Ezekhiyele 33
33
Muwoneleli ni vathu
(Ezekhiyele 3:16-21)
1Se di tile kwangu dipswi da Mkoma, di txi ta kha dona:
2Awe mwanana wa m'thu, womba-womba ka vanana va vathu vanu, u txi khawe kwawe: Ngako ni txi tisa ditxhari txitimwi ka mafu, se vathu va ditiko ve teka wamwamna wokari hagari kwawe, ve mmaha muwoneleli wawe; 3ngako a txi wona taku ditxhari data txitimwi ka mafu, e veta mpundu e txharihisa vathu; 4se ngako wule a pfako mpundu asi khatali, ditxhari di txi ta m'daya, mnoha wakwe wu na va txitimwi ka msungo wakwe. 5Nguko a pfite diguwa da mpundu asi khatali ngu tona; mnoha wakwe wu na va txitimwi kwakwe; aniko wule a khatalako, a na hulukisa wutomi wakwe. 6Kambe ngako muwoneleli a txi wona taku data ditxhari, asi veti mpundu, se vathu va si txharihiswi; ngako ditxhari di txi ta daya wokari hagari kwawe, m'thu wuwa a datwe ngu mhaka ya wubihi wakwe, aniko mnoha wakwe, ni na wu lava manzani ka muwoneleli.
7Awe koko mwanana wa m'thu, ni kumahile muwoneleli wa nyumba ya ka Israyeli; awe koko u na engisa dipswi da txisofuni kwangu, u na zivisa kwakwe wukhaloni kwangu. 8Ni txi khani ka m'bihi: Awe m'bihi, ngu ditshuri u na fa; se awe u si wombi kasi ku hambukisa m'bihi ka nzila yakwe, m'bihiyo a na fa ka wubihi wakwe, aniko mnoha wakwe, ni na wu lava manzani kwako. 9Se ngako awe u di wombile kasi ku hambukisa m'bihi ka nzila yakwe, ku a txi hunduluka ka yona, se ene asi hunduluki ka nzila yakwe, a na fa ka wubihi wakwe, aniko awe u hulukisile muhefemulo wako.
Kutiangulela ka m'thu ni m'thu masoni ka Txizimu
10Awe koko mwanana wa m'thu, womba ka nyumba ya ka Israyeli ku khawe: Anu ma womba mi txi khanu: Sihambunyeto sathu ni sionho sathu si txitimwi kwathu, athu hi na fela ka sona, sekoko hi na hanyisa kutxani kani? 11Va gele, ani na hanya, kuwomba Mkoma Txizimu, kha ni tsakiswi ngu kufa ka m'bihi, aniko ngu ku m'bihi e hunduka ka nzila yakwe, e hanya; hundulukani, hundulukani ka tinzila tanu ta walo; nguko koko mi na fela txani, anu va nyumba ya ka Israyeli kani?
12Awe koko mwanana wa m'thu, womba ka vanana va va ka kwanu, u txi khawe: Kululama ka wo lulama, kha ku na mbi mmaha e huluka ka ditshiku da kuhoheta kwakwe; se m'bihi kha na mbi dawa ngu wubihi wakwe, ka ditshiku dile a hundulukako ka wubihi wakwe; hambi mlulami kha na mbi hanya ngu kululama ka ditshiku dile a no onha. 13Ngako ni txi womba ka mlulami ku khani, ngu ditshuri u na hanya, se ene ngu kuthemba kululama kwakwe a txi maha to biha, kha ku na mbi alakanywa ni txa tximwetxo txa wululamo wakwe, aniko wubihi wakwe, wule a wu mahako, a na fela ka wona. 14Ngako kambe ni txi khani ka muonhi: Ngu ditshuri u na fa; a txi hunduluka ka txionho txakwe e maha kululama, 15ngako m'bihiyo a txi tshumeta sile a nga ti vekisile, ni kudiha sile so piwa, e londeta sileleto sa kuhanya, asi mahi to biha, ngu ditshuri a na hanya, kha na mbi fa. 16Sotshe sionho sakwe sile a nga onha, kha si na mbi alakanywa; a mahile wululamo ni tinene, ngu ditshuri a na hanya.
17Hambi keto vanana va va ka kwanu va kha vona: Kha ya lulama nzila ya Mkoma; kambe nzila yawe vona, ngu yona yi nga mbi lulama. 18Ngako mlulami a txi huma ka wululamo wakwe, a txi maha to biha, a na fela ka tona. 19Se ngako m'bihi a txi hunduluka ka wubihi wakwe, a txi maha to lulama ni ta tinene, a na hanyiswa ngu tona eto. 20Aniko anu mi khanu: Kha ya lulama nzila ya Mkoma; ni na lamula mmweyo ni mmweyo, madingano ni tinzila takwe, anu va nyumba ya ka Israyeli.
Mahungu a kukhoziswa ka Jerusalema
21 # Wona ni ka: 2 Vafu. 25:3-10; Jer. 39:2-8; 52:4-14. Se ku to maheka taku, ngu dilembe da wugumi ni mambidi, ka mtxima wa wugumi, ka ditshiku da mtxhanu da wukhumbi wathu, kutile wokari kwangu, a nga ti ti hulukile Jerusalema, a txi ta khene: Didhoropa di dayisilwe. 22Wona, dianza da Mkoma di ti ti txitimwi kwangu ni minova, asi se ta awule a nga ti hulukile; di to tula txisofu txangu, kala a txi ta hoka kwangu ni mixo; se txisofu txangu txi to tuleka, kha na malala kambe.
Sionho sa vathu
23Sekoko di tile kwangu dipswi da Mkoma, di txi ta kha dona:
24Awe mwanana wa m'thu, ava va zumbako ka makhalo awa a siwula, va womba-womba va txi kha vona: “Abrahamu i ti ti ene ekha nyamne wa mafu awa; kambe athu hi vangi; hi ningilwe ditiko diya ku va thomba yathu.”
25Va gele koko u txi khawe: Mkoma Txizimu a khene: Midya ni mnoha, se mi guleta maso mi wona sithombe sanu, kambe ma theketa mnoha! Ina mi na lumbwa ngu ditiko diya kani? 26Anu mi ti thembisela ngu matxhari anu, mi mahetela ta manyala, se mmweyo ni mmweyo a navela msikati wa muakelani wakwe! Ina mi na lumbwa ngu ditiko diya kani?
27U na va gela tiya: Mkoma Txizimu a ti khene: Na hanya ani, ati tiku avale va no maneka ka makhalo a siwula, va na wiswa ngu ditxhari, se wule a no maneka txitingani, ni na mningela ka sibanda, si txi m'dya, ni vale va no maneka ka makhalo o tsana, ni mu ka maphala, va na dawa ngu mitungu. 28Se ni na maha ti taku ditiko di maha dirumbi, ni txixamaliso, kambe wu na hunguleka mtamo wa kutikulisa kwakwe; mimango ya ka Israyeli yi na maha marumbi do gwita, aha ko ni wammweyo kha na mbi pinda ngu ka yona. 29Sekoko va na tiziva taku ani ngani Mkoma, mbimo yi ni no maha ditiko di va dirumbi ni txixamaliso, ngu mhaka ya otshe manyala ale va nga ma mahetela.
Mihando ya mahungu a mprofeti
30Se ngu kwako awe mwanana wa m'thu:
Vanana va va ka kwanu, va womba-womba ngu ngawe va di masetani, ni sikenini ka tinyumba; va so womba-womba mmweyo ka mmwani, mmwani ka mwanawe, a txi khene: Ngani, na mi kombela, mi txi ta engisa taku, ngu dihi dipswi da kuta ngu ka Mkoma. 31Se vona vata kwako, nga tile vathu va tisako tona kwako, ve ta khalahatsha masoni kwako kufana ni vathu vangu, kambe ve engisa dipswi dako, aniko kha va mahi txilo; va tumeletela ngu sisofu sawe, kambe timbilu tawe ti londetela ta minavelo yawe. 32Se wona taku, kwawe u fana ni ndando ya lirando, ndando ya wule a ku ni dipswi do pfisiseka, a tshambiselako di txi kugwesa; nguko wa mapfa mapswi ako, aniko kha ma thumi ta txilo. 33Kambe aha ti nota tiya (wona taku ti nata), sekoko va na tiziva taku, hagari kwawe ku ti nga va ni mprofeti.
Currently Selected:
Ezekhiyele 33: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
