Ezekhiyele 30
30
Txizimu txi tsayisa Egipta
1Se di tile kwangu dipswi da Mkoma, di txi ta kha dona:
2Awe mwanana wa m'thu, profeta u txi khawe: Mkoma Txizimu a khene: Dilani mi txi khanu:
Yowe! Ditshiku dileya!
3Nguko di hafuhi ditshiku da Mkoma,
ditshiku da marefu; i nava ditshiku da vamatiko.
4Se ku nata ditxhari ka Egipta,
kambe Etiyopiya ku nava ni kupandiseka ka hombe,
mbimo yile va no wa vale va no dayetelwa Egipta;
ni kutekwa dibutho, ku txi khundumuswa sitsaniso sa kona.
5Etiyopiya, ni Pute, ni Ludhe, ni votshe vathu vale va nga patanelana,
ni Kubhe, ni votshe vanana va ditiko da txitumelelano,
va na wiswa kumweko nayo ngu ditxhari.
6 Mkoma a womba tiya:
Va na wa ni vona vale va emelako Egipta, se matshanza a mtamo wawe ma na boxa; kukhukhela Migidholi kala Seveni, eyo va na wiswa ngu ditxhari, kuwomba Mkoma Txizimu: 7Va nava marumbi hagari ka matiko ale i ku marumbi; se madhoropa awe ma nava hagari ka madhoropa a txiwula. 8Se va na tiziva taku ani ngani Mkoma, aha ni no hisa Egipta ngu mndilo, va txi fuviswa votshe vale va nga ti ti m'vhunetela.
9Ka ditshiku dileya, ku na khukha mitumi masoni kwangu ngu sitimela sa matini, kuya dhukisa Etiyopiya, ka mihoni yakwe; ku nava ni kupandiseka ka hombe, ku nga ka ditshiku da Egipta; wonani taku data.
10 Mkoma Txizimu a khene:
Ani koko, ni na fuvisa dibutho da Egipta, ngu dianza da Nebhukodhonosori, mfumeli wa Bhabhilona. 11Ene kumweko ni vathu vakwe, i ku va mtamo ngutu hagari ka matiko, va na ya khundumusa ditiko da Egipta; va na swomola matxhari awe, ve wukela Egipta, ditiko di na tala ngu sirumbi. 12Kambe ni na omisa minambo, ni xavisa ditiko, ni txi di ningela manzani ka va tshofu, se ni na fuvisa ditiko ni mipfuno ya dona, ngu manza a vamatiko; ani Mkoma ni wombile.
13 Mkoma Txizimu a khene:
Kambe ni na khundumusela sithombe, ni kufuvisa sifananiso sa Nofe; kha ku na mbi ngadi kuva ni mthangeli wa ditiko da Egipta; ni na veka kuthava ditikoni ka Egipta. 14Se Patrosi a na va dirumbi, ni na hisa Zowani, ni na lamula Nomi. 15Ni na tshakunuta kuhenya kwangu txitimwi ka Simi, i ku mtamo wa Egipta, ni fuvisa dibutho da Nomi. 16Se ni na dhivela mndilo Egipta; Simi a na pfa kupanda ka hombe, Nomi a na bhandiselwa, Nofe a na va ni kuxaniseka ditshiku ni ditshiku. 17Majaha a Avheni ni a Pi-Bheseti va na dawa ngu ditxhari, se madhoropa awa ma nava wukhumbini. 18Aniya Tafinesi ditshiku di na phuma, mbimo yi ni no funyeletela makange a Egipta, me guma matshanza a mtamo wakwe; direfu dokari di na fenengeta Egipta, se vanana vakwe vamahorana va na va wukhumbini. 19Ngu tona eto, ni na lamula kona Egipta, va na tiziva taku ani ngani Mkoma.
Mfumeli wo funywa mawoko
20Se ku to maheka taku ka dilembe da wugumi ni dimwedo, ka mtxima wo khata, ngu ditshiku da mtxhanu ni mambidi ka mtxima, di to ta kwangu dipswi da Mkoma di txi ta kha dona:
21Awe mwanana wa m'thu, ani ni funyile diwoko da Faro, mfumeli wa Egipta, wona taku kha va na mbi mthela mrende, hambi ku msungelela mabhanditxhi, hambi ku mtsanisa, kasi ku e ñola ditxhari. 22Ngu tona eto, Mkoma Txizimu a khene: Wona taku ani na wukela Faro, mfumeli wa Egipta, se ni na funya mawoko akwe, adile da dinene ni dile do funywa, kambe ni na wisa dianza dakwe ngu ditxhari. 23Ni na hangalasa Vaegipta hagari ka matiko, ni txi va hangalasa ha mafuni. 24Ni na ninga mtamo ka mfumeli wa Bhabhilona, se ni na veka ditxhari dangu manzani kwakwe; aniko ni na funya mawoko a Faro, se a na ketisa ku nga wule a dawako. 25Ni na guleta mawoko a mfumeli wa Bhabhilona, aniko mawoko a Faro manawa; se va na tiziva taku ani ngani Mkoma, mbimo yi ni no veka ditxhari dangu manzani ka mfumeli wa Bhabhilona, se ene a txi di yisa txitimwi ka ditiko da Egipta. 26Kambe ni na hangalasa Vaegipta hagari ka matiko, ni txi va hangalasa ha mafuni; ngu tona eto, va na tiziva taku ani ngani Mkoma.
Currently Selected:
Ezekhiyele 30: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
