Ezekhiyele 37
37
Mkova wa marambu a kuoma
1Di tile txitimwi kwangu dianza da Mkoma; se Mkoma a to ni teka ngu moya, a txi ya ni veka ka Mkova wo tala ngu marambu, 2a txi ni tsimbitisela madhawani ka marambu; i ti ti amangi ngutu mkovani mule, kambe ma ti ti omile ngutu. 3Se a txi ni gela ku khene:
Awe mwanana wa m'thu, ina ma nga hanya marambu awa kani?
Ani ni to khani:
Mkoma Txizimu, awe wa tiziva.
4Sekoko a to khene kwangu:
Profeta ka marambu awa, u txi ma gela tiya: Anu marambu a kuoma, engisani dipswi da Mkoma. 5Mkoma Txizimu a khene ka marambu awa: Wonani taku ni na wuleta moya kwanu, mi na hanya. 6Se ni na veketela misiha kwanu, ni na thungisa nyama txitimwi kwanu, ni fenengeta didhowo txitimwi kwanu, ni kuthela moya kwanu, mi na hanya, kambe mi na tiziva taku ani ngani Mkoma.
7Sekoko ni to profeta nga kule ni nga rumwa; se ku to pfala diguwa, mbimo yile ni nga ti ti profeta; marambu ma to goyana-goyana me patana, dimwedo ni dimwedo ka wukhalo wa dona. 8Se ni to wona taku ya humelela misiha ka ona, ku txi thunga nyama, se didhowo di txi fenengeta ngu txitimwi; aniko ku ti si nga ni moya mndani ka sona.
9Se Mkoma a to khene kwangu:
Profeta ka moya, profeta awe mwanana wa m'thu, u txi khawe ka moya: Mkoma Txizimu a khene: Ngono ngu ka mune wa madhawa awe moya, u txi ta futeta txitmwi ka vava vofa, kasi kuva txi hanya.
10Se ni to profeta nga kule a nga ni ruma; sekoko moya wu to wulela ka sona, si hanya si khukha si txi ema, so tala ngutu ko pindisa.
11Sekoko a to khene kwangu:
Awe mwanana wa m'thu, marambu awa otshe, i nyumba ya ka Israyeli; wona taku va kha vona: Marambu athu ma omile, ni yona themba yathu yi lovile; athu hi witwe. 12Awe koko profeta u txi va gela tiya: Mkoma Txizimu a khene: Wonani taku ni na tula mathitha anu, ni txi mi humisa ngu mathithani kwanu, anu vathu vangu, se ni na mi tisa ditikoni ka Israyeli. 13Se mi na tiziva taku ani ngani Mkoma, mbimo yile ni no tula mathitha anu, ni txi mi humisa ngu mathithani kwanu, anu vathu vangu. 14Kambe ni na thela kwanu Moya wangu, mi na hanya, se ni na ya mi veka ditikoni kwanu, mi na tiziva taku ani Mkoma, ni wombile eto, kambe ni ti mahile, kuwomba Mkoma.
Judha ni Israyeli, mfumo wumwewo dwe
15Se di tile kwangu dipswi da Mkoma, di txi ta kha dona:
16Awe koko mwanana wa m'thu, teka txipulangwana, u bhala ka txona, u txi khawe: Ngu Judha ni vanana va ka Israyeli, ni vangana vakwe. Se teka tximwani txipulangwana u bhala ka txona, u txi khawe: Ngu Josefa ndonga ya Efrayime, ni yotshe nyumba ya ka Israyeli, ni vangana vakwe. 17Se u na si pata si maha tximwetxo dwe, manzani kwako. 18Aniko ngako va txi kuangula vanana va kakwanu, va txi kha vona: Ina khu na mbi hi gela txhamuselo ya tona tiya kani? 19Se awe u na khawe: Mkoma Txizimu a khene: Wonani taku ni na teka ndonga ya Josefa, ayile yi nga ti ti manzani ka Efrayime, ni tindonga ta tihunzu ta ka Israyeli, ni vangana vakwe, ni txi ti pata ka ndonga ya ka Judha, ni na maha ngu tona ndonga yimweyo, se tona ti nava ndonga yimweyo manzani kwangu.
20Se sipulangwana sile u no va u di bhate ka sona, si nava manzani kwako, na va txi si wona. 21Va gele koko ku khawe: Mkoma Txizimu a khene: Wonani taku ni na teka vanana va ka Israyeli hagari ka matiko ale va nga ya ka ona, ni txi va sengeleta ngu ka otshe madhawa, ni txi va heleketa ditikoni kwawe. 22Se ngu ka vona ni na maha mfumo wumwewo ha mafuni, mimangoni ka Israyeli, kambe mfumeli mmweyo a na fumela vona votshe; kha ku na mbi ngadi kambe i di mifumo yimbidi; kha va na mbiswa kambe ve abana ngu mifumo yimbidi ka masiku matako. 23Kambe kha va na mbiswa kambe ve nyenyeziswa ngu sithombe sawe, hambi ngu manyala awe, ni sihambunyeto sawe; kambe ni na va txhatxhisa ka otshe makhalo ale va nga onha na va txi zumba ka ona, se ni na va sawulekisa. 24Se txithumi txangu Dhavhidha a na fuma txitimwi kwawe, votshe va na va ni m'dyisi mmweyo; kambe va na tsimbila ngu wululamo wangu, ni kuvekisa sileleto sangu, va na si maha. 25Va na zumba ka ditiko dile ni nga ninga txithumi txangu Jakobe, emo va nga ti zumbile kona vatate vanu; se va na zumba ka dona, vona ni vanana vawe, ni vatukulu vawe, yotshe mbimo; kambe txithumi txangu Dhavhidha a na va mthangeli wawe, ngu ha ku si gwitiko. 26Ni na maha navo txitumelelano txa kuthutha; i nava txitumelelano txa kwa mbi gwita; ni na va tsanisa ni va andisa, ni veka nyumba yangu yo sawuleka hagari kwawe yotshe mbimo. 27Kambe nyumba yangu yi na va hagari kwawe, ani ni na va Txizimu txawe, se vona i nava vathu vangu. 28Se matiko ma na tiziva taku ani ngani Mkoma, ni sawulekisako Israyeli, mbimo yile nyumba yangu yo sawuleka yi no maneka hagari kwawe, yotshe mbimo.
Currently Selected:
Ezekhiyele 37: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
