Ezekhiyele 31
31
Egipta, mndonga wa mkedhari
1Se ku to maheka taku ka dilembe da wugumi ni dimwedo, ka mtxima wa wuraru, ngu ditshiku do khata da mtxima, di txita kwangu dipswi da Mkoma di txi ta kha dona:
2Awe mwanana wa m'thu, gela Faro, mfumeli wa Egipta, ni dibutho dakwe, ku khawe:
U fana ni mani awe
ka wuhombe wako kani?
3Wona taku Asiriya i ti ti mkedhari Libhanoni,
wa madhavi o tshura, a mitsudi ya sididi, na ma di laphile,
tshoka ya kona yi ti ti hagari ka madhavi o txhuma.
4Mati ma wu milisile,
wu txi kuliswa ngu kuhokoma,
mati a kona ma ti ti khulunga ma txi ya ka siyalo sa wona,
ma txi dhoda milonga yo theletela ka yotshe mindonga ya thembweni.
5Ngu mhaka yeto, wu to lapha ngutu kupinda yotshe mindonga ya txitinga,
se madhavi a kona ma to dhimba,
ni tindonga ta kona, ngu kutala ka mati.
6Sotshe sinyana sa nzuma si to aka sisaka ka madhavi a wona,
ni sotshe sihari sa txitinga si to velekela hahatshi ka madhavi a wona,
Se votshe vathu va to khalahatshela ka mtsudi wa wona.
7I ti o tshura ngutu,
madhavi a kona amangi,
nguko mikoloti ya wona yi ti hafuhi ni mati.
8 # Wona ni ka: Gen. 2:9. Mikedhari yi ti si sikoti ku wu phumelisa thembweni ka Txizimu,
misululwani yi ti si dingana ni madhavi a wona,
ni mikhungu yi ti si fani ni madhavi a wona amaphya;
ku ti si nga ni mndonga wo tshura kufana nawo, thembweni ka Txizimu.
9Ni wu tshurisete kona mu ka kutala ka madhavi a wona;
ni yotshe mindonga ya Edheni,
yi nga ti ti thembweni ka Txizimu,
yi wu bavete.
10Ngu tona eto, Mkoma Txizimu a khene: Ngako u nga guleka ngu txiemo, tshoka yako yi txi lapha hagari ka madhavi o txhuma, se mbilu yako yi txi ti kulisa ngu kulapheko, 11ani ni na mningela ka dianza da mtamo ngutu hagari ka matiko, di na mmahela ti ti m'dinganako ngu mhaka ya wubihi wakwe; ni na mrinza hahanze. 12Se vamatiko, avale vo karata ngutu hagari ka matiko, va to wu wila va txi wu leka; madhavi a kona ma wite txitimwi ka mmango, ni ka yotshe mikova, aale ma thungako ma phatuletwe, ka sotshe sinambwana sa ditiko; se votshe vathu va ha mafuni va to khukha ka mtsudi wa kona. 13Sotshe sinyana sa nzuma si ti ti zumba txitimwi ka matshanzu a wona, se sotshe sihari sa txitinga si ti ti ngu hahatshi ka madhavi; 14kasi ku yotshe mindonga ya hafuhi ni mati, yi si ti guleti ngu mhaka ya txiemo, hambi kuhumisa tshoka hagari ka madhavi o txhuma, ni ale ma selako mati, ma si ti thembiseli mapune, ngu mhaka ya kulapha ka ona; nguko otshe ma dingana kufa, kala hahatshi ngutu ka mafu, hagari ka vanana va vathu, ni vale va relelako diphalani.
15 Mkoma Txizimu a khene:
Ka ditshiku dile wu nga relela mndiloni, ni mahile ti to ku txi va ni txidilo; ni to fenengeta kuhokoma, ngu mhaka ya wona, ni ñote milonga ya mnambo yi txi ema; kambe ni fenengetile Libhanoni ngu mtima ngu mhaka ya wona, se yotshe mindonga ya txitinga, ngu mhaka ya wona, yi fite. 16Ngu diguwa da kuwa ka wona, ni zinginisile matiko, mbimo yile ni nga wu releta mndiloni, ni vale va relelako diphalani; se yotshe mindonga ya Edheni, ni mindonga ya yinene ya Libhanoni, votshe vale va selako mati hahatshi ngutu ka mafu va to thavelelwa. 17Ni yona yiya kumweko nawo, yi na relelela mndiloni, kuya patana ni vale va nga dayelwa ngu ditxhari; ina, vale i nga ti diwoko da wona, va nga ti khalahatshile mtsudini, hagari ka matiko.
18U nga fana ni mani ngu wudhumo ni wuhombe hagari ka mindonga ya Edheni kani? Hambi keto, u na relelela ni mindonga ya Edheni hahatshi ngutu ka mafu; hagari ka makhutu u na otela ni vale va nga dayelwa ngu ditxhari; awuwa i Faro, ni dotshe dibutho dakwe, kuwomba Mkoma Txizimu.
Currently Selected:
Ezekhiyele 31: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
