo wakwe wule a nga wu maha wa kuwukela Tiro, ni mningile ditiko da Egipta, nguko va thumile wukhaloni kwangu, kuwomba Mkoma Txizimu.
21Ka dona ditshiku dile, ni na milisa mtamo ka nyumba ya ka Israyeli, se ni na kumaha u tula txisofu hagari kwawe; kambe va na tiziva taku ani ngani Mkoma.
Currently Selected:
Ezekhiyele 29: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
