Ezekhiyele 36
36
Txizimu txa katekisa vathu va ka Israyeli
1Se awe mwanana wa m'thu, profeta ka mimango ya Israyeli u txi khawe: Anu mimango ya ka Israyeli, engisani dipswi da Mkoma. 2Ngu kumaha keto Mkoma Txizimu a khene: Eko mlala wanu a ku khene ngu nganu: Yowe! Yowe! Kala ka timbimo ta kwa mbi gwita, mi na va thomba yathu;
3Ngu kumaha keto, profeta u txi khawe: Ngako va nga mi xasela ni ku mi randela, kasi ku mi txi mahwa thomba ya matiko ale ma nga sala, ni ku mi ku sisofuni ka vo biha, va makuhu, 4ngu tona eto, engisani dipswi da Mkoma Txizimu anu mimango ya ka Israyeli: Mkoma Txizimu a khene ka mimango ni ka simangwana, ka minambo ni ka mikova, ka makhalo a marumbi ni ka txiwunda, ni ka madhoropa ale ma nga lekwa, o ñolwa, a txisekiso ka matiko ale ma nga sala madhawani kwawe.
5Ngu konaho, Mkoma Txizimu a khene: Ngu ditshuri kuhisekani ka kuhenya kwangu, ni wombawombile ni wukela matiko ale ma nga sala, ni ditiko da Edhomi. Vona va honyote mafu angu, ngu kutsaka ka totshe timbilu, ni kutxhipisa muhefemulo, kasi ku wu rinza kuñolwani.
6Ngu tona eto, profeta madingano ni ditiko da ka Israyeli, u womba ka mimango, ni ka simangwana, ni ka minambo ni ka mikova, u txi khawe: Mkoma Txizimu a khene: Wona taku ni wombile ngu kutiningetetela kuhenyani kwangu, nguko mi tekile sile mi nga honyola ka vamatiko.
7Ngu konaho, Mkoma Txizimu a khene: Ni guletile dianza, kasi ku vamatiko vale va nga mi randela, ve rwala tingana tawe vapune. 8Aniko anu mimango ya ka Israyeli, mi na humisa madhavi, mi txi ninga mihando ka vathu vangu va ka Israyeli; nguko va hafuhi ni kuwuya. 9Nguko wonani taku ani ni ni nanu; ni na mi rendekela, mi na dimwa mi txi phaywa. 10Ni na andisa vathu txitimwi kwanu, ka yotshe nyumba ya ka Israyeli, ina, ka yotshe ngu ditshuri; se madhoropani ku nava ni vo zumba, ni makhalo ale ma nga xaselwa ma na aketwa. 11Aniko ni na andisa vathu ni sihari txitimwi kwanu; vona va na velekela ve anda; se ni na mi maha mi zumba nga kukhatani, ni txhukwata dihanyo danu kupinda kukhatani; mi na tiziva taku ani, ngani Mkoma. 12Ni na maha taku vathu vangu va ka Israyeli ve tsimbila-tsimbila txitimwi kwanu; vona va na kuteka, u na va thomba yawe, khu na mbiswa kambe u txi daya vanana vawe.
13 Mkoma Txizimu a khene: Wonani, a ti va wombako ngu nganu: Awe u ditiko do heta vathu, kambe u ditiko do dayela vanana va vathu; 14ngu kumaha keto, khu na mbi ngadi u txi heta vathu, kambe khu na mbiswa u dayela vanana va vathu vako, kuwomba Mkoma Txizimu. 15Kambe ni na maha taku, ku si ngadi kupfala kambe kulwa ka vamatiko; se khu na mbi ngadi u teka sile u nga honyola ka mamwani matiko, hambi ku ngadi u txi dayela vanana va ditikoni kwako, kuwomba Mkoma Txizimu.
Wutomi wa wuphya wa vathu va ka Israyeli
16Se di tile kwangu dipswi da Mkoma, di txi ta kha dona:
17Awe mwanana wa m'thu, mbimo yile va nyumba ya ka Israyeli va nga ti ti zumba ditikoni kwako, va di nyenyezisile ngu dihanyo dawe ni mithumo yawe; kufana ni wamsikati wu a ku ka mbimo yakwe yo zumba didhawa, edo i ti ti dihanyo dawe, masoni kwangu. 18Ni to tshakunuta koko kuhenya kwangu txitimwi kwawe, ngu mhaka ya mnoha wule va nga wu theketa txitimwi ka mafu, ni sithombe sawe va ngadi nyenyezisa ngu sona. 19Se ni to va hangalasa hagari ka matiko, va txi hangalaswa ka matiko; ni to va lamula madingano ni mahanyelo awe ni simaho sawe. 20Kambe, va di hokile ka matiko ale va nga ya ka ona, va to nyenyezisa ditina dangu do sawuleka, nguko ku ti ti wombwa taku: Avava mbathu va Mkoma, se va humile ditikoni kwakwe. 21Aniko ani ni va tsetsile ngu mhaka ya ditina dangu do sawuleka, adile va nyumba ya ka Israyeli va nga ya di nyenyezisa, ka matiko ale va nga ya ka ona.
22Womba koko ka nyumba ya ka Israyeli, u txi khawe: Mkoma Txizimu a khene; kha ni mahi tiya ngu mhaka yako, awe nyumba ya ka Israyeli, aniko ngu mhaka ya ditina dangu do sawuleka, adi u ngadi nyenyezisa hagari ka matiko ale u nga ya ka ona. 23Kambe ani ni na sawulekisa ditina dangu da hombe, di nga nyenyeziswa hagari ka matiko, adi mi ngadi nyenyezisa hagari ka ona; se matiko ma na tiziva taku, ani ngani Mkoma, kuwomba Mkoma Txizimu, mbimo yile ni no sawulekiswa u txi ti wona. 24Aniko ni na mi teka hagari ka matiko, ni txi mi sengeleta ngu ka otshe matiko, ni mi wuyisa ditikoni kwanu. 25Sekoko ni na xwaya mati o sawuleka txitimwi kwanu, mi na sawulekiswa; ni na mi sawulekisa ka yotshe nzambwa yanu, ni ka sotshe sithombe sanu. 26Se ni na mi ninga mbilu ya yiphya, kambe ni na thela moya wa wuphya mndani kwanu; ni na thavisa mbilu ya dirigwi ka nyama yanu, ni txi mi ninga mbilu ya nyama. 27Kambe ni na thela moya wangu mndani kwanu, ni na maha ti to mi tsimbila ngu sileleto sangu, mi txi vekisa wululamo wangu, ni ku wu londeta. 28Se mi na ya zumba ka mafu ale ni nga ninga vatate vanu, anu mi na va vathu vangu, ani ni na va Txizimu txanu. 29Ni na mi txhatxhisa ka yotshe nzambwa; ni na tisa fulaho ni txi yi andisa, kambe kha ni na mbi tisa nzala txitimwi kwanu. 30Ni na andisa mihando ya mindongani, ni siyalo sasiphya sa thembweni, kasi ku mi si swi kambe mi mana txiruko txa nzala hagari ka matiko. 31Sekoko mi na alakanya tinzila tanu to biha, ni simaho sanu si nga mbi va sa sinene; mi na ti laya ngu wubihi wanu, ni manyala a kona anu. 32Kha ni mahi tiya ngu ku mi randa, kuwomba Mkoma Txizimu; ti woneni: Wanani tingana, ni kukanganyiswa ngu tinzila tanu, anu nyumba ya ka Israyeli.
33 Mkoma Txizimu a khene:
Ka ditshiku dile ni no mi sawulekisa ka wotshe wubihi wanu, sekoko ni na maha taku mi txi zumba madhoropani, ku txi aketwa makhalo ale ma nga xaselwa. 34Se mafu ale a txisapa ma na dimwa, ma si ngadi me wonwa i di txisapa, ngu votshe vapindi. 35Se va na kha vona: Mafu awa a txisapa ma nonile nga thembwe ya Edheni; kambe ni na tsanisa madhoropa a txiwunda, a sisapa, o khundumuselwa, ma txi va ni vathu. 36Sekoko matiko ale ma no sala ngu madhawani kwanu, ma na tiziva taku, ni wusile madhoropa o khundumuselwa, ni kuphaya mule ku nga ti xasetwe; ani Mkoma ni wombile, kambe ni na ti maha.
37 Mkoma Txizimu a khene:
Kambe ngu mhaka ya tona eto, nyumba ya ka Israyeli yi na ni kombela, ati to ni txi yi mahela: Kuandisa vathu va yona, kufana ni mtxhambi. 38Kufana ni mtxhambi wo sawulekiswa, nga mtxhambi wa Jerusalema amu ka mipipi yakwe, ngu tona eto ma no wonekisa tona madhoropa a siwula, ngu mimwaya; se va na tiziva taku, ani ni Mkoma.
Currently Selected:
Ezekhiyele 36: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
