Ezekhiyele 32
32
Mfumeli wa Egipta, i ngwenya
1Ku to maheka taku, ngu dilembe da digumi ni mambidi, ka mtxima wa wugumi ni yimbidi, ka ditshiku do khata da mtxima, di tile kwangu dipswi da Mkoma di txi kha dona:
2Awe mwanana wa m'thu, wusa txidilo txitimwi ka Faro, mfumeli wa Egipta, u txi khawe: U ti ti fana ni txingonyamwana ka matiko, kambe awe u ti ti nga ngwenya tineneni, u txi bhanda minambo yako, ni ku vhilusa mati ngu mikondo yako, se u txi nzihatisa minambo yako. 3Mkoma Txizimu a khene: Ngu tona eto, ni na gwimba likoka langu txitimwi kwako ni msengeletano wa vathu votala, va na ku kwelisa ka likoka langu. 4Sekoko ni na kuleka ha mafuni; ni txi kurinza txitimwi ka mafu, sinyana sotshe sa nzuma si na zumba kwako; ni sotshe sihari sa ha mafuni, si na khura ngu ngawe. 5Se ni na veka tinyama tako txitimwi ka mimango, ni txi tata mikova ngu kulapha kwako. 6Se mafu ale u sambelako ka ona, ni na ma theletela ngu mnoha wako kala mimangoni, se milonga yi na tala ngu ngawe. 7#Wona ni ka: Isa. 13:10; Mat. 24:29; Mar. 13:24-25; Luk. 21:25; Mtu. 6:12-13; 8:12. Aha ni no ku tima, ni fenengeta nzuma, ni txi phumisa tinyeleti ta kona; ditambo ni na di tsivela ngu direfu, se mtima kha wu na mbi woninga. 8Otshe malambu o woninga a nzumani ni na ma phumisa kwako, ni txi tisa txidema txitimwi ka mafu ako, kuwomba Mkoma Txizimu.
9Kambe ni na dayisa timbilu ta vathu votala, mbimo yile ni no kukhundumusa hagari ka matiko, ka matiko ale u nga mbi ma ziva. 10Se ni na maha ti to vathu votala va txi kuxamala, ni vafumeli vawe va txi dhudhumela ngutu, mbimo yi ni no tshawunyetisa ditxhari dangu khoheni kwako; va na dhudhumela yotshe mbimo, mmweyo ni mmweyo ngu mhaka ya wutomi wakwe, ka ditshiku da kuwa kwako.
11Nguko Mkoma Txizimu a khene: Ditxhari da mfumeli wa Bhabhilona di nata txitimwi kwako. 12Ni na wisa dibutho ngu matxhari a tindena, i ku vale va tshofu ngutu va matiko; kambe vona va na khundumusa kutikulisa ka Egipta, se dotshe dibutho di na mwalala. 13Ni na lovisa sotshe sihari ka mati o tala; mkondo ni wawumwewo wa m'thu kha wu na mbi ma vhilusa, hambi sitsendo sa sihari. 14Ni na tengisa mati, ni maha minambo yawe yi khulunga kufana ni mtona, kuwomba Mkoma Txizimu. 15Mbimo yi ni no maha taku ditiko da Egipta di va dirumbi, di maha txisapa txo gwita, ni dayela votshe vale va zumbako ka dona, sekoko va na tiziva ti to ani ngani Mkoma.
16Aawa madilelo ya va no dila ngu ona; vanana vamahorana va vamatiko va na m'dila; ku na dilwa Egipta ni dibutho dakwe, kuwomba Mkoma Txizimu.
Egipta a relela ka wukhalo wa vafi
17Se ku to maheka taku, ngu dilembe da wugumi ni mambidi, ka ditshiku da digumi ni mtxhanu ka mtxima, di tile kwangu dipswi da Mkoma, di txi ta kha dona:
18Awe mwanana wa m'thu, peka huwa ngu dibutho da Egipta, u txi di releta, dona ni vanana vamahorana va matiko a mtamo, va txi ya hahatshi ngutu ka mafu, ni vale va relelako diphalani.
19U pinda mani ngu kutshura kani?
Relela u txi ya otela ka vale va makhutu.
20Va na wa hagari ka vale va nga dawa ngu ditxhari; a ningetwe ka ditxhari; mndindeni ene ni dotshe dibutho dakwe. 21Avale va mtamo ngutu hagari ka tindena, va na mu angula va di hagari ka mndilo, kumweko ni vale va mu emelako: Va relete, va koneyo vale va makhutu, va datwe ngu ditxhari.
22Koneyo waho Asuri ni dibutho dakwe; madhawani kwakwe ku ni mathitha awe; votshe vale va to dawa ngu ditxhari va txi wa. 23Mayiva awe ma vekilwe hahatshi ngutu ka diphala, se dibutho dakwe di madhawani kwakwe; votshe va to dayelwa, ve wiswa ngu ditxhari, avale va nga ti dhukisile ditikoni ka vale vo hanya.
24Koneyo waho Elame ni dotshe dibutho dakwe, di nga randela diyiva dakwe; votshe va to dayelwa, va txi wiswa ngu ditxhari; va relete hahatshi ngutu ka mafu; va wusile kuthava ha mafuni ka vo hanya, ve rwala tingana tawe kumweko ni vale va nga relela diphalani. 25Hagari ka vale va nga dayelwa, va m'vekete m'bhedhu hagari ka dotshe dibutho dakwe; madhawani kwakwe ku ni mathitha awe; votshe makhutu, va nga dayelwa ngu ditxhari; nguko va wusile kuthava mafuni ka vo hanya, kambe va rwate tingana tawe kumweko ni vale va nga relela diphalani; a to vekwa hagari ka vale vo dayelwa.
26Koneyo waho Meseki ni Tubhali, ni dotshe dibutho dakwe; madhawani kwawe ku ni mathitha awe; votshelele makhutu, va nga dayelwa ngu ditxhari, nguko va nga wusa kuthava ha mafuni, ka vo hanya. 27Se kha va na mbi manwa ni tindena tile ta makhutu ti nga wiswa, atile ti nga relela diyivani ni matxhari a tona a yimbi, se matxhari awe ma vekilwe hahatshi ka misungo yawe, ni wubihi wawe wu txitimwi ka marambu awe, nguko i ti ti wudhukiseli wa tindena, mafuni ka vo hanya.
28Nanawe Egipta, u na phatulelwa hagari ka makhutu, se u na otela ka vale va nga dayelwa ngu ditxhari.
29Koneyo waho Edhomi, vafumeli vakwe ni vathangeli vakwe, avale hambiko va nga ti ni mtamo, va ti ya vekwa ni vale va nga dayelwa ngu ditxhari; avava, va otete ni makhutu, ni vale va nga relela diphalani.
30Koneyo vaho votshe vathangeli va Wuphemba, ni votshe Vasidhoni, va nga relela ngu kudayelwa, va nga wiswa tingana ngu kudhukiselwa ko wuswa ngu mtamo wawe; se ve otela i di makhutu, kumweko ni vale va nga dayelwa ngu ditxhari, ve rwala tingana tawe, ni vale va nga relela diphalani.
31Faro a na va wona, a txi tsaka ni dotshe dibutho dakwe; ina, ene Faro apune, ni dotshe dibutho dakwe, va nga dayelwa ngu ditxhari, kuwomba Mkoma Txizimu.
32Nguko nani ni vekile kudhusa kwangu ha mafuni ka vo hanya; ngu kumaha keto a na otela hagari ka makhutu, ni vale va nga dayelwa ngu ditxhari, ene Faro ni dotshe dibutho dakwe, kuwomba Mkoma Txizimu.
Currently Selected:
Ezekhiyele 32: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
