Ezekhiyele 35
35
Txizimu txa tsayisa Edhomi
1Se di tile kwangu dipswi da Mkoma, di txi ta kha dona:
2Awe mwanana wa m'thu, rendekelisa khohe ka mmango wa Seyiri, se profeta u txi wu wukela. 3U txi khawe ka wona: Mkoma Txizimu a khene: Wona taku ani na kuwukela, awe mmango wa Seyiri, kambe ni na nawuluta dianza ni kuwukela, ni txi kumaha dirumbi ni txixamaliso. 4Madhoropa ako ma nava ni txiwunda, kambe awe u na maha dirumbi; se u na tiziva taku ani ngani Mkoma.
5Nguko wulala wako kha wu gwiti, se u lekile vanana va ka Israyeli ve wukelwa ngu ditxhari, ka mbimo ya wubihi wawe wa hombe. 6Ngu kona eho, na hanya ani, kuwomba Mkoma Txizimu, ni ku emisete mnoha, se mnoha wu na kulondeta; nguko khwa nyenya mnoha, mnoha wu na kulondeta. 7Se ni na maha ti to mmango wa Seyiri wu va dirumbi do gwita, kambe ni na fuvisa ni txihi txile txi no tshawunyeta ngu ka wona, ni vale va wuyako ngu ka wona. 8Se ni na tata mimango ya kona ngu vale vo dayelwa; simangwanani kwako ni mikovani kwako, ni ka yotshe minambo yako, va na wa vale vo dayelwa ngu ditxhari. 9Ni na kumaha dirumbi da yotshe mbimo, kambe madhoropani kwako kha ku na mbiswa kuve ni vo zumba; ngu kumaha keto, mi na tiziva taku ani ngani Mkoma.
10Hambiko u ku khawe: Vathu ni matiko mambidi si na maha sangu, si na hi lumba, nguko Mkoma a ti ti ho koneyo, 11ngu tona eto, na hanya ani, kuwomba Mkoma Txizimu, taku ni na maha madingano ni kuhenya kwako, ni madingano ni dibava dako, tile u nga va vengisa tona; se ni na ziwa ngu vona, mbimo yile ni no kulamula. 12Kambe u na tiziva taku ani Mkoma, ni ma pfite otshe manyala ako, ale u nga ma wombetela u txi wukela mimango ya ka Israyeli, u txi khawe: Se va mahilwe marumbi, va ningetwe kuva wudyiselo wathu. 13Anu mi ti mahile vahombe kwangu; ani ni ti pfite.
14 Mkoma Txizimu a khene:
Mbimo yile ma tsakako otshe mafu, awe ni na kumaha dirumbi. 15Ngako u nga tsakiswa ngu thomba ya nyumba ya ka Israyeli, ngu ku a nga mahwa dirumbi, ngu tona eto ni no kumaha; u na mahwa dirumbi, awe mmango wa Seyiri, ni dotshe ditiko da Edhomi, ina dotshe; se va na tiziva taku, ani ngani Mkoma.
Currently Selected:
Ezekhiyele 35: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
