Ezekhiyele 34
34
Vadyisi va ka Israyeli
1Se di tile kwangu dipswi da Mkoma, di txi ta kha dona:
2Awe mwanana wa m'thu, profeta u wukela vadyisi va Israyeli; profeta u gela vadyisi va ka Israyeli ku khawe: Mkoma Txizimu a khene: Dikhombo ka vadyisi va ka Israyeli va ti dyisako vona vapune! Ina vadyisi kha va na mbi dyisa tinvuta kani? 3Madya mafura, mi ti ambeka ngu matoya, ni kudaya tile to nona; aniko kha mi dyisi tinvuta. 4Kha ma tsanisa yile yo pwata mtamo, kha ma thuma yile yo lwala, kha ma lunganyetela yile yo khudukiswa, ayile yo penga kha ma yi wuyisa, kambe kha ma tsimbila mi lava yile yo mwalala; aniko mo ti khozisa ngu kunemetisa ni kukarata. 5Ngu kumaha keto, ti hangalakile ngu ku mbi va ni m'dyisi, se ti mahile to dyiwa ngu sotshe sihari sa tshofu sa txitinga, ngu ku ti nga hangalaka. 6Tinvuta tangu ti pengete ka yotshe mimango ni ka simangwana; ina, tinvuta tangu ti hangalakile, kotshe ha mafuni, ku si maneki wa ku ti wuyisa hambi kutsimbila e ti lava.
7Ngu tona eto, anu vadyisi, engisani dipswi da Mkoma: 8Na hanya ani, kuwomba Mkoma Txizimu, kuwoneka taku tinvuta tangu ti ningetwe kuñolwani, se ti mahile to dyiwa ngu sotshe sihari sa txitinga, ngu kupwateka ka vadyisi, kambe vadyisi vangu kha va tsimbili ve lava tinvuta tangu, aniko vo ti dyisa vona vapune, kha va dyisi tinvuta tangu, 9ngu tona eto, anu vadyisi, engisani dipswi da Mkoma: 10Mkoma Txizimu a khene: Wonani taku na wukela vadyisi, kambe ni na lava tinvuta tangu manzani kwawe; se va na leka kudyisa tinvuta, kambe kha va na mbi ti dyisa vona vapune; ni na txhatxhisa tinvuta tangu mkanani kwawe, kha ti na mbi ngadi ti txi dyiwa ngu vona kambe.
M'dyisi wamnene
11Nguko Mkoma Txizimu a khene: Wonani taku ani, ani nipune, ni na lava tinvuta tangu, kambe ni na wuya nato. 12Ku nga m'dyisi a lavako mtxhambi wakwe, ka ditshiku dile a ku hagari ka tinvuta takwe tile ti nga hangalaka, ni na mahisa tona eto kulava tinvuta tangu; kambe ni na ti wuyisa ngu ka otshe makhalo ale ti nga hangalaka ka ona, ka ditshiku da marefu ni da txidema. 13Se ni na ti thavisa ka vathu, ni txi ti wuyisa ngu ka matiko o hambana, ni na ti wuyisa ditikoni ka tona, ni txi ti dyisela mimangoni ka Israyeli, hafuhi ni milonga, ni ka otshe makhalo ma nga akwa ha mafuni. 14Ni na ti dyisela ka makhalo amanene, sibala sa kona si na maneka ka mimango yo lapha ya ka Israyeli; koneyo ti na otela ka txibala txatxinene, kambe ti na dya ka wudyiselo wa kunona, mimangoni ka Israyeli. 15Ni na dyisa tinvuta tangu, kambe ni na ti maha ti humula, kuwomba Mkoma Txizimu.
16Ni na tsimbila ni lava yile yo mwalala, kambe ni na wuyisa yile yo penga, ni txi tsanisa yile yo khudukiswa, ni kuthuma yile yo lwala; aniko ayile yo ena ni yile ya mtamo ni na ti khundumusa; tona ni na ti dyisa ngu wululamo.
17I di anu, anu tinvuta tangu, Mkoma Txizimu a khene: Wonani taku, ni na lamula hagari ka sifuyo sa sidotho ni sifuyo sa sidotho, ni hagari ka tihamba ni vamabhongwe. 18Ina kha ti mi eneleli kudyisa ka wudyiselo wa wunene, mi si kandeteli wudyiselo ngu mikondo yanu kani? Ni ti taku mi heta otshe mati, mi gwita mi va nga mdhaka ngu mikondo yanu kani? 19Se ngu didhawa da tinvuta tangu, ti dya mule ku nga ganyatelwa ngu mikondo yanu, kambe ti sela mati ale ma nga viluselwa ngu mikondo yanu.
20Ngu mhaka ya eto, Mkoma Txizimu a mi gela tiya: Wonani taku ani, ani nipune, ni na lamula hagari ka sifuyo so ena ni sifuyo so goma. 21Ta woneka taku ngu didhawa ni dikata, ma ti rethetela tinvuta, kambe ngu titxheho tanu ma dhinetela tile ta kwa mbi na mtamo, kala miza mi txi tihangalasa hahanze, 22ani ni na txhatxhisa tinvuta tangu, kasi ku ti si swi kambe ti ñolwa, se ni na lamula hagari ka sifuyo sa sidotho ni sifuyo sa sidotho. 23Kambe ni na ti wusela m'dyisi mmweyo dwe, se ene a na ti dyisa; txithumi txangu Dhavhidha a no ti dyisa; ene a na va m'dyisi wa tona. 24Se ani Mkoma, ni na va Txizimu txawe, txithumi txangu Dhavhidha a na va mthangeli hagari ka tona; ani Mkoma, ni wombile. 25Kambe ni na maha txitumelelano txa kuthutha kumweko nato, ni txi heta sihari sa tshofu ha mafuni; ti na zumba txiwulani ti di tsani, ti txi otela sitingani.
26Se ka tona, ni makhalo ma nga randela simangwana, ni na thela kukateka; ni na nisa mati ngu mbimo ya kona; ma nava mati a makatekwa. 27Se mindonga ya txitinga yi na ninga mihando ya yona, ni mafu ma na humisa sasiphya, ti nava ti di tsani ditikoni ka tona; se va na tiziva taku ani ngani Mkoma, mbimo yile ni no funya tindonga ta dikange da tona, ni txi ti txhatxhisa manzani ka vale va nga ti ti thuma kuranda ngu tona. 28Kha ti na mbi ngadi ti ñolwa kambe ngu vamatiko, ni sihari sa tshofu sa mafu kha si na mbi ngadi si txi ti dya kambe; ti na zumba ti di tsani, kambe kha ku na mbi va ni wo ti dhukisa. 29Se ni na ti wusela siyalo sa lisima, kha ti na mbiswa kambe ti hetwa ngu nzala ha mafuni, kambe kha ti na mbi va txiruko ka vamatiko. 30Va na tiziva koko taku ani Mkoma, Txizimu txawe, ni kumweko nato, niku tona mbathu vangu, nyumba ya ka Israyeli, kuwomba Mkoma Txizimu.
31Anu koko, anu tinvuta tangu, tinvuta ta wudyiselo wangu; mi vathu, aniko ani ngani Txizimu txanu, kuwomba Mkoma Txizimu.
Currently Selected:
Ezekhiyele 34: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
